Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 53: Etumbwidiro lyaJefuta

Esimwititi 53: Etumbwidiro lyaJefuta
MunwaJefuta gomukadi

OVE wa tura po rumwe etumbwidiro makura konyima to ya yi mono asi udigu kulisikisa mo ndi? Mugara ogu ana kara mefano kwa tumbwidilire, yiyo ana guvire ngesi unene. Mugara kuna kara mupanguli gwaIsraeli gependa gedina Jefuta.

Jefuta kuna paruka posiruwo esi Vaisraeli vana kupira hena kukarera Jehova. Awo kuna kurugana hena yininke yoyidona. Jehova yipo ana pulisire vaAmoni va va hepeke. Eyi tayi ninkisa Vaisraeli va kuge kwaJehova asi: ‘Ose kwa zona koge. Tu parura!’

Jefuta novagara vendi

Vantu tava livere koyininke yoyidona eyi va zonene. Awo tava likida asi kuna kulivera mokukarera Jehova hena. Ano Jehova makura ta va vatere hena.

Vantu tava horowora Jefuta a ka rwanese Vaamoni wovadona. Jefuta kuna hara unene asi Jehova a mu vatere moyita oyo. Makura ta tumbwidire Jehova asi: ‘Nsene ngo pa nge efundo koVaamoni, ame ngani ku pa nkenye muntu ogu nga hova kupwaga membo lyange a simbagwire nge apa ngani ka tunda kefundo.’

Jehova ta purakene ketumbwidiro lyaJefuta, makura ta mu vatere mokufunda. Ono diva asi yilye ogu ana howo kupwaga a simbagwire Jefuta apa ana ka tengura kembo? Munwendi gomukadi, ogu ga kere empogwe lyendi. Jefuta makura ta lili asi: ‘Ani nane munwangiee! Ee, eguwo musi onokuretera nge. Nye ame kwa tumbwidira Jehova, ano kapi tani vhuru kulitengwida.’

MunwaJefuta apa ana zuvhu etumbwidiro lyoguhwe, pomuhowo nage ta guwu. Morwa ayo kutanta asi age ga kona kusiga oguhwe novakaume vendi. Nye age ta ka karera Jehova eparu lyendi nalinye konkongoronzugo zendi poSiro. Makura ta tantere oguhwe asi: ‘Nsene asi kwa tumbwidira Jehova, mwa kona kuyisikisa mo.’

MunwaJefuta yipo nye ana zi koSiro, ta ka kara ko ure weparu lyendi nalinye mokukarera Jehova ponkongoronzugo zendi. Mwankenye mvhura vakadi womoIsraeli kuza va ka mu tarere po mazuva gane, nokukahafa kumwe. Vantu kwa hara munwaJefuta morwa age mukareli gwaJehova gomuwa.

Vapanguli 10:6-18; 11:1-40.



Mapuro

  • Yilye Jefuta, ntani posiruwo musinke ga parukire?
  • Etumbwidiro musinke ana kutura po Jefuta kwaJehova?
  • Morwasinke ana guvire Jefuta apa ana ka tengura kembo kefundo lyoVaamoni?
  • Yinke ana uyunga munwaJefuta apa ana zuvhu etumbwidiro lyoguhwe?
  • Morwasinke va harera vantu munwaJefuta?

Mapuro gokugwederera ko

  • Resa Vapanguli 10:6-18.

    Erondoro musinke natu tambura kosilikido saIsraeli sokudira kulimburukwa kwaJehova?

  • Resa Vapanguli 11:1-11, 29-40.

    Ngapi omu twa yi diva asi Jefuta pokugava munwendi ‘ngonzambo zeswakerero’ kapi ya tente asi kumuswakerera momundiro?

    Monkedi musinke ga geve Jefuta munwendi ngonzambo?

    Yinke natu vhura kulirongera ko konkareso zaJefuta komugano gwendi kwaJehova?

    Ngapi omu ga kara munwaJefuta sihonena sosiwa kovadinkantu woVakriste mokukondjera meho zoyirugana yokukarera Karunga siruwo nasinye?