Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 86: Vagara ava za pitisilire mbungururu

Esimwititi 86: Vagara ava za pitisilire mbungururu
Vakonentu

TO MONO mbungururu zokunteinta ezi ana kulika mugara gumwe ogu? Apa va tundire moJerusarema, mbungururu tazi moneka. Vagara ava wokoUpumezuva, ano awo ngava lirongo nombungururu. Awo kuna pura asi mbungururu ezi zompe kuna kuvatwara komuntu gomulyo.

Apa va ka sikire koJerusarema, tava pura asi: ‘Kupi oku ana kara munona ogu nga kara hompa goVajuda?’ “Vajuda” kuna kara edina limwe lyoVaisraeli. Vagara tava tanta asi: ‘Ose kwa monena mbungururu zendi koUpumezuva, yiyo tuna wiza, tu ya mu tongamene.’

Herodesa, hompa gomoJerusarema, apa ana yi zuvhu eyi, ta guwu. Age kapi ga here asi hompa gwapeke a guse evango lyendi. Herodesa makura ta zigida vapristeli wovanene nokuvapura asi: ‘Kupi oku ngava hampurukira hompa ogu va tumbwidira?’ Awo tava limburura asi: ‘Bibeli kwa tanta asi moBeterehema.

Herodesa makura ta zigida vagara wokoUpumezuva, nokutanta asi: ‘Zendeni mu ka papare munona ogo. Nsene muna ka mu gwana, ngomu divise nge ko. Name kuna hara ngani ze ko, ni ka mu tongamene.’ Nye mwene-mwene, Herodesa kwa here kugwana munona nokumudipaga!

Mbungururu tazi piti komeho zawo zi ze koBeterehema, makura tazi ka sikama peguru lyapa ana kara munona. Vagara ava apa vana zi membo, tava gwana Mariya nomunona Jesus. Awo tava reta mauhwi nokugapa Jesus. Nye konyima Jehova ta rondora vagara owo monzodi asi va ha tengura kwaHerodesa. Makura awo tava tengura kosirongo savene nonzira peke.

Herodesa apa ana dimburura asi vagara wokoUpumezuva va tengura nare kembo, ta handuka unene. Ta gava mpangera asi vamati navenye womoBeterehema wonomvhura mbali nokonhi va va dipage. Nye Jehova ta rondora Josefa komeho zosiruwo monzodi, makura Josefa nepata lyendi tava zi koEgipite. Konyima, apa Josefa ga zuvhire asi Herodesa ga fa, ta tengwida oMariya naJesus kembo koNasareta. Oku yiko ana ya kulire Jesus.

Yilye ono kugazara ga ninkisire mbungururu zompe zi teme? Diworoka, konyima zokumona mbungururu, vagara kwa zire koJerusarema. Satana Muzonaguli kwa here kudipaga MunwaKarunga, ano age ga divire asi hompa Herodesa gwaJerusema na hetekera ko kumudipaga. Yipo nye asi mbungururu zina, ntudi Satana yige ga zi ninkisire zi teme.

Mateusa 2:1-23; Mika 5:2.



Mapuro

  • Wolye ava vagara mefano, ntani morwasinke gumwe gwawo ana kulikira kombungururu zokunteinta?
  • Morwasinke ana handukire hompa Herodesa, ntani yinke ana rugana?
  • Mbungururu zokunteinta, kupi oku zina pitisire vagara, nye morwasinke vana tengwilire kosirongo sawo nonzira zapeke?
  • Mpangera musinke ana gava Herodesa, ntani morwasinke?
  • Yinke ana tantere Jehova Josefa yokurugana?
  • Yilye ga ninkisire mbungururu zompe zi teme, ntani morwasinke?

Epuro lyokugwederera ko

  • Resa Mateusa 2:1-23.

    Nomvhura daJesus dingapi da kere ntani kupi oku ga tungire apa vakonentu va ya mu dingwire?