Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 54: Mugara gononkondo unene

Esimwititi 54: Mugara gononkondo unene

WA DIVA edina lyomugara gononkondo unene ogu ga parukire ndi? Age mupanguli gedina Simisoni. Jehova ta pe Simisoni nonkondo dendi. Nokomeho age Simisoni simpe va hana kumureta, Jehova ta tantere ozina asi: ‘Ntaantani o kare nomunona gomugara. Age nga pitisira mokuyoworora Israeli koVafilisiti.’

Simisoni kuna kurwa nanyime

Vafilisiti vantu wovadona ava va tunga moKanani. Awo kwa kara novakwayita wovanzi, kuhepeka sili Vaisraeli. Sikando simwe, age Simisoni kuna kuvyuka oku va tunga Vafilisiti, emunyime lyemunene tali di mu vyuka oku tali nungu. Nye Simisoni ta dipaga nyime nomawoko gendi. Age ta dipaga hena Vafilisiti wovadona mafere.

Konyima Simisoni ta hara mukadi gedina Delira. VampitisiliwoVafilisiti tava tumbwidire asi nkenye gumwe gwawo ta pe Delira yimaliva yosisiliveli 1 100 nsene na va tantera asi yisinke ayi pe Simisoni nonkondo dendi. Delira ta hara yimaliva nayinye yina. Age kapisi kaume gwaSimisoni nawa-nawa, ndi govantu vaKarunga. Makura ta sipangeda kupura Simisoni asi yisinke ayi mu ninkisa a kare ngoso nononkondo.

Delira naSimisoni

Mouhura, Simisoni makura ta tantere Delira sihoramo sononkondo dendi. Ta tanta asi: ‘Nohuki dange kapi va di kurura rumwe. Kutunda apa va reta nge, Karunga kwa horowora nge ni kare mukareli gwendi gokulikarera ava tumbura asi muNasili. Nsene va kurura nohuki dange, tani zumbanesa nonkondo dange.’

Delira apa ana yi zuvhu eyi, ta rangeke Simisoni pomatungi gendi a ponyoke. Makura ta zigida mugara gumwe a wize nokuyakurura nohuki dendi. Simisoni apa ana pinduka, ana zumbanesa nonkondo dendi. Vafilisiti makura tava wiza va mu kwate. Awo tava mu twiza meho gendi nagenye, makura tava mu ninki a kare mupika gwawo.

Simisoni kuna kuganda nongudi

Ezuva limwe Vafilisiti tava kara nosipito sosinene sokukanderera karunga gwawo Dagoni, makura tava pwagesa Simisoni modorongo va ya mu swaure. Posiruwo oso, nohuki daSimisoni ado dina kuru hena. Simisoni makura ta tantere mumati ogu ana kumugendesa asi: ‘Siga nge, ni papatere edi nongundi da kwata nzugo.’ Simisoni ta kanderere kwaJehova a mu pe nonkondo, makura ta kwata nongundi. Makura ta zigire asi: ‘Siga nge, ni fe noVafilisiti.’ Posipito kuna kara po Vafilisiti 3 000, ano Simisoni apa ta litonya unene a sindike nongundi, etungo makura tali gu nokudipaga vantu navenye ava wovadona.

Vapanguli magaununo 13 dogoro 16.



Mapuro

  • Yilye edina lyomugara gononkondo unene ogu ga parukire, ntani yilye ga mu pere nonkondo dendi?
  • Posikando simwe, yinke ana rugana Simisoni kemunyime lyemunene, moomu ono kuyimona mefano?
  • Sihoramo musinke ana kutantera Simisoni Delira mefano, ntani ngapi ya mu twaredesere va ka mu kwate Vafilisiti?
  • Ngapi omu ana retere Simisoni nomfa doVafilisiti 3 000 mezuva eli ana fu?

Mapuro gokugwederera ko

  • Resa Vapanguli 13:1-14.

    Ngapi omu oManowa namukadendi va gava sihonena sosiwa kovakurona mokurera vana vawo?

  • Resa Vapanguli 14:5-9 ntani 15:9-16.

    Yihorokwa yaSimisoni yokudipaga nyime, nokundembagura nongodi donompe edi va mu menge, ntani nokuruganesa rupanda rosindongili mokudipaga vagara 1 000, yinke ayi horora kuhamena ngendeseso zompepo zokupongoka zaJehova?

    Ngapi omu mpepo zokupongoka azi tu vatere naina?

  • Resa Vapanguli 16:18-31.

    Ukwawo woudona, ngapi omu wa kundamene Simisoni, ntani yinke natu vhura kulirongera ko kweyi?