Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 96: Jesus ta verura vaveli

Esimwititi 96: Jesus ta verura vaveli

JESUS ngomu ana kugenda mosirongo, ta verura vaveli. Mbudi zoyitetu eyi tava zi simwitire monomukunda nonodoropa nadinye domukunduruko. Makura vantu tava mu retere yirema novatwiku noyipuru-puru, ntani novaveli hena peke. Jesus makura ta va verura navenye.

Ngesi pana piti nye nomvhura ntatu kutunda apa Johanesa ga kuhwire Jesus. Jesus makura ta tantere vapositoli vendi asi ntaantani a ze koJerusarema, oku nava ka mu dipagera, ntani na ka pinduka hena koufe. Mosiruwo oso, Jesus ta twikire kuverura vaveli.

Jesus ta verura mukadi

Ezuva limwe lyEsabata Jesus ta rongo. Esabata ezuva lyokupwizumuka koVajuda. Mukadi ogu ono kumona apa nga vere sili. Age kwa likutumanene, nokuvhura si kuvyukilira kusikama nomvhura 18. Jesus makura ta mu kambeke mawoko gendi, makura ta sikama kuvyuka. Ta veruka!

Eyi tayi handukisa vampitisili womaukerelikarunga. Gumwe gwawo ta karukire mbunga asi: ‘Pwa kara mazuva gatano-nalimwe omu natu rugana. Momazuva ogo yimo nomu wiza va ya mu verure, kapisi mEsabata!’

Nye Jesus ta limburura asi: ‘Vagara wovadona one. Nkenye gumwe gweni kumangurura sindongi sendi nokusitwara, si ka nwe mema mEsabata. Makura mukadi ogu ga vera nomvhura 18 va pire nye kumuverura mEsabata?’ Elimbururo lyaJesus tali fisa vagara wovadona ava nomuga.

Konyima Jesus novapositoli vendi tava gendi va vyuke koJerusarema. Apa vana siki tupu ponze zositata saJeliko, vatwiku vavali wokuhundagera tava zuvhu asi Jesus kuna kupita popepi. Makura tava zigire asi: ‘Jesus, tu vatera!’

Jesus ta zigire vagara wovatwiku nokuvapura asi: ‘Yinke muna hara nani mu ruganena?’ Awo tava tanta asi: ‘Hompa, mahura meho getu.’ Jesus ta gumu meho gawo, makura poopo tava tameke kumona! Ono diva asi morwasinke Jesus ana ruganene yitetu nayinye eyi yokutetura? Morwa age kwa hara vantu ntani kuna hara asi va kare nepuro mwendi. Kuvhura nye tu divilise asi apa nga pangera ngaHompa, kwato gumwe pevhu ogu nga vera hena.

Mateusa 15:30, 31; Rukasa 13:10-17; Mateusa 20:29-34.



Mapuro

  • Yinke ana kurugana Jesus ngomu ana kugenda mosirongo?
  • Nomvhura ntatu konyima zekuho lyendi, yinke ana tantere Jesus vapositoli vendi?
  • Wolye owo vantu mefano, ntani yinke ana kuruganena Jesus mukadi?
  • Elimbururo lyaJesus kerwaneso lyovampitisili womaukerelikarunga, morwasinke lina va fisire nomuga?
  • Apa vana ya siki Jesus novapositoli vendi pepi naJeliko, yinke ana rugana Jesus kovatwiku vavali wokuhundagera?
  • Morwasinke a ruganene Jesus yitetu?

Mapuro gokugwederera ko

  • Resa Mateusa 15:30, 31.

    Elikido musinke lyewa lyononkondo daJehova lya moneka kupitira mwaJesus, ntani ngapi ngano nail kundama ekwato egano lyetu kweyi ga tumbwidira Jehova kouzuni woupe?

  • Resa Rukasa 13:10-17

    Ngapi usili ou asi Jesus ga rugene yitetu yimwe yoyinene po mEsabata ayi likida rufuwo oru nga ka retera kovantu mosiruwo sEpangero lyoNomumvho Eyovi?

  • Resa Mateusa 20:29-34.

    Ngapi omu asi likida sihorokwa esi asi Jesus narumwe si ga pilire siruwo mokuvatera vantu, ntani yinke natu vhura kulirongera ko kweyi?