Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 73: Hompa gwaIsraeli gomuwa gokuhulilira

Esimwititi 73: Hompa gwaIsraeli gomuwa gokuhulilira

JOSIYA apa ana zi mouhompa womazimo gavali gaIsraeli gokoMbindakano age nomvhura dendi ntantatu tupu. Ado nonunu unene mokuninka muntu a kare hompa. Makura petameko vakurona vamwe tava mu vatere mokupangera muhoko.

Josiya apa ga kere hompa nomvhura ntambali, ta tameke kupapara Jehova. Age ta kwama sihonena sovahompa wovawa ngwendi Ndafita naJehosafata ntani naHisikiya. Makura apa ana kara age simpe mudinkantu, Josiya ta rugana sininke simwe soupenda.

Hompa Josiya novantu vendi kuna kutavagura yifano yoyikarunga

Vaisraeli wovanzi kwa kere vadona unene siruwo sosire. Awo ngava kanderere vakarunga woyimpempa. Ngava tongamene mafano goyikarunga. Josiya makura ta zi novantu vendi nokutameka kugusa mosirongo ukarelikarunga woyimpempa. Eyi yirugana yoyidigu, morwa vantu wovanzi kukanderera vakarunga woyimpempa. Apa to mono Josiya novantu vendi vana kutavagura yifano yoyikarunga.

Konyima zeyi, Josiya ta pe vagara vatatu situmbukiro sokuwapukurura ntembeli zaJehova. Vantu tava pongaike yimaliva nokuyipa vagara ava va fute yirugana eyi vana kurugana. Posiruwo oso vana kurugana montembeli, mupristeli gomunene Hilikiya ta gwana mo sininke simwe sa kara nomulyo gomunene. Azo buke zoveta ezi Jehova ga ninkire Mosesa a zi tjange siruwo sosire unene sa ka pita. Azo kwa zumbanene nomvhura dononzi.

Buke tava zi twara kwaJosiya, makura age ta pura va zi mu resere. Mokuzipurakena, Josiya ta mono asi vantu kapi vana kulimburukwa koveta zaJehova. Eyi tayi mu guvisa unene sili, makura ta taura yikoverero yendi, ngomu ono kuyimona apa. Ta tanta asi: ‘Jehova ana tu handukire, morwa ozinyakurwetu kapi va limburukwire konoveta edi va tjanga mobuke ezi.’

Safani nahompa Josiya

Josiya ta pangere mupristeli gomunene Hilikiya a ka pulide asi Jehova yinke nga va rugana. Hilikiya ta zi komukadi gomuporofete gedina Hulida nokukamupura. Hulida ta mu pe mbudi ezi zokutunda kwaJehova a zi tengwide kwaJosiya: ‘Jerusarema novantu navenye ngava va tengeka morwa awo kwa karera vakarunga woyimpempa ntani sirongo kwa si zwida noudona. Nye morwa ove Josiya kwa rugana uwa, etengeko eli kapi ngali wiza dogoro konyima zonomfa doge.’

2 Histoli 34:1-28.



Mapuro

  • Nomvhura daJosiya dingapi da kara apa ana zi mouhompa, ntani yinke ana tameke kurugana apa ana kara hompa monomvhura ntambali?
  • Yinke ono kumona ana kurugana Josiya mefano lyomuhowo?
  • Yinke ana gwana mupristeli gomunene apa vagara vana kuwapukurura ntembeli?
  • Morwasinke ana kutawira Josiya yikoverero yendi?
  • Mbudi musinke zokutunda kwaJehova ana kugava muporofete gomukadi Hulida kwaJosiya?

Mapuro gokugwederera ko

  • Resa 2 Histoli 34:1-28.

    Sihonena musinke ana gava Josiya kowo va vhura kulididimikira erero lyedigu?

    Nontambo musinke domulyo ga gusire Josiya pokutwara komeho ukereli wousili posiruwo sonomvhura 8, no-12, ntani no-18 depangero lyendi?

    Yirongwa musinke yepakerosinka lyomavega getu goukereli natu vhura kulirongera ko koyihonena eyi va tulire po ohompa Josiya ntani nomupristeli gomunene Hilikiya?