Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 35: Jehova ta gava noveta dendi

Esimwititi 35: Jehova ta gava noveta dendi

KONYIMA zomakwedi gavali kutunda apa va pwege moEgipite, Vaisraeli tava ya siki pondundu zaSinayi, ezi ava tumbura hena asi Horeba. Pevango lyeeli yipo hena ga uyungire Jehova naMosesa mosihwa sokutwera mundiro. Vantu makura tava dike kamba nokukara po karuwo.

Vantu eyi vana kundindira pevhu, Mosesa ta rondo ndundu. Keguru lyondundu kwina, Jehova ta tantere Mosesa asi Age kuna hara Vaisraeli va Mu limburukwe nokukara vantu Vendi wokulikarera. Mosesa apa ana humburuka, ta tantere Vaisraeli eyi ga tente Jehova. Vantu tava tanta asi awo ngava limburukwa Jehova morwa vana hara kukara vantu vendi.

Jehova makura ta rugana sininke sosigeni. Ta ninki ndungu zondundu zi tutumuke musi, nokuninka nombadi dononene. Age ta uyunga hena novantu asi: ‘Ame nyame Jehova Karunga goge ogu ga ku gusa mosirongo saEgipite.’ Makura ta gava mpangera asi: ‘Walye o tongamene vakarunga nawopeke ntudi nyame.’

Yitafura yivali yomamanya

Karunga ta pe hena Vaisraeli yipango ndi noveta ntane. Vantu guna va pwaga unene. Tava tantere Mosesa asi: ‘Ove nyove no uyunga nose, morwa ose tuna tjira asi nsene Karunga na uyunga nose neisi natu fa.’

Konyima Jehova ta tantere Mosesa asi: ‘Ronda ndundu o wize kwange. Tani ya ku pe yitafura yivali yomamanya apa na tjanga nompango edi nina hara asi vantu va di limburukwe.’ Mosesa makura ta rondo hena ndundu. Ta ka kara ko mazuva 40.

Karunga kwa kara nonoveta dononzi kovantu vendi. Mosesa makura ta tjanga noveta edi. Karunga makura ta pe Mosesa yitafura yivali yomamanya. Pwayo, Karunga mwene kwa tjenge po noveta 10 edi ga uyungisire vantu navenye. Ado kuditumbura asi Yipango Murongo.

Mosesa poNdundu zaSinayi

Yipango Murongo kwa kara noveta domulyo. Nye yimo tupu hena kuhamena noveta dokukwama ko edi ga geve Karunga koVaisraeli. Veta zimwe ezi kwa kara: ‘O hare Jehova Karunga goge nomutjima goge nagunye nonondunge doge nadinye nomwenyo goge nagunye nononkondo doge nadinye.’ Ano nkwawo zimwe kwa kara: ‘Hara mukweni moomu wa lihara nyamoge.’ Jesus Kristusa, MunwaKarunga, kwa tente asi edi yido noveta dononene edi Jehova ga geve kovantu vendi Vaisraeli. Konyima ngatu lironga yoyinzi kuhamena MunwaKarunga nomarongo gendi.

Nonkango dokugwederera ko



Mapuro

  • Konyima zomakwedi gavali kutunda apa va pwege moEgipite, kupi vana dike Vaisraeli kamba zawo?
  • Yisinke ana kutanta Jehova eyi ana hara vantu vendi va rugane, ntani yinke elimbururo lyawo?
  • Morwasinke ana kupera Jehova Mosesa yitafura yivali yomamanya?
  • Kugusa ko Yipango Murongo, noveta musinke dapeke ga pere Jehova Vaisraeli?
  • Noveta musinke mbali edi ga uyungire Jesus Kristusa asi dononene po?

Mapuro gokugwederera ko

  • Resa Exodus 19:1-25; 20:1-21; 24:12-18; ntani 31:18.

    Nonkango edi va tjanga mwaExodus 19:8, ngapi omu adi tu vatere mokukwata egano eyi ya hamena mo mokutura po eligawo lyoSikriste?

  • Resa Deuteronomium 6:4-6; Levitikus 19:18; ntani Mateusa 22:36-40.

    Ngapi omu ava likida Vakriste eharo lyawo kwaKarunga nokovakwawo?