Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 91: Jesus ta rongo pondundu

Esimwititi 91: Jesus ta rongo pondundu

TARA Jesus ana hingire apa. Age kuna kuronga vantu navenye ava pondundu moGalireya. Owo vana hingire pepi nage kuna kara varongwa vendi. Age kwa horowere vamwe vawo 12 va kare vapositoli vendi. Vapositoli kuna kara varongwa vaJesus wokulikarera. Wa diva madina gawo ndi?

Jesus kuna kuronga

Pana kara Simoni Peturusa ntani namumbyendi Andiliyasa. Pana kara hena vantu namumbyendi oJakopo naJohanesa. Mupositoli gumwe hena nage kuna kara nedina Jakopo, ntani gumwe hena nage kuna kara Simoni. Vapositoli vavali kuna kara nedina limwe Judasa. Gumwe Judasa Isikalyoto, ano mukwawo kumuzigida asi Judasa ogu ngava tumbwisa kedina Tadeusa. Pana kara hena Filipusa naNatanayera (ogu ngava tumbura hena asi Baratoromeusa), ntani Mateusa naTomasa.

Konyima zokukatengura a tunde koSamaliya, Jesus kwa tamekere kuzuvhisa romuhowo asi: ‘Uhompa weguru pepi una kara.’ Ono diva asi uhompa musinke wene wina? Awo kuna kara epangero lyene-lyene lyaKarunga. Jesus yige hompa gwawo. Age nga pangera kutundilira meguru nokureta mpora pevhu. Uhompa waKarunga ngau rugana evhu nalinye li kare paradisa zoufuuli.

Jesus apa kuna kuronga vantu kuhamena uhompa. Age ta va singonwene asi: ‘Ngesi yimo nomu kanderera: “Guhyetu gemeguru, edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.”’ Vantu wovanzi kutumbura ekanderero eli asi ‘Ekanderero lyaHompa.’ Vamwe kulitumbura asi ‘Guhyetu gemeguru.’ Ove kuvhura kuuyunga ekanderero eli nalinye ndi?

Jesus kuna kuronga hena vantu asi ngapi omu nava litekura-tekura. Age ta tanta asi: ‘Omu ruganene wopeke eyi muna hara nawo va yi mu ruganene.’ Kapi nani o yi hafere nsene wopeke tava ku tekura mombili? Jesus ta tanta nye asi, twa kona kutekura wopeke mombili. Kapi nani ngayi wapa mevhu lyoparadisa apa navenye ngava yi rugana eyi?

Mateusa magaununo 5 dogoro 7; 10:1-4.



Mapuro

  • Mefano, kupi oku ana kurongera Jesus, ntani wolye owo vana hingire pepi nage?
  • Wolye madina govapositoli 12?
  • Yisinke Uhompa ou ana kuzuvhisa Jesus?
  • Yinke ana kuronga Jesus vantu yokukanderera?
  • Yinke ana kuuyunga Jesus kuhamena omu ngano vantu nava litekura-tekura?

Mapuro gokugwederera ko

  • Resa Mateusa 5:1-12.

    Mononkedi musinke natu vhura kulikida asi ose kwa kara nosinka koyihepwa yetu yopampepo?

  • Resa Mateusa 5:21-26.

    Ngapi omu azi nkondopeke Mateusa 5:23, 24 asi elikwatakano lyetu kumwe novanavazinyetu kukundama elikwatakano lyetu naJehova?

  • Resa Mateusa 6:1-8.

    Marupe musinke gamwe gokulimonekesa aga nava nyokera Vakriste?

  • Resa Mateusa 6:25-34.

    Yinke ga rongere Jesus kuhamena hepero zokuhuguvaramwaJehova koyihepwa yetu yopanyama?

  • Resa Mateusa 7:1-11.

    Sifanekeso sosiwa somwaMateusa 7:5, yinke asi tu rongo?