Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 50: Vakadi vavali womapenda

Esimwititi 50: Vakadi vavali womapenda

VAISRAELI apa va zire moudigu, tava kugu kwaJehova. Jehova ta va limburura mokuvapa vampitisili wononkondo va va vatere. Bibeli kutumbura vampitisili ava asi vapanguli. Josuwa yige ga kere mupanguli gokuhova, ano vapanguli vamwe ava va mu kweme kwa kere nomadina Otiniyeli naEhudu naSamugara. Nye vantu vavali ava va vaterere Israeli kuna kara vakadi womadina Debora naJayeli.

Debora kuna kuuyunga naBaraka

Debora muporofete gomukadi. Jehova kumupa mapukururo gokuhamena meho, ano age ta tantere vantu eyi ana tanta Jehova. Debora nage mupanguli. Age kuhingira mongone mosirongo sonondundu, ano vantu kuwiza kwendi va ya gwane evatero komaudigu gawo.

Posiruwo esi Jabini yige hompa gwaKanani. Age kwa kara noturukara toyita 900. Vakwayita vendi nonkondo sili, Vaisraeli wovanzi kuna kuvasininika va kare vakareli vaJabini. Sisera yige mupitisili govakwayita vahompa Jabini.

Ezuva limwe Debora ta tumine mupanguli Baraka, nokumutantera asi: ‘Jehova kuna tanta asi: “Gusa vagara 10 000 o ze nawo kondundu zaTaboro. Okwina yiko nani ka ku retera Sisera. Ano ame tani ka ku pa efundo kwendi novakwayita vendi.” ’

Baraka ta tantere Debora asi: ‘Ame nani za nsene nove no za name.’ Debora ta zi nage, nye ta tantere Baraka asi: ‘Ove kapi no ka gwana efumano lyefundo, morwa Jehova ta ka gava Sisera momawoko gomukadi.’ Ano eyi yiyo ya horokere.

Baraka ta kunkumuka kondundu zaTaboro a ka gwanekere novakwayita vaSisera. Haruka tupu, Jehova ta reta ruhanzo, ano vakwayita wononkore wovanzi tava fu komema. Nye Sisera ta humburuka kokarukara kendi nokuduka.

Baraka, Jayeli naSisera

Konyima zosiruwo, Sisera ta ya siki kotenta zaJayeli. Age ta mu zigida a hwilire, ta mu pe masini. Eyi tayi mu retere nompofu, ano konyima tupu zosiruwogona ta ponyoka makuruponyoka. Jayeli makura ta gusa ntungo zotenta nokuzipampara momutwe gomugara gomudona ogu. Konyima, apa ana wiza Baraka, Jayeli ta mu likida Sisera ogu ana dipaga! To mono sa asi eyi ga tente Debora ya sikilire mo.

Mouhura hompa Jabini nage tava mu dipaga, ano Israeli tazi kara nompora hena siruwo songandi.

Vapanguli 2:14-22; 4:1-24; 5:1-31.



Mapuro

  • Wolye vapanguli, ntani vamwe madina gawo wolye?
  • Sirugana musinke sokulikerera ga kara naso Debora, ntani yinke ya hamena mo?
  • Apa Israeli ga zi tjilisire hompa Jabini nomugendesi govakwayita vendi Sisera, mbudi musinke zokutunda kwaJehova ana kugava Debora kwamupanguli Baraka, ntani yilye ana kutanta asi nga gwana efumano lyefundo?
  • Ngapi omu ana likida Jayeli asi age mukadi gomupampi?
  • Yinke yina horoka konyima zonomfa dahompa Jabini?

Mapuro gokugwederera ko

  • Resa Vapanguli 2:14-22.

    Ngapi omu va lireterere vene Vaisraeli ehandu lyaJehova, ntani sirongwa musinke natu vhura kulirongera ko kweyi?

  • Resa Vapanguli 4:1-24.

    Yirongwa musinke kuhamena epuro noupampi nava vhura kulirongera ko naina Vakriste wovakadi kosihonena soDebora naJayeli?

  • Resa Vapanguli 5:1-31.

    Rusumo rwefundo roBaraka naDebora, ngapi omu nava vhura kururuganesa ngekanderero kuhamena yita yina kuwiza yaHarumagedoni?