Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 47: Muwidi moIsraeli

Esimwititi 47: Muwidi moIsraeli
Akana kuna kuhoreka eyi ga vaka

TARA eyi ana kuhoreka mugara ogu motenta zendi! Sikoverero sosiwa, nongorodo ntani noyitenda yosisiliveli. Age kwa yi gusire mositata saJeliko. Nye ngano yinke va rugene noyininke yomoJeliko? To diworoka?

Awo ngano kwa hepere kuyizonagura po, ano ngorodo nosisiliveli va yi tura memona lyaJehova lyomonkongoronzugo. Vantu ava kwa nyokere Karunga. Awo kwa veke yininke yaKarunga. Edina lyomugara ogu Akana, ano owo vana kara nage kuna kara vepata lyendi. Tu tareni asi yinke yina kuhoroka.

Konyima zapa ga veke Akana yininke eyi, Josuwa ta tumu vagara vamwe va ka rwanese sitata saAi. Nye awo kwa ka va fundire moyita. Vamwe kwa ka va dipagere, ano wokukwama ko tava duka. Josuwa ta guwu unene. Ta gu a twe sipara sendi pevhu nokukanderera kwaJehova asi: ‘Yinke ono tarerere eyi yi tu horokere?’

Jehova ta limburura asi: ‘Katuka! Vaisraeli kava zonene. Awo kuna gusa yininke yimwe eyi ngano kava zonagwire ndi va yi gave konkongoronzugo zaJehova. Awo kava veke sikoverero sosiwa yiyo kava si horekere. Ame kapi ngani mu tungika dogoro ngomu si zonagure po, nagoogu ka gusire yininke eyi.’ Jehova ta tanta asi ta ka likida Josuwa asi yilye mugara gomudona.

Josuwa makura ta pongaike vantu navenye kumwe, ano Jehova ta horowora mo mugara gomudona Akana. Akana ta tanta asi: ‘Ame na zona. Ame kwa mwene sikoverero sosiwa nongorodo noyitenda yosisiliveli. Ame kwa yi here sili unene yiyo na yi gusire. Nomu ka yi gwana na yi vhumbika motenta zange.’

Yininke eyi apa vana yi gwana nokuyireta kwaJosuwa, age ta tantere Akana asi: ‘Morwasinke wa tu retera udigu? Ngesi Jehova na ku retera udigu!’ Opo vantu navenye makura tava dipaga Akana nepata lyendi nomamanya. Nani eyi kapi yina kulikida asi narumwe si tu guse yininke ya hana asi yetu?

Konyima, Vaisraeli tava zi va ka rwanese hena Ai. Sikando esi Jehova ta vatere vantu vendi, makura tava fundu yita.

Josuwa 7:1-26; 8:1-29.



Mapuro

  • Mefano, yilye ogu mugara ana kuhoreka maugawo va gusire koJeliko, ntani wolye ava vana kumuvatera?
  • Sirugana saAkana ntani nepata lyendi, morwasinke sa karera nzo zonene?
  • Yinke ana tanta Jehova apa Josuwa ana mu pura eyi va ka va fundire Vaisraeli moyita poAi?
  • Konyima zokureta Akana nepata lyendi kwaJosuwa, yinke yina va horokere?
  • Sirongwa musinke somulyo nali tu ronga epanguro lyaAkana?

Mapuro gokugwederera ko

  • Resa Josuwa 7:1-26.

    Yinke ga horwere makanderero gaJosuwa kuhamena elikwatakano lyendi kumwe noMusiti gwendi?

    Yisinke asi likida sihonena saAkana, ntani ngapi eyi ya kara erondoro kwetu?

  • Resa Josuwa 8:1-29

    Situmbukira musinke twa kara naso naina kombungakriste?