Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 25: Epata tali dirukire koEgipite

Esimwititi 25: Epata tali dirukire koEgipite

JOSEFA kapi ana kuvhura hena kupangera malizuvho gendi. Ta tantere vakareli vendi navenye va pwage monzugo. Apa ga hupire mo gelike novakuru vendi, Josefa ta tameke kulira. Ose kuvhura tu ligazadare ko asi ngapi omu va tetukire vakuru vendi namumbyendi, morwa awo kapi va divire asi morwasinke ana kulilira. Mouhura ta tanta asi: ‘Nyame Josefa. Otate simpe vazuni ndi?’

Vakuru vendi namumbyendi vana tetuka sili mokuninka asi kapi vana kuuyunga. Awo guna va pwaga. Nye Josefa ta tanta asi: ‘Hedeni oku.’ Apa va hedere kwendi, ta tanta asi: ‘Ame nyame mumbyeneni Josefa, ogu mwa randesere koEgipite.’

Josefa ta twikire kuuyunga mombili asi: ‘Mwa ha lihandukira nyamweni asi mwa randesa nge oku. Karunga yige ga tuma nge koEgipite asi ni ya parure nomwenyo dovantu. Farawo kwa ninka nge ni kare mupangeli gosirongo nasinye. Ngesi zendeni usimbu kotate mu ka yi va tantere eyi. Ka va tantereni va ka wize va ya tunge oku.’

Josefa makura ta umbilikida mawoko gendi kovakuru vendi namumbyendi, makura ta va lidingire oku ta va ncumita navenye. Farawo apa ga zuvhire asi vakuru vaJosefa namumbyendi vana wiza, ta tantere Josefa asi: ‘Va ninka va guse matemba va ze kwa guhyawo nokomapata gawo nokukatengura va ka wize oku. Ame ngani va pa evhu lyewa po moEgipite nazinye.’

Oyo yiwo va rugene. Apa to mono po Josefa ana kugwanekera noguhwe apa va wizire koEgipite nepata lyawo nalinye.

Epata lyaJakopo lina nenepa unene. Navenye muvaro gwawo 70 apa va dirukilire koEgipite, mokuvarura Jakopo novana vendi novatekuru vendi. Nye kwa kere vakadi vawo, ntani nampo novakareli wovanzi hena. Navenye ava makura tava ka tura moEgipite. Awo ngava va tumbura asi Vaisraeli, morwa Karunga kwa pirwire edina lyaJakopo li kare Israeli. Vaisraeli kwa ya kere vantu wokulikarera unene kwaKarunga, ngomu natu ka yi mona konyima.

Genesis 45:1-28; 46:1-27.

Josefa nekoro lyendi


Mapuro

  • Yinke yina horoka apa Josefa ana tantere vakuru vendi asi yige yilye?
  • Yinke ana kufatwilira nombili Josefa vakuru vendi?
  • Yinke ana kuuyunga Farawo apa ana zuvhu kuhamena vakuru vaJosefa?
  • Epata lyaJakopo kupi lya hulire apa va dirukilire koEgipite?
  • Ngapi omu va ya li tumbwire epata lyaJakopo, ntani morwasinke?

Mapuro gokugwederera ko

  • Resa Genesis 45:1-28.

    Sihorokwa soBibeli saJosefa, ngapi omu sa likida asi Jehova kuvhura kupirura eyi va wapaikira mokukoresa vakareli vendi noyitundwamo yoyiwa?

  • Resa Genesis 46:1-27.

    Ehuguvaro musinke ga pere Jehova Jakopo monzira zendi zokuza koEgipite?