Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi: Nonzodi daFarawo

Esimwititi: Nonzodi daFarawo

NOMVHURA mbali tadi piti po, ano Josefa simpe modorongo. Mupindi kapi ga mu diworokere. Esiku limwe Farawo ta roto nonzodi mbali dokulikerera, makura ta lipura asi yinke dina kutanta. To mu mono omu ana rara opo? Ngurangura zokukwama ko Farawo ta zigida vanongo vendi nokuvatantera yininke eyi ga rotere. Nye awo kapi va vhulire kumutantera ntanto zononzodi dendi.

Mupindi ntani nye ana kudiworoka Josefa. Age ta tantere Farawo asi: ‘Apa na kere modorongo mwa kere mugara ogu nga vhuru kuzagura nonzodi.’ Farawo ta ninki va ka pwagese Josefa modorongo posiruwo sooso.

Farawo ta tantere Josefa nonzodi dendi asi: ‘Ame kuna mono nongombe ntambali donongwa dokuneta. Makura ntani nina mono nongombe ntambali donondona dokutongama. Ano dokutongama yiyo dina mini nongombe dokuneta.

Farawo ta roto

‘Monzodi zange zauvali ame kuna mono nompakwa ntambali donongwa dokundondomoka kosihatji simwe. Ntani nina mono nompakwa ntambali dokurakera da senya. Ano nompakwa dokurakera yiyo dina tameke kumina nompakwa ntambali donongwa.’

Josefa ta tantere Farawo asi: ‘Nonzodi edi mbali kutanta sininke simwe tupu. Nongombe ntambali dokuneta nonompakwa ntambali donongwa kuna kutanta nomvhura ntambali, ano nongombe ntambali dokutongama nonompakwa ntambali dokurakera kutanta asi nomvhura hena ntambali. Ngapa kara nomvhura ntambali apa nondya dononzi ngadi mena moEgipite. Makura ngapa kara hena nye nomvhura ntambali apa ngadi mena mo nondya dononsesu.’

Josefa makura ta tantere Farawo asi: ‘Papara nye mugara gonondunge a gendese epongaiko lyonondya mosiruwo sonomvhura ntambali donongwa. Makura vantu kapi ngava fa konzara monomvhura ntambali donondona edi ngadi mena nondya dononsesu.’

Farawo kwa here egano olyo. Makura ta horowora Josefa a pongaike nondya nokudipungura. Josefa makura ta kara mugara gekuto unene moEgipite kukwama kwaFarawo.

Konyima zonomvhura ntantatu, posiruwo sonzara, Josefa ta mono vagara vana kuwiza. Ono diva asi wolye? Tara, yiwo vakuru vendi 10! Guhyawo Jakopo kwa va tumine koEgipite morwa nondya kwa sesupire membo lyawo moKanani. Josefa ta dimburura vakuru vendi, nye awo kapi va mu dimbwilire. Ono diva asi morwasinke? Morwa Josefa ana kuru, ntani kuna dwara yikoverero yorudi peke.

Josefa ta diworoka asi apa ga kere age mumati ga rotere kuhamena vakuru vendi vana kuwiza va ya mu nyongamene. To diworoka asi wa yi resa eyi? Josefa makura ta mono asi Karunga yige ga mu tumine koEgipite nokonda zongwa. Yinke ono kugazara ga rugene Josefa? Tu tareni si.

Genesis 41:1-57; 42:1-8; 50:20.



Mapuro

  • Yinke yina horokere Farawo mesiku limwe?
  • Morwasinke mupindi moruhura ana ya diworoka Josefa?
  • Ngamoomu vana yi likida mefano, nonzodi musinke mbali ana roto Farawo?
  • Ngapi omu ana kuzagura Josefa nonzodi?
  • Ngapi omu ana ya kara Josefa mugara gekuto unene moEgipite kukwama kwaFarawo?
  • Morwasinke vana wizire vakuru vaJosefa koEgipite, ntani morwasinke awo kapi vana mu dimburura?
  • Nzodi musinke ana diworoka Josefa, ntani yinke zina mu vatere a kwate egano?

Mapuro gokugwederera ko

  • Resa Genesis 41:1-57

    Ngapi omu ga geve Josefa efumano kwaJehova, ntani naina monkedi musinke nava vhura Vakriste kuhonena sihonena sendi?

    Nomvhura donondya dononzi moEgipite nokukwama ko nomvhura donondya dononsesu, ngapi omu da likida nawa-nawa elisigo lyoukaro wopampepo pokatji kovantu vaJehova naina nou woVakriste woyimpempa?

  • Resa Genesis 42:1-8 ntani 50:20.

    Nsene azo yizo mpo zomosirongo, ya kara epuko kovakareli vaJehova mokunyongamena komeho zomuntu nefumadeko morwa ukaro wendi ndi?