Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 20: Dina ta zi moudigu

Esimwititi 20: Dina ta zi moudigu

TO MONO asi wolye ana kukadingura Dina? Age kuna kukatarera po vakadona vamwe ava va kara mosirongo saKanani. Guhwe Jakopo na ka yi hafera eyi ndi? Ngekwafo mokulimburura epuro eli, heteka kudiworoka eyi ngava gazara oAbirahamu naIsaka kuhamena vakadi womoKanani.

Dina ta dingura vakadona woVakanani

Abirahamu ga here asi munwendi Isaka a kware mukadona gomoKanani ndi? Hawe, kapi ga yi here. OIsaka naRepeka va here asi munwawo Jakopo a kware mukadona goMukanani ndi? Hawe, kapi va yi here. Ono diva asi morwasinke?

Ayo kwa kere asi morwa vantu ava womoKanani ngava kanderere vakarunga woyimpempa. Awo kapi va kere vantu wovawa asi va kare vagara ndi vakadi wokukwara, ntani kapi va kere vantu wovawa asi va kare vakaume wopopepi. Ose kuvhura nye tu dive nawa-nawa asi Jakopo kapi nayi ka mu hafesa asi munwendi gomukadona kuna kutura po ukaume novakadona ava woVakanani.

Mousili, Dina kwa zire moudigu. To mono mugara goMukanani omo mefano ana kutara Dina ndi? Edina lyendi yige Sikemu. Ezuva limwe apa Dina ga wizire a ya dingure, Sikemu ta kwata Dina nokumusininika a rare nage. Eyi kwa kere epuko, morwa mugara nomukadi ava va likwara yiwo velike wokuvhura kurara kumwe. Udona ou ga rugene Sikemu kwaDina kwa retere maudigu gamwe gomanzi hena.

Vakuru vaDina wovagara apa va zuvhire eyi ya horokere, tava handuka unene. Vavali po, oSimiyoni naRevhi kwa handukire unene tava gusa nomfuro nokuza mositata nokuhomokera vagara owo mo hararasi. Awo novamumbya novakuru vawo kwa dipagere Sikemu novagara navenye wopeke. Jakopo kwa handukire morwa vana vendi kwa rugene sininke sosidona esi.

Ngapi ga tamekere maudigu nagenye aga? Ayo kwa kere asi morwa Dina kwa likwete ukaume novantu ava ngava pili kulimburukwa konoveta daKarunga. Ose kapi natu hara kukalikwata ukaume nava vangoso, ndi ngapi?

Genesis 34:1-31.



Mapuro

  • Morwasinke Abirahamu ntani Isaka kapi va here vana vawo mokukwara vantu womosirongo saKanani?
  • Jakopo ga yi haferere munwendi a ture po ukaume kumwe novakadona woVakanani ndi?
  • Yilye ogu mugara omo mefano ana kutara Dina, ntani yininke musinke yoyidona ga rugene?
  • Yinke va rugene vakurwa vaDina oSimiyoni naRevi apa va zuvhire eyi ya horokere?
  • Jakopo ga yi kwatesere ko eyi va rugene oSimiyoni naRevhi ndi?
  • Ngapi ga tamekere maudigu nagenye gemepata?

Mapuro gokugwederera ko

  • Resa Genesis 34:1-31.

    Dina kwa ka tarere po vakadona womosirongo saKanani rumwe tupu ndi? Faturura.

    Morwasinke va mu pererere Dina nage usima kezumbaneso lyoukadona wendi

    Ngapi omu nava likida vadinkantu naina asi awo va tambura erondoro lyosihonena saDina?