Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 19: Jakopo ta kara nepata lyenene

Esimwititi 19: Jakopo ta kara nepata lyenene
Jakopo novana vendi

KO TARA si kepata eli lyenene. Ava kuna kara vana vaJokopo wovagara 12. Age kwa kere novana wovakadona hena. Wa diva madina govana vamwe ava ndi? Tu lirongeni ko gamwe.

Reya kwa retere Rubena naSimiyoni naRevhi naJuda. Rakera apa ga mwene asi kapi ana kureta vana, ta guwu unene. Makura ta gava mupika gwendi gomukadi Biliha kwaJakopo, ano Biliha ta kara novana vavali wovagara womadina Dana naNafitali. Reya nage ta gava mupika gwendi gomukadi Silipa kwaJakopo, ano Silipa ta reta Gada naAseli. Mouhura Reya ta reta hena vana wovagara vavali, oIsasikali naSeburoni.

Rakera nage kouhura ntani nye ga ya gwene ko muna. Ta mu ruku Josefa. Konyima ngatu ka lironga yoyinzi kuhamena Josefa, morwa age kwa ya kere muntu gomulyo unene. Ava yiwo vana wovagara 11 ava va reterere Jakopo apa ga tungire noguhwe vaRakera Rabani.

Jakopo ga kere hena novana wovakadi, nye Bibeli kwa tumbura ko gumwe tupu. Edina lyendi kwa kere Dina.

Siruwo kwa sikire mo apa Jakopo ga tokwere kusiga Rabani nokutengura koKanani. Age makura ta pongaike epata lyendi lyenene noyiunda yendi yoyinene yononzwi neyi yonongombe nokutameka rugendo rorure.

Konyima apa Jakopo nepata lyendi va ka tengwire moKanani karuwo kongandi, Rakera ta reta hena muna gomugara. Ayo kwa horokere awo kuna kara morugendo. Rakera kwa gwanekerere noudigu, ano kouhura ta fu age kuna kuhampuruka. Nye mukeke gomumati kwa kere gomuwaawa. Jakopo ta mu ruku Mbenyameni.

Ose tuna hara kudiworoka madina govana wovagara vaJakopo 12 morwa muhoko nagunye gwaIsraeli kwa tundilire mwawo. Mousili, mazimo 12 gaIsraeli kwa ga ruka vana vaJakopo wovagara 10 ntani vana wovagara vaJosefa vavali. Isaka kwa parukire nomvhura dononzi konyima vamati ava navenye awo vana va reta, ntani ayo ya vhulire kumuhafesa mokumona nontekuru donomati dononzi ngosina. Nye tu tareni si asi yisinke ya horokerere mutekurwendi gomukadona Dina.

Genesis 29:32-35; 30:1-26; 35:16-19; 37:35.



Mapuro

  • Wolye madina govana vaJakopo ntazimwe ava ga gwene pwamukadendi gokuhova, Reya?
  • Vana musinke vavali ga reterere mupika gwaReya Silipa Jakopo?
  • Wolye madina govana wovagara ava ga reterere mupika gwaRakera Biliha Jakopo?
  • Vana musinke vavali ga retere Rakera, nye yinke ya horokere apa munwa gwauvali va mu hampurukire?
  • Kuliza nefano, vana wovagara vangapi ga kere nawo Jakopo, ntani yinke ya tundire mo mwawo?

Mapuro gokugwederera ko

  • Resa Genesis 29:32-35; 30:1-26; ntani 35:16-19.

    Moomu va yi likida movana 12 vaJakopo, ngapi omu ngava ruku vamati woVahebeli vanare?

  • Resa Genesis 37:35.

    Nampili ngomu Dina gelike va tumbura mo moBibeli, ngapi omu twa yi diva asi Jakopo ga kere novana wovakadi wovanzi?