Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 44: Rahabu ta horeke nondadi

Esimwititi 44: Rahabu ta horeke nondadi

VAGARA ava moudigu vana kara. Awo va kona kuduka, ngano tava va dipaga. Awo nondadi doVaisraeli, ano mukadi ogu ana kuvavatera yige Rahabu. Rahabu kwa tunga membo eli lya kara kekuma lyositata saJeliko. Tu tareni asi morwasinke vana karere vagara ava moudigu.

Vaisraeli vana liwapaikire kuruta mukuro gwaJorodana va ze mosirongo saKanani. Nye komeho zokuza, Josuwa ta tumu nondadi mbali. Age ta di tantere asi: ‘Zendeni mu ka tare sirongo nositata saJeliko.’

Rahabu nonondadi mbali

Nondadi apa dina wiza moJeliko, tadi zi membo lyaRahabu. Nye kweli ogu ana tantere hompa gwaJeliko asi: ‘Vaisraeli vavali masiku vana wiza mo omu, va ya tare sirongo.’ Apa ana yi zuvhu eyi, hompa ta tumu vagara kwaRahabu, makura tava mu tantere asi: ‘Gava vantu ava kava wizire koge!’ Nye Rahabu kwa horekere nondadi peguru lyonzugo zendi. Makura ta tanta asi: ‘Koveli vagara ava kava wizire membo lyange, nye ame kapi kani divire asi kupi kava tundire. Awo kava zire apa kaku sovaganene, komeho tupu zokuzedira evero lyositata. Nsene mu genderera kuvakonka, ngano nomu va gwana!’ Vagara ava makura tava zi va ka va konke.

Apa vana zi, Rahabu makura ta genderere kuza keguru lyonzugo zendi. Age ta tantere nondadi asi: ‘Ame na yi diva asi, sirongo esi Jehova ngasi mu pa. Ose twa zuvha omu ga pwilikire Efuta lyEgeha apa mwa tundire moEgipite, ntani nomu mwa dipagere ohompa Sihoni naOgo. Ame nina mu ruganene uwa, yipo nye asi none tumbwidireni nge asi ngomu ruganene nge uwa. Ngomu parure otate nonane, ntani novakuru vange novamumbya vange.’

Nondadi tadi gana asi ngadi va parura, nye Rahabu ga kona kurugana ko yuma. Nondadi tadi tanta asi: ‘Gusa rugodi oru rorugeha nokurumanga pekende lyoge, makura o pongeke ekoro lyoge nalinye membo lyoge. Apa ngatu ka wiza natuvenye tu ya guse Jeliko, ngatu mona rugodi pekende makura kapi ngatu dipaga po nampili gumwe membo lyoge.’ Nondadi apa dina tengura kwaJosuwa, tadi mu tantere nayinye eyi ya horokere.

Josuwa 2:1-24; Vahebeli 11:31.



Mapuro

  • Kupi ga tunga Rahabu?
  • Wolye owo vagara vavali mefano, ntani morwasinke vana karere moJeliko?
  • Yinke ana tantere hompa gwaJeliko Rahabu a rugane, ntani elimbururo musinke ana gava Rahabu?
  • Ngapi omu ana vatere Rahabu vagara vavali, ntani uwa musinke ana va hundire?
  • Mugano musinke dina tumbwidire nondadi mbali kwaRahabu?

Mapuro gokugwederera ko

  • Resa Josuwa 2:1-24.

    Etumbwidiro lyaJehova eli va tjangamwaExodus 23: 28, ngapi omu lya ya sikilire mo apa Vaisraeli va ya rwisire Jeliko?

  • Resa Vahebeli 11:31.

    Sihonena saRahabu, ngapi omu sa likida mulyo gwepuro?