Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 38: Nondadi 12

Esimwititi 38: Nondadi 12
Nondadi doVaisraeli kuna simbi manyango

TARA kenyango eli vana simbi vagara ava. Tara unene wosisokombwa somandjembere oso. Aso kwa hepa kusipangeka vagara vavali ntani. Tara hena kekuzu nonondunga. Kupi oku lya tundilire eli enyango lyewa ngesi? Kosirongo saKanani. Diworoka, Kanani kwa kere oku va tungire oAbirahamu naIsaka naJakopo. Nye morwa erumbu eli lya keremosirongo sina, Jakopo nepata lyendi yipo va dirukilire koEgipite. Ngesi, konyima zonomvhura 216, Mosesa kuna kupitisira Vaisraeli va tengure koKanani. Awo tava ya siki pevango lyomomburundu ava tumbura asi Kadesi.

MoKanani kwa kara mo vantu wovadona. Mosesa makura ta tumu nondadi 12 nokuditantera asi: ‘Ka tareni asi vantu vangapi va tunga mosirongo oso, ntani nonkondo dawo kupi ko da hura. Ka tareni hena nsene asi evhu ewa mokukuna mo yininke. Mwa ha ka lidivara kukapitura ko enyango.’

Apa dina ka tengura nondadi koKadesi, tadi tantere Mosesa asi: ‘Aso sirongo sosiwa.’ Ano mokuyikwatesa ko, tava likida Mosesa enyango limwe. Nye nondadi 10 tadi tanta asi: ‘Vantu ava va tunga mo vanene ntani nonkondo. Awo ngava tu dipaga nsene ngatu heteka kugusa sirongo.’

Vaisraeli apa vana yi zuvhu eyi tava tjira. Tava tanta asi: ‘Ngano kwa fira tupu moEgipite ngano hansa ndi nampili moomu momburundu! Ose ngava ka tu dipagera moyita ano vakadi vetu novena vetu ngava ka va weke. Tu lihorowereni mugendesi gomupe mevango lyaMosesa, tu tengureni koEgipite!’

Nye nondadi mbali tadi huguvara mwaJehova, nokuheteka kumwenekeda vantu. Madina gado Josuwa naKarebu. Ado tadi tanta asi: ‘Mwa ha tjira. Jehova nose ga kara. Ayo ngayi tu rerupa mokugusa sirongo.’ Nye vantu kapi vana kupurakena. Awo tava hara hena kudipaga oJosuwa naKarebu.

Eyi tayi handukisa Jehova unene, makura ta tantere Mosesa asi: ‘Kwato vantu wokupitakana po nomvhura 20 ngava za mosirongo saKanani. Awo va mona yitetu eyi na rugana moEgipite ntani nomomburundu, nye awo simpe nokuhuguvara nge si. Awo ngava kununuka momburundu nomvhura 40 dogoro muntu gokuhulilira nga fe. Josuwa naKarebu velike yiwo ngava za mosirongo saKanani.’

Numeri 13:1-33; 14:1-38.



Mapuro

  • Yinke ono kukoneka kuhamena sisokombwa somandjembere mefano, ntani kupi sa tundilira?
  • Morwasinke ana kutumina Mosesa nondadi 12 mosirongo saKanani?
  • Yinke dina tantere Mosesa nondadi murongo apa dina ka tengura?
  • Ngapi omu dina likida nondadi mbali ehuguvaro mwaJehova, ntani madina gado wolye?
  • Morwasinke ana handukire Jehova, ntani yinke ana kutantera Mosesa?

Mapuro gokugwederera ko

  • Resa Numeri 13:1-33.

    Wolye va horowere mokukanenga sirongo, ntani mpito musinke zonene va kere nazo?

    Morwasinke egano lyoJosuwa naKarebu lya lisigire neli lyonondadi dimwe, ntani yinke ayi tu rongo eyi?

  • Resa Numeri 14:1-38.

    Erondoro musinke kuhamena kutangwinina vakarelipo vaJehova wopevhu twa kona kupurakena?

    Numeri 14:24, ngapi omu azi likida asi Jehova kulitura mo mwankenye mukareli gwendi?