Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 42: Sindongi tasi uyunga

Esimwititi 42: Sindongi tasi uyunga

WA ZUVHA rumwe sindongi tasi uyunga ndi? Ove nampo to tanta asi: ‘Hawe. Yikorama kapi ayi uyunga.’ Nye Bibeli kwa simwitira ko kuhamena sindongi esi sa uyungire. Tu tareni asi ngapi omu ya horokere.

Muengeli

Vaisraeli vana liwapaikire kuhwilira mosirongo saKanani. Hompa gwaMowaba, Baraka, ana kara noutjirwe morwa Vaisraeli. Ta tumine mugara gomukotoki gedina Baramu a wize nokuyafingilira Vaisraeli. Baraka ta tumbwidire Baramu yimaliva yoyinzi, makura Baramu ta rondo posindongi sendi nokutameka rugendo rwendi a ze kwaBaraka.

Jehova kapi ana hara asi Baramu a fingilire vantu Vendi. Makura ta tumu muengeli gorufuro rorure a ka sikame monzira nokukondera Baramu. Sindongi sina mono muengeli, nye Baramu kapi ga mu mwene. Sindongi makura tasi kambadara asi si piruke nokutengura si tunde komuengeli, ano moruhura tasi bwakama tupu monzira. Baramu ta handuka unene, ta toona sindongi sendi nosiuro.

Jehova makura ta ninki Baramu a zuvhe sindongi sendi sina kumuuyungisa. Sindongi tasi pura asi: ‘Yisinke nina ku zono eyi ono kutoonena nge ngesi?’

Baramu kuna rondo posindongi

Baramu asi: ‘Yeeyi ono monesa nge ugova! Ngano kani kara norufuro, ngano nina ku dipaga!’

Baramu asi: ‘Yeeyi ono monesa nge ugova! Ngano kani kara norufuro, ngano nina ku dipaga!’

Sindongi tasi pura asi: ‘Na ku rugana rumwe ngesi ndi?’ Baramu ta limburura asi: ‘Hawe.’

Jehova makura ta ninki Baramu a mone muengeli ogo ana sikama monzira norufuro. Muengeli ta tanta asi: ‘Morwasinke ono toonene sindongi soge? Ame kuna wiza ni ku kondere monzira zoge, morwa ove kapisi o ze o ka finge Vaisraeli. Ngano asi sindongi soge kapi sina tengura si tunde pwange, ngano nina ku dipaga, nye aso ngano kapi nina si gumu.’

Baramu ta tanta asi: ‘Nina zono. Kapi kani diva asi nyove ono sikama monzira.’ Muengeli ta sigi Baramu a ze, makura Baramu ta zi kwaBaraka. Age simpe ta heteke asi a finge Vaisraeli, nye, mevega lyokuvafinga, Jehova ta mu ninki a tungike Vaisraeli yikando yitatu.

Numeri 21:21-35; 22:1-40; 23:1-30; 24:1-25.



Mapuro

  • Yilye Baraka, ntani morwasinke ana tuminine Baramu?
  • Morwasinke sina bwakamene sindongi saBaramu monzira?
  • Yinke ana kuzuvha Baramu sina kuuyunga sindongi?
  • Yinke ana kutantera muengeli Baramu?
  • Yisinke yina horoka apa ana kuhetekera Baramu kufinga Vaisraeli?

Mapuro gokugwederera ko

  • Resa Numeri 21:21-35.

    Morwasinke za fundilire Israeli hompa Sihoni goVaamoli ntani hompa Ogo gwaBasani?

  • Resa Numeri 22:1-40.

    Konda zaBaramu musinke za kere zokuhetekera kufinga Israeli, ntani yinke natu vhura kulirongera ko kweyi?

  • Resa Numeri 23:1-30.

    Nampili ngomu ga uyungire Baramu ngwendi mukareli gwaJehova, ngapi omu nkareso zendi za likidire mwapeke?

  • Resa Numeri 24:1-25.

    Sihorokwa esi soBibeli, ngapi omu asi nkondopeke epuro lyetu mesikisomo lyositambo saJehova?