Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 26: Joba kulimburukwa kwaKarunga

Esimwititi 26: Joba kulimburukwa kwaKarunga

OVE kuna kuzuvhira mugara gokuvera ogu nkenda ndi? Edina lyendi yige Joba, ano mukadi ogu kuna kara mukadendi. Ono diva asi yinke ana kutantera Joba ndi? ‘Fingilira Karunga o fe.’ Tu tareni asi morwasinke ga uyungilire yininke yokufana ngoso, ntani morwasinke Joba ga heperere ngoso unene.

Joba nomasina

Joba kwa kere mugara gokulimburukwa ogu nga limburukwa Jehova. Age kwa tungire mosirongo saUsa, esi sa kere pepi naKanani. Jehova kwa here Joba unene, nye pwa kere gumwe ogu ga mu nyengere. Ono diva asi yilye?

Age kwa kere Satana Muzonaguli. Diworoka, Satana kuna kara muengeli gomudona ogu ga nyenga Jehova. Age kwa mu tompokere mokuninka Adamu naEva va nyoke Jehova, makura yiyo ga gazarere asi kuvhura a ninke nkenye gumwe hena a nyoke Jehova. Nye eyi ya mu tompokere ndi? Hawe. Gazadara ko tupu kovagara novakadi wokulimburukwa ava tuna lirongo. Vangapi no vhura kutumbura?

Konyima zapa va fire oJakopo naJosefa moEgipite, Joba kwa kere muntu gokulimburukwa po unene Jehova pevhu nalinye. Jehova kwa here kudivisa Satana asi kapi ta vhuru kuninka navenye va kare wovadona, yipo ga tente asi: ‘To mono Joba. Tara asi ngapi omu a limburukwa nge.’

Satana ta patana asi: ‘Age kukulimburukwa morwa ove kwa mu tungika ntani age kwa kara noyininke yoyiwa yoyinzi. Nye nsene o yi mu gusa oyo, age nga ku finga.’

Jehova makura ta tanta asi: ‘Nawa. Yi mu gusa nayinye. Rugana maudona nagenye aga ono hara kwaJoba. Natu tara nsene na finga nge. Divilisa tupu asi wa ha mu dipaga.’

Pomuhowo, Satana ta ninki vagara va vake nongombe nonongameru daJoba, ano nonzwi dendi va di dipage. Makura ta dipaga vana vendi wovagara nava wovakadi 10 mekundungu. Kutunda opo, Satana ta zuguma Joba uvera ou woudona unene. Joba kwa hepere unene. Morwa yininke eyi, mukadaJoba yiyo nye ga mu tanterere asi: ‘Fingilira Karunga o fe.’ Nye Joba kapi ga yi rugene. Pwa wizire hena vakaume vatatu woyimpempa nokumutantera asi age kwa paruka eparu lyedona. Nye Joba kwa twikilire kulimburukwa.

Eyi kwa hafesere Jehova unene, ano mouhura ta tungike Joba ngomu ono kuyimona mefano. Age kwa mu verwire kouvera. Joba ta kara hena novana wovawa 10, ntani nonongombe nononzwi nonongameru dononzi kupitakana pwaruvali pwedi ga hovere kukara nado.

Ove ngo limburukwa nkenye apa kwaJehova ngaJoba ndi? Nsene yimo, Karunga nga ku tungika nove. Ove ngo vhura kukaparuka narunye apa evhu ngava ka li ninka li ka wape ngosikunino saEdeni.

Joba 1:1-22; 2:1-13; 42:10-17.

Joba nepata lyendi


Mapuro

  • Yilye ga kere Joba?
  • Yinke ga hetekere kurugana Satana, nye age ya mu tompokere ndi?
  • Yinke ga pulisire Jehova Satana a rugane, ntani morwasinke?
  • Morwasinke mukadaJoba ga mu tanterere a ‘fingilire Karunga a fe’? (Tara efano.)
  • Moomu ono kumona pefano lyauvali, ngapi omu ga tungikire Jehova Joba, ntani morwasinke?
  • Ngwendi Joba, nsene si ose valimburukwi kwaJehova, matungiko musinke ngatu ka gwana?

Mapuro gokugwederera ko

  • Resa Joba 1:1-22.

    Ngapi omu nava vhura Vakriste naina kuhonena Joba?

  • Resa Joba 2:1-13

    Mononkedi musinke mbali dokulisiga omu va limbwilire oJoba namukadendi komahepeko gaSatana?

  • Resa Joba 42:10-17.

    Malifano musinke ga kara po pokatji ketungiko eli ga gwene Joba ntani neli ga gwene Jesus morwa eparu lyendi lyoulimburukwi?

    Matungiko aga ga gwene Joba pokukara noulimburukwi wendi kwaKarunga, ngapi omu aga tu korangeda?