Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 103: Monzugo ezi va pete

Esimwititi 103: Monzugo ezi va pete

KONYIMA zapa oPeturusa naJohanesa vana tundu pontoko apa karu kere rutu rwaJesus, Mariya ta kara po gelike. Ta tameke kulira. Makura ta nyongama a tare monda zontoko, ngomu tuna yi mono mefano eli lina ka pita. Omo ta mono mo vaengeli vavali! Tava mu pura asi: ‘Yinke ono kulira?’

Mariya ta limburura asi: ‘Vana gusa mo Hompa gwange, ano ame kapi nina diva oku vana ka mu tura.’ Mariya makura ta piruka nokumona mugara gumwe. Mugara ta mu pura asi: ‘Yilye ono kupapara?’

Mariya ta gazara asi mugara ogu munasikunino, ntani asi nampo yige ana gusa rutu rwaJesus. Makura ta tanta asi: ‘Nsenesi nyove ono mu gusa mo, tantera nge oku ono ka mu tura.’ Nye mousili, mugara ogu kuna kara Jesus. Age kuna kara norutu oru ana kupira kudimburura Mariya. Nye apa ana mu zigida kedina lyendi, Mariya ta diva asi yige Jesus. Mariya ta duka a ka tantere varongwa asi: ‘Ame nina mono Hompa!’

Kositenguko oso, awo varongwa vavali kuna kugenda va ze komukunda gwaEmausi, mugara gumwe ta lipakerere nawo. Varongwa vana guwu unene morwa Jesus kava mu dipagere. Nye ngomu vana kugenda, mugara ogo ta singonona yininke yoyinzi yokutunda moBibeli eyi yina va zuvhisa ko hansa. Mouhura, apa va ya sikeme va lye, varongwa tava dimburura asi mugara ogu Jesus. Jesus makura ta dongonoka, ano varongwa vavali ava tava genderere usimbu kutengura dogoro koJerusarema va ya tantere vapositoli kuhamena Jesus.

Apa yina kuhoroka eyi, Jesus ta monekere Peturusa nage. Wokukwama ko, apa vana yi zuvhu eyi, tava hafa. Ano varongwa vavali vena tava zi koJerusarema nokukagwana vapositoli. Tava va tantere asi ngapi omu Jesus ana va monekere monzira. Ano poopo tupu vana kusimwitira kuhamena kweyi, ono diva asi sininke musinke sositetu sina horoka?

Tara kefano. Jesus ta moneka moomo monzugo, nampili ngomu mavero vana ga pata. Ee, ngapi tupu omu vana hafa varongwa! Nani kapisi ezuva lyehafo eli? Kuvhura o varure yikando eyi ana monekere Jesus vasikuli vendi dogoro papa? Ono varura yikando yitano?

Jesus kuna kumonekera varongwa

Apa Jesus ana va monekere, mupositoli Tomasa kapi ana kara nawo. Varongwa makura tava mu tantere asi: ‘Ose tuna mono Hompa!’ Nye Tomasa ta tanta asi ntudi a mone Jesus nomeho gamwene ntani na pura. Konyima zomazuva ntantatu varongwa tava pongo hena kumwe monzugo ezi va pete, ano sikando esi Tomasa nage nawo ana kara. Haruka ko, Jesus ta moneka moomo monzugo. Tomasa makura ta pura nye.

Johanesa 20:11-29; Rukasa 24:13-43.



Mapuro

  • Yinke ana uyunga Mariya komugara ogu ana kugazara asi munasikunino, nye yinke yina mu ninkisa a dimburure asi age sili yige Jesus?
  • Yinke yina horoka kovarongwa vavali vana kugenda va ze komukunda gwaEmausi?
  • Sininke musinke sokutetukisa sina horoka apa varongwa vavali vana tantere vapositoli asi vana mono Jesus?
  • Yikando yingapi ana monekere Jesus vasikuli vendi?
  • Yinke ana uyunga Tomasa apa ana zuvhu asi varongwa vana mono Hompa, nye yinke yina horoka momazuva ntantatu?

Mapuro gokugwederera ko

  • Resa Johanesa 20:11-29.

    Jesus kwa uyungire mwaJohanesa 20:23 asi vantu va va pa nonkondo dokudongonona po nonzo ndi? Faturura.

  • Resa Rukasa 24:13-43.

    Ngapi omu natu vhura kuwapaika nomutjima detu yipo di tambure mausili goBibeli?