Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 104: Jesus ta tengura meguru

Esimwititi 104: Jesus ta tengura meguru

NGOMU gana kupita mazuva, Jesus ta lilikida kovasikuli vendi yikando yoyinzi. Sikando simwe varongwa wokusika po-500 tava mu mono. Ono diva asi Jesus yinke ana kuvauyungisa apa ana kuvamonekera? Uhompa waKarunga. Jehova kwa tumine Jesus pevhu a ya ronge kuhamena Uhompa. Ano age kuna kutwikira kuyirugana eyi nokonyima zokumuvhumbura koufe.

Jesus kuna kutengura meguru

To diworoka asi yinke uhompa waKarunga? Yimo, Uhompa epangero lyene-lyene lyaKarunga meguru, ano Jesus yige ga horowora Karunga a kare hompa. Ngomu twa lironga, Jesus kwa likidire asi hompa gomuwa musinke nga ka kara mokukutika wokufa nzara nokuverura vaveli ntani nokupindura novafe vaava!

Apa Jesus nga pangera ngahompa meguru nomvhura eyovi, pevhu ngapi omu ngapa fana? Yimo, evhu nalinye ngava li ninka li kare paradisa zongwa. Kapi ngapa kara hena yita ndi nyanya ndi mauvera ndi nampili nomfa deedi. Ose kwa yi diva eyi asi usili morwa Karunga kwa sitire evhu li kare paradisa ezi nava hafera vantu. Eyi yiyo ga ruganenene sikunino saEdeni petameko. Ano Jesus nga ka divilisa asi eyi ana hara Karunga a yi rugane yi ka sikilire mo.

Siruwo tasi siki mo nye yipo Jesus a tengure meguru. Jesus kwa lilikidire kovarongwa vendi mazuva 40. Awo vana divilisa nawa-nawa asi age muzuni. Nye komeho zokusiga varongwa vendi ta va tantere asi: ‘Kareni ngorooro moJerusarema dogoro ngomu gwane mpepo zokupongoka.’ Mpepo zokupongoka kuna kara nonkondorugano daKarunga, ngwendi mpepo zokupepa, ezi ngazi vatera vasikuli vendi va rugane eharo lyaKarunga. Mouhura Jesus ta tanta asi: ‘One ngomu zuvhisa kuhamena nge dogoro nokooku wa ka twa uzuni.’

Konyima zapa Jesus ga tente eyi, sininke sositetu tasi horoka. Ta zi meguru, ngomu ono kuyimona apa. Eremo makura tali mu vandeke, ano varongwa kapi va mwene hena Jesus. Jesus ta zi meguru nokutameka kupangera vasikuli vendi vepevhu age moomo meguru.

Varongwa kuna kutara keguru

1 Vakolinte 15:3-8; Ehororo 21:3, 4; Yirugana 1:1-11.



Mapuro

  • Varongwa vangapi va mu mono Jesus posikando simwe, ntani yinke ana kuvauyungisa?
  • Yisinke Uhompa waKarunga, ntani ngapi omu ngali fana eparu pevhu apa Jesus nga pangera ngaHompa nomvhura eyovi?
  • Mazuva gangapi ana moneka Jesus kovarongwa vendi, nye siruwo sina siki mo sokurugana yinke?
  • Komeho zokusiga varongwa vendi, yinke ana va tantere Jesus va rugane?
  • Yinke yina kuhoroka mefano, ntani ngapi omu Jesus vana kupira kumumona hena?

Mapuro gokugwederera ko

  • Resa 1 Vakolinte 15:3-8.

    Morwasinke mupositoli Paurusa ngano na uyungira nousili kuhamena evhumbuko lyaJesus, ntani koyininke musinke Vakriste naina nava vhura kuuyunga nousili?

  • Resa Yirugana 1:1-11.

    Ngapi omu sa lihanena sirugana sezuvhiso, moomu va yi pumbire moYirugana 1:8?