Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 85: Jesus tava mu hampurukire mohambo

Esimwititi 85: Jesus tava mu hampurukire mohambo

ONO diva asi yilye ogu mukeke? Yimo, yige Jesus. Age ntani vana kumuhampurukira mohambo. Hambo kuna kara evango omu ava tura yimuna. Mariya kuna rangeke Jesus mekungu, sininke esi ava tura nondya doyindongi noyimuna peke. Nye morwasinke oMariya naJosefa vana karere omu noyikorama? Eli kapisi evango lyokuhampurukira munona, ndi ngapi?

Hawe, kapisi evango lyokuhampurukira. Nye eyi va karerere omu kuna kara eyi: Hompa gwaRoma Augusitusi kwa tulire po veta asi nkenye gumwe ga kona kutengura kositata oku va mu hampurukira yipo a ka litjangese mobuke. Josefa kwa mu hampurukilire omu moBeterehema. Nye apa ga ya sikire naMariya, kwato oku va gwene evango. Yipo nye va wizire omu moyikorama. Mezuva lyeeli yipo ana hampuruka Mariya Jesus! Nye, ngomu ono kumumona, age gwandjewa-ndjewa.

Josefa, Mariya ntani mukeke Jesus

To mono vasita ava vana kuwiza va ya tare Jesus? Awo kwa kere mezana masiku, tava lisa nonzwi dawo, makura site sosizera unene tasi tema si va kundurukide. Aso kwa kere muengeli! Vasita kwa tukukire unene. Nye muengeli ta tanta asi: ‘Mwa ha tjira! Ame kuna mu retere mbudi zongwa. Naina vana mu hampurukire Kristusa, Hompa, moBeterehema. Age nga yoworora vantu! Nomu ka mu gwana vana mu dingire pomakehe, yiyo vana mu rangeke mekungu.’ Haruka tupu, vaengeli wovanzi tava wiza nokutanga Karunga. Poopo vasita ava tava genderere va ka tare Jesus, makura ngesi vana ya mu gwana.

Ono diva asi morwasinke Jesus ga likarerere ngoso? Ono diva asi yige yilye nawa-nawa? Diworoka, mesimwititi lyomuhowo mobuke ezi ose kwa simwitira mo kuhamena Mbeli zaKarunga. Mbeli ezi kwa rugene naJehova mokusita eguru nevhu ntani nanayinye yapeke. Ogu yige nye Jesus!

Yimo, Jehova kwa gusire eparu lyaMunwendi meguru nokulitura monda zaMariya. Poopo mukeke makura ta tameke kukura monda zendi, ngomu tupu ava kuru vakeke navenye monda zozinyawo. Nye mukeke ogu kwa kere MunwaKarunga. Mouhura Jesus tava ya mu hampurukire mohambo moBeterehema. To mono nye asi morwasinke va hafererere unene vaengeli mokuvhura kutantera vantu asi Jesus vana mu hampuruka?

Rukasa 2:1-20.



Mapuro

  • Yilye ogu mukeke mefano, ntani kupi oku ana kumurangeka Mariya?
  • Morwasinke va mu hampurukilire Jesus mohambo kumwe noyikorama?
  • Mefano, wolye owo vagara vana kuhwilira mohambo, ntani yinke ga va tanterere muengeli?
  • Morwasinke Jesus ga likarerere?
  • Morwasinke kuvhura kumutumbura Jesus asi MunwaKarunga?

Mapuro gokugwederera ko

  • Resa Rukasa 2:1-20.

    Ruha musinke ga kere naro hompa Augusitusi mesikiliromo lyouporofete kuhamena ehampuruko lyaJesus?

    Ngapi na vhura muntu kuhamena mo mwava ava tumbura asi ‘kwa va hara Karunga’?

    Nsene si vasita wokulinunupika womoJudeya va hafere kehampuruko lyoMuzowoli, konda musinke zonene zoruhafo vana kara nazo vakareli vaKarunga naina?