Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 55: Kamatigona taka karere Karunga

Esimwititi 55: Kamatigona taka karere Karunga

NANI kapisi kamati kokawa aka? Edina lyako Samwere. Ano mugara ogo ana tura kuwoko kwendi pomutwe gwaSamwere kuna kara mupristeli gomunene gwaIsraeli Eli. Owo oguhwe va Samwere Elikana nozina Hana vana kureta Samwere kwaEli.

Samwere nomupristeli gomunene Eli

Samwere kuna kara nonomvhura tupu ne ndi ntano. Nye age ta ya tungu apa ponkongoronzugo zaJehova kumwe naEli ntani novapristeli hena peke. Morwasinke oElikana naHana vana kugavera Samwere gomunona ngosina a karere Jehova ponkongoronzugo? Tu tareni si.

Nomvhura tupu dongandi komeho zeyi Hana kwa guvire sili unene. Konda kuna kara asi age kapi nga reta vana, ano age kwa here unene-nene kugwana muna. Ezuva limwe apa Hana ga ka dingwire nkongoronzugo zaJehova, ta kanderere asi: ‘Jehova, wa ha divara nge! Nsene o pa nge muna gomugara, tani ku tumbwidire asi, ngani mu ku pongwera ukaro wendi naunye.’

Jehova kwa limbwilire ekanderero lyaHana, ano konyima zomakwedi ta hampuruka Samwere. Hana kwa here mukeke gwendi gomumati, makura ta mu rongo kuhamena Jehova apa ga kere age simpe musesu-sesu. Age kwa tanterere mugara gwendi asi: ‘Nsene Samwere nga tova, ngani mu twara konkongoronzugo a ka karere Jehova.’

Eyi yiyo tuna kumona vana kurugana oHana naElikana mefano. Samwere kuna hafa mokuyakarera Jehova motenta zendi, morwa vakurona vendi kwa mu rongere nawa. Nkenye mvhura oHana naElikana tava zi va ka tongamene kotenta ezi zokulikarera, nokuyadingura mumatigona gwawo. Ntani hena nkenye mvhura Hana ta reta erwakani eli ga ruganenene Samwere.

Ngomu da pitire nomvhura, Samwere ta twikire kukarera Jehova monkongoronzugo, ano Jehova ntani novantu tava mu hara. Nye vana wovagara womupristeli gomunene Eli, oHofini naPinehasa, kapisi vantu wovawa. Awo kurugana yininke yoyidona yoyinzi, ntani kuninka wopekenawo va nyoke Jehova. Eli ngano kwa va gusire ko kokukara vapristeli, nye age kapi ga va gusire ko.

Munona Samwere kapi ana kutarerera asi yininke yoyidona eyi yina kuhoroka ponkongoronzugo yi mu hagekese kukarera Jehova. Nye morwa vantu wovasesu tupu vana hara Jehova nawa-nawa, mosiruwo sosire Jehova kapi ga uyungire nomuntu nampili gumwe googu. Samwere apa ana kuru ko, eyi yiyo yina horoka:

Samwere kuna rara monkongoronzugo apa lina mu pindura ezwi. Age ta limburura asi: ‘Nyame ogu.’ Ta duka a ze kwaEli, ta tanta asi: ‘Nyame ogu, ogu muna zigida.’

Nye Eli ta limburura asi: ‘Kapi nina ku zigida ame, zende o ka rare.’ Samwere makura ta tengura a ka rare.

Ezigido lyauvali makura tali horoka hena: ‘Samwere!’ Samwere makura ta duka hena kwaEli. Ta tanta asi: ‘Nyame ogu, ogu muna zigida.’ Nye Eli ta limburura asi: ‘Mumati gwange, kapi nina ku zigida ame; zende o ka rare.’ Samwere makura ta zi hena a ka rare.

Ezwi tali zigida rwautatu asi: ‘Samwere!’ Samwere makura ta duka kwaEli. Ta tanta asi: ‘Nyame ogu, morwa nina si huguvara asi sikando esi nyone muna zigida nge.’ Eli makura ta diva nye asi ntudi Jehova ana kumuzigida. Ta tantere Samwere asi: ‘Zende o ka rare; nye nsene na ka ku zigida hena, ka limburure asi: “Uyunga, Jehova, mukereli goge ta zuvhu.” ’

Eyi yiyo ana tanta Samwere apa Jehova ana mu zigida hena. Jehova ta tantere Samwere asi ta ka tengeka oEli novana vendi wovagara. Konyima oHofini naPinehasa tava fu moyita noVafilisiti, ano Eli apa ga zuvhire eyi ya horokere ta liganda, nokuteka nsingo makura nage ta fu. Nonkango daJehova makura tadi siki mo.

Samwere ta kuru, ta kara mupanguli gwaIsraeli gokuhulilira. Apa ana kurupa, vantu tava mu pura asi: ‘Tu tulira mo hompa a tu pangere.’ Samwere kapi ana hara kuyirugana eyi, morwa mousili Jehova yige hompa gwawo. Nye Jehova ta mu tantere a purakene kovantu.

1 Samwere 1:1-28; 2:11-36; 4:16-18; 8:4-9.



Mapuro

  • Yilye edina lyokamatigona mefano, ntani wolye owo wopeke?
  • Ekanderero musinke ana kuuyunga Hana ezuva limwe apa ana ka dingura nkongoronzugo zaJehova, ntani ngapi omu ana mu limburura Jehova?
  • Nomvhura daSamwere dingapi da kara apa vana mu twara mokukakerera potenta zaJehova, ntani yinke ava mu ruganene ozina nkenye mvhura?
  • Wolye madina govana vaEli, ntani awo vantu musinke?
  • Ngapi omu ana zigida Jehova Samwere, ntani mbudi musinke ana mu pe?
  • Yinke ana ya kara Samwere apa ana ya kuru, ntani yinke yina horoka apa ana kurupa?

Mapuro gokugwederera ko

  • Resa 1 Samwere 1:1-28.

    Sihonena musinke sosiwa ana gava Elikana kovanturogumbo mokugusa epitisiro moukereli wousili?

    Yinke natu vhura kulirongera ko kosihonena saHana mokukohonona po udigu wokupiyaganesa?

  • Resa 1 Samwere 2:11-36.

    Ngapi omu ga fumadekere Eli vana vendi kupitakana Jehova, ntani ngapi omu eyi nayi vhura kukara ngerondoro kwetu?

  • Resa 1 Samwere 4:16-18.

    Nombudi musinke ne dehudi da tundilire momarwiro, ntani ngapi omu dina kundama Eli?

  • Resa 1 Samwere 8:4-9.

    Ngapi omu za handukisire Israeli Jehova unene, ntani ngapi omu natu vhura kukwatesa ko Uhompa wendi naina?