Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 66: Jesebeli--Hompakadi gomudona

Esimwititi 66: Jesebeli--Hompakadi gomudona

KONYIMA zonomfa dahompa Jerobiyamu, nkenye hompa ogu ana kupangera uhompa wokomuzogo-zogo womazimo 10 gaIsraeli kuna kara gomudona. Mwanavenye ogu ana pitakanene po moudona kuna kara hompa Ahaba. Ono diva asi morwasinke? Konda zimwe zonene kuna kara mukadendi, hompakadi Jesebeli gomudona.

Jesebeli kapisi mukadi goMuisraeli. Age munakadi gwahompa gwaSidoni. Age kukanderera karunga goyimpempa Bara, ntani ta ninki Ahaba noVaisraeli hena wovanzi nawo va kanderere Bara. Jesebeli kwa nyenga Jehova ntani ta dipaga vaporofete vendi wovanzi. Vamwe tava vanda momakombombo yipo asi va ha va dipaga. Jesebeli nsene ana hara yuma, age nampili kudipaga muntu, nawa tupu yipo a yi gwane.

Ezuva limwe hompa Ahaba ta guwu unene. Jesebeli makura ta mu pura asi: ‘Morwasinke ono guvire naina?’

Ahaba ta limburura asi: ‘Morwa yeeyi ana limburura nge Nabota. Ame kani hara kuranda sikunino sendi soyindjembere. Nye age yiyo ana tantere nge asi nokuvhura si a si pe nge.’

Jesebeli ta tanta asi: ‘Wa ha lipakera sinka. Nani si ku gwanena ame.’

Jesebeli makura ta tjangere nombilive masimbi gomositata oso ga kara Nabota. Age ta va tantere asi: ‘Gwaneni vagara vavali wokupira mulyo va tante asi Nabota ga tuka Karunga ntani nahompa. Makura tomu pwagesa Nabota ponze zositata nokukamudipaga nomamanya.’

Jesebeli tupu ana zuvhu asi Nabota ana fu, ta tantere Ahaba asi: ‘Zende nye o ka guse sikunino sendi soyindjembere.’ Kapi ono kuyikwatesa ko asi Jesebeli va kona kumutengeka koyininke yoyidona oyo?

Hompakadi Jesebeli

Sa pita po siruwo, Jehova makura ta tumu mugara gedina Jehu a ya tengeke Jesebeli. Jesebeli apa ana zuvhu asi Jehu ta wiza, ta likwita ndombo komeho gendi nokuliwapaika a moneke ufuuli. Nye Jehu apa ana wiza nokumona Jesebeli pekende, ta zigire vagara womombara asi: ‘Mu zugumineni pevhu!’ Vagara tava limburukwa, ngomu ono kuyimona mefano. Tava mu zuguma, makura ta fu. Ou yiwo uhura wahompakadi Jesebeli gomudona.

1 Vahompa 16:29-33; 18:1-4; 21:1-16; 2 Vahompa 9:30-37.



Mapuro

  • Yilye Jesebeli?
  • Morwasinke ana guvire hompa Ahaba ezuva limwe?
  • Yinke ana rugana Jesebeli mokugusira yendi Ahaba sikunino soyindjembere saNabota?
  • Yilye ana tumu Jehova mokukatengeka Jesebeli?
  • Moomu ono kumona mefano, yinke yina horoka apa Jehu ana ya siki mombara zaJesebeli?

Mapuro gokugwederera ko

  • Resa 1 Vahompa 16:29-33 ntani 18:3, 4.

    Ngapi omu da donapere nomukaro moIsraeli mosiruwo sepangero lyahompa Ahaba?

  • Resa 1 Vahompa 21:1-16.

    Ngapi omu ga likidire Nabota upampi ntani noulimburukwi kwaJehova?

    Kosihonena saAhaba, yinke natu vhura kulirongera ko kuhamena kutuyipira yininke?

  • Resa 2 Vahompa 9:30-37.

    Yinke natu vhura kulirongera ko koupampi waJehu mokurugana mpango zaJehova?