Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 37: Hompa gomudona ta pangere Egipite

Esimwititi 37: Hompa gomudona ta pangere Egipite

VAGARA ava kuna kusininika vantu va rugane. Tara komugara ogu ana kutoona murugani gumwe nongora! Varugani kuna kara vepata lyaJakopo, ano kuvatumbura asi Vaisraeli. Vagara ava vana kuvasininika va rugane kuna kara Vaegipite. Vaisraeli vana ya kara vapika woVaegipite. Ngapi omu ya horokere eyi?

Vaegipite kuna kuhepeka Vaisraeli

Nomvhura dononzi epata lyaJakopo lyenene kwa tungire moEgipite nombili. Josefa, ogu ga kere mugara gomulyo unene moEgipite kukwama kwahompa Farawo, nga va pakere mbili. Nye Josefa makura yipo ga fire. Makura Farawo gomupe, ogu ga pilire kuhara Vaisraeli, yipo ga kere hompa moEgipite.

Farawo gomudona ogu yipo ga ninkire Vaisraeli va kare vapika. Makura yipo ga va pere momawoko govagara wovadona wonyanya. Awo kwa sininikire Vaisraeli va rugane unene mokutungira Farawo yitata. Nye nampili ngoso, sivaro soVaisraeli kwa twikilire kuvhuka. Konyima zosiruwo vaEgipite tava tjira asi Vaisraeli ngava vhuka unene ntani ngava nkondopara.

Vaegipite kuna kuhepeka Vaisraeli

Ono diva asi Farawo yinke ga rugene? Age kwa uyungisire vakadi ava ngava vatere vazinya woVaisraeli mokuhampuruka vakeke vawo asi: ‘Mwa kona kudipaga nkenye mukeke gomumati ogu vana kuhampuruka.’ Nye ava kwa kere vakadi wovawa, makura kapi ngava dipaga vakeke.

Farawo makura ta gava mpangera ezi kovantu vendi navenye asi: ‘Guseni vakeke woVaisraeli wovagara mu va dipage. Nye wovakadi tomu va sigi.’ Nani eyi kapi ya kere sininke sosidona unene mokusipangera? Tu tareni asi ngapi mukeke gumwe gomugara omu ga parukire.

Exodus 1:6-22.



Mapuro

  • Mefano, yilye ogu mugara ana kara nongora, ntani yilye ana kutoona?
  • Apa ga fire Josefa, yinke ya horokerere Vaisraeli?
  • Morwasinke vana tjilire Vaegipite Vaisraeli?
  • Mpangera musinke ga geve Farawo kovakadi ava ngava vatere vakadi woVaisraeli mokuhampuruka?

Mapuro gokugwederera ko

  • Resa Exodus 1:6-22.

    Monkedi musinke ga tamekere Jehova kusikisa mo etumbwidiro lyendi kwaAbirahamu?

    Ngapi omu va likidire vavhadi woVahebeli efumadeko koupongoki weparu?

    Ngapi omu va ya va tungikire vavhadi morwa ulimburukwi wawo kwaJehova?

    Ngapi omu ga hetekere Satana kukondera sitambo saJehova kuhamena Ruvharo rwetumbwidiro rwaAbirahamu?