Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 67: Jehosafata ta huguvara Jehova

Esimwititi 67: Jehosafata ta huguvara Jehova

ONO diva asi wolye vagara ava neyi vana kurugana ndi? Awo kuna kuza koyita, ano vagara ava vana kara komeho kuna kudimba. Nampo to lipura asi: ‘Morwasinke vadimbi vana pilire nomfuro nonomukove dokukarwanesa?’ Tu tareni.

Vaisraeli kuna kuza koyita

Jehosafata yige hompa gouhompa womazimo gavali gaIsraeli. Age kuna kuparuka posiruwo simwe tupu kumwe nahompa Ahaba naJesebeli wouhompa woMuzogo-zogo womazimo 10. Nye Jehosafata age hompa gomuwa, ano oguhwe Asa nawo kwa kere hompa gomuwa. Yipo nye konomvhura dononzi vantu wouhompa wokoMbindakano womazimo gavali kwa haferere eparu lyewa.

Nye ngesi tasi horoka sininke simwe esi sa tjilisire vantu. Nontumi tadi ya tantere Jehosafata asi: ‘Mbunga zonene zovakwayita wokoyirongo yaMowaba naAmoni ntani nokonondundu daEdomu kuna kuwiza va ya ku rwise.’ Vaisraeli wovanzi tava pongo poJerusarema va ya hundire ekwafo lyaJehova. Tava zi kontembeli, ano Jehosafata makura ta kanderere asi: ‘Jehova Karunga gwetu, ose kapi tuna diva eyi natu rugana. Ose kapi tatu tompora yuma komeho zombunga zonene ngesi zovakwayita. Nyove tuna tara o tu kwafe.’

Jehova ta purakene, makura ta ninki mukareli gwendi gumwe a tantere vantu asi: ‘Yirwa yaKarunga, kapisi yeni. Yita eyi kapisi nyone wokuyirwa. Ka tarereni tupu, ngomu mone asi ngapi omu Jehova nga mu zowora.’

Ezuva lyokukwama ko Jehosafata makura ta tantere vantu asi: ‘Huguvareni mwaJehova!’ Makura ta tura vadimbi komeho zovakwayita vendi, ano ngomu vana kugenda tava dimbire Jehova mahamberero. Ono diva asi yinke yina kuhoroka apa vana ya siki pepi nomarwiro? Jehova ta ninki vakwayita wononkore va lirwise nyamwawo. Ano Vaisraeli apa vana ya siki, vakwayita wononkore navenye vana fu!

Nani Jehosafata kapi ga kotokere mokutura ehuguvaro lyendi mwaJehova? Nose tatu kara vakotoki nsene tu Mu huguvara.

1 Vahompa 22:41-53; 2 Histoli 20:1-30.


Mapuro

  • Yilye Jehosafata, ntani posiruwo musinke ana kuparuka?
  • Morwasinke vana karere Vaisraeli noutjirwe, ntani yinke vana rugana sinzi sawo?
  • Elimbururo musinke ana gava Jehova kekanderero lyaJehosafata?
  • Yinke ana ninki Jehova yi horoke komeho zoyita?
  • Sirongwa musinke natu vhura kulirongera ko kwaJehosafata?

Mapuro gokugwederera ko

  • Resa 2 Histoli 20:1-30.

    Ngapi omu ga likidire Jehosafata eyi va hepa kurugana vakareli wovalimburukwi vaKarunga apa ava ligwanekere nomaukaro gokutjilisa?

    Moomu Jehova narunye nga ruganesa ngendeseso zokuuyunga novantu vendi, ngendeseso musinke ana kuruganesa naina?

    Apa nga tameka Karunga “yita mezuva olyo lyenene lyaKarunga Munankondo,” ngapi omu mukaro gwetu ngagu lifana nogu gwaJehosafata?

    Mokuhonena Varevhi, sigava musinke ava tura po vapioniri novatumwa naina kezuvhiso lyouzuni mudima?