Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 107: Sitefanesa tava mu dipaga nomamanya

Esimwititi 107: Sitefanesa tava mu dipaga nomamanya

MUGARA ogu ana kutwa nongoro apa kuna kara Sitefanesa. Age murongwa gwaJesus gomulimburukwi. Nye tara eyi yina kumuhorokera ngesi! Vagara ava kuna kumuveta mamumanya gomamunene. Yinke va nyengera Sitefanesa ngesi dogoro vana kurugana sininke sosidona ngesi? Tu tareni.

Sitefanesa kuna kumutoona nomamanya

Karunga kuna kuvatera Sitefanesa a rugane yitetu yoyiwa unene. Vagara ava kapi vana yi hafere eyi, makura tava mu patanesa kweyi a rongo vantu usili. Nye Karunga ta pe Sitefanesa unongo wounene, ano Sitefanesa makura ta likida asi vagara ava kuronga yimpempa. Eyi tayi va handukisa nye unene. Tava mu kwata nokuzigida vantu va ya tante yimpempa kuhamena Sitefanesa.

Mupristeli gomunene ta pura Sitefanesa asi: ‘Eyi yininke usili ndi?’ Sitefanesa ta limburura mokugava siuyungwa sosiwa sokutunda moBibeli. Kouhura waso, ta tanta asi ngapi vagara wovadona va nyengere vaporofete vaJehova mosiruwo sa ka pita. Makura ta tanta asi: ‘None kwa fana tupu ngwendi vagara vena. One kwa dipaga mukareli gwaKarunga Jesus, ntani kapi mwa limburukwa noveta daKarunga.’

Eyi tayi handukisa vampitisili womaukerelikarunga ava unene. Tava likwetja mazego gawo mehandu. Sitefanesa makura ta kankuka nokutanta asi: ‘Tareni! Ame kuna kumona Jesus ana sikama korulyo rwaKarunga meguru.’ Apa makura vagara ava tava likwata komatwi gawo nokungundama Sitefanesa. Tava mu kwata nokumupurututira ponze zositata.

Oku makura tava hutura ko yikoverero yawo yokontunda nokuyipa mumatigara Sauru a yi takamese. To mono Sauru? Makura vagara vamwe tava tameke kuzuguma Sitefanesa mamanya. Sitefanesa ta tongamene ngomu ono kumumona, nokukanderera kwaKarunga asi: ‘Jehova, wa ha va tengeka koudona ou.’ Age ana diva asi vagara vamwe ava kuna va pukisa vampitisili womaukerelikarunga. Konyima zeyi, Sitefanesa ta fu.

Nsene muntu ana ku rugana udona, ove kuhara asi nove o mu korese, ndi o pure Karunga a mu korese ndi? Eyi kapisi yiyo ga rugene Sitefanesa ndi Jesus. Awo kwa kere nombili noku kwava va va pakerere nyanya. Tu hetekeni kuvahonena.

Yirugana 6:8-15; 7:1-60.



Mapuro

  • Yilye Sitefanesa, ntani yinke ana mu vatere Karunga a rugane?
  • Yinke ana uyunga Sitefanesa eyi yina ninkisa vampitisili womaukerelikarunga va handuke unene?
  • Apa vagara vana purututire Sitefanesa ponze zositata, yinke vana mu rugana?
  • Mefano, yilye mumatigara ana sikama koyikoverero?
  • Komeho zokufa, yinke ana kanderere Sitefanesa kwaJehova?
  • Mokuhonena Sitefanesa, yinke twa hepa kurugana nsene gumwe a tu rugana udona?

Mapuro gokugwederera ko

  • Resa Yirugana 6:8-15.

    Maruganeso musinke goyimpempa va ruganesa vampitisili womaukerelikarunga mokuheteka kuhagekesa sirugana sezuvhiso soNombangi daJehova?

  • Resa Yirugana 7:1-60.

    Yinke ya vaterere Sitefanesa a kwatese ko mbudi zongwa komeho zomasimbi, ntani yinke natu vhura kulirogera ko kosihonena sendi?

    Nkareso musinke twa hepa kulikida kovarwanesi wosirugana setu?