Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 61: Ndafita tava mu tura hompa

Esimwititi 61: Ndafita tava mu tura hompa

SAURU ta heteke hena kukwata Ndafita. Ta gusa vakwayita vendi wovazuni po 3 000 nokuza va ka mu papare. Ndafita apa ana yi zuvhu eyi, ta tumu nondadi di ka tare asi kupi ko ana ku rarera Sauru novakwayita vendi masiku ogo. Ndafita makura ta pura vakwayita vendi vavali asi: ‘Pokatji keni yilye ana kuza name kokamba zaSauru?’

Ndafita kuna kuzigida Sauru

Abisayi ta limburura asi: ‘Nyame.’ Abisayi kuna kara munwaSeruya, mukurwaNdafita gomukadi. Siruwo oso vana rara oSauru novakwayita vendi, oNdafita naAbisayi tava hondjavere mokamba. Tava damuna po egonga lyaSauru nokavaza kendi komema aka kana kara komutwe gwaSauru. Kwato ogu ana kuvazuvha ndi a va mone morwa navenye vana ponyoka.

Tara oNdafita naAbisayi apa. Vana litundire mo mokamba, yiyo vana ka lisikira keguru lyondundu. Ndafita ta zigire pevhu komukurona govakwayita vaIsraeli asi: ‘Abineli, eyi ono dilire kukunga hekuroge hompa yinke? Tareni si! Egonga lyendi nokavaza kendi komema kupi?’

Sauru ta pinduka. Ta dimburura ezwi lyaNdafita, makura ta pura asi: ‘Nyove Ndafita ndi?’ To mono oSauru naAbineli oku konhi?

Ndafita ta limburura Sauru asi: ‘Nyame ogu hompa.’ Ndafita makurata pura asi: ‘Eyi ono kutjida-tjidira nge yinke? Yinke nani eyi na zona? Egonga lyoge lyeli, hompa. Tuma muntu goge gumwe a ya li hare.’

Hompa Sauru naAbineli

Sauru ta yi tambura asi: ‘Ame nina rugana yoyidona. Ame egova kani kere.’ Kutunda opo Ndafita ta zi nzira zendi, ano Sauru ta tengura kembo. Nye Ndafita ta liuyungire asi: ‘Sauru nga dipaga nge ezuva limwe. Na kona kudukira kosirongo soVafilisiti ntani.’ Ano eyi yiyo ana rugana. Ndafita ya mu vhulikire mokukumbagera Vafilisiti va mu pure asi age ana hama koruha rwawo.

Apa sa pitire po siruwo, Vafilisiti tava zi va ka rwise Israeli. Sauru naJonatana kwa ka va dipagere moyita oyo. Eyi tayi guvisa Ndafita unene, makura ta tjanga rusumo roruwa, omu ana kudimba asi: ‘Ame kuna guwu moroge Jonatana. O muwa unene wa kere kwange!’

Konyima zeyi Ndafita ta tengura koIsraeli kositata saHeburoni. Yita tayi sikama pokatji kovantu ava va horowere munwaSauru Isiboseti asi a kare hompa, novantu ava va horowere Ndafita a kare hompa. Nye moruhura vantu vaNdafita tava fundu. Ndafita apa va mu tulire mouhompa age ana kara nonomvhura 30. Age ta pangere moHeburoni nomvhura ntambali noukahe. Vana wovagara vamwe ava va mu reterere mo kwa kere Amunoni naAbisaromo ntani naAdoniya.

Siruwo tasi wiza apa Ndafita novantu vendi vana zi va ka kwate sitata sosifuuli ava tumbura asi Jerusarema. Jowabu, munwagumwe hena gwaSeruya, mukurwaNdafita gomukadi, yige gokupitisira moyita. Ndafita ta pe Jowabu mfeto zokumuninka a kare mukurona govakwayita vendi. Ndafita yipo nye ngesi ta tameke kupangera mositata saJerusarema.

1 Samwere 26:1-25; 27:1-7; 31:1-6; 2 Samwere 1:26; 3:1-21; 5:1-10; 1 Histoli 11:1-9.



Mapuro

  • Yinke va rugene oNdafita naAbisayi siruwo esi ga rere Sauru mokamba zendi?
  • Mapuro musinke ana kupura Ndafita Sauru?
  • Konyima zokusiga Sauru, kupi ana zi Ndafita?
  • Yinke yina guvisa Ndafita unene yipo a tjange rusumo roruwa?
  • Nomvhura daNdafita dingapi da kara apa vana mu tura a kare hompa moHeburoni, ntani wolye madina govana vendi vamwe?
  • Konyima zosiruwo, kupi oku ana ka pangera Ndafita ngohompa?

Mapuro gokugwederera ko

  • Resa 1 Samwere 26:1-25.

    Nonkango daNdafita domwa-1 Samwere 26:11, nkareso musinke adi horora kuhamena ngendeseso zaJehova?

    Apa atu litura mo unene mokulikida nkenda nye kuligwanekera nediro rupandu, nonkango daNdafita domwa-1 Samwere 26:23 ngapi omu nadi vhura kutuvatera mokukara nonkareso zongwa?

  • Resa 2 Samwere 1:26.

    Ngapi omu nava vhura Vakriste naina kutunga po ‘eharo lyenene’ ngalyeeli va kere nalyo oNdafita naJonatana?

  • Resa 2 Samwere 5:1-10.

    Nomvhura dingapi ga kere Ndafita hompa, ntani siruwo esi ngapi omu va si gawinine?

    Unene waNdafita yinke ya u retesere po, ntani ngapi omu ya kara eyi ediworokeso kwetu naina?