Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 16: Isaka ta gwana mukadi gomuwa

Esimwititi 16: Isaka ta gwana mukadi gomuwa

ONO diva asi yilye ogu mukadi ana kara mefano eli? Edina lyendi Repeka. Ano mugara ogu ana kugwanekera nendi kuna kara Isaka. Age kuna ka kara mukadendi. Ngapi omu ya horokere eyi?

Oguhwe vaIsaka, Abirahamu, kwa here kugwanena munwendi mukadi gomuwa. Age kapi ga here asi Isaka a kware mukadi gumwe gomoKanani, morwa vantu ava ngava karere vakarunga woyimpempa. Abirahamu makura ta zigida mukareli gwendi nokumutantera asi: ‘Ame kuna hara o tengure oku lya kara ekoro lyange koHarani o ka retere munwange Isaka mukadi.’

Poopo mukareli gwaAbirahamu ta gusa nongameru murongo nokuza morugendo oro rorure. Apa ga ka sikire pepi nevango olyo lya tungire ekoro lyaAbirahamu, makura ta sikama petope. Alyo kwa kere lina gomboka, siruwo esi vakadi womositata ngava wiza va ya vhete mema metope olyo. Mukareli gwaAbirahamu makura ta kanderere kwaJehova asi: ‘Mukadi ogu na pa nge mema ntani a pe nonongameru ngano a kare ogu ono horowora a kare mukadaIsaka.’

Repeka ta gwanekere naIsaka

Karuwogona tupu Repeka ta wiza a ya vhete mema. Mukareli apa ga mu hundilire mema gokunwa, age ta mu pe. Makura ta zi ta ka vheta mema gomanzi gonongameru odo da notwerere. Eyi kwa kere udigu morwa nongameru kunwa mema gomanzi unene.

Repeka apa ga mene kuyirugana eyi, mukareli gwaAbirahamu ta mu pura edina lyoguhwe. Age kwa mu pulire hena nsene asi kuvhura a ka rare membo lyawo. Repeka ta tanta asi: ‘Otate yiwo Betuwere ntani tuna kara nonzugo zokurara omu no vhura kuyakara nose.’ Mukareli gwaAbirahamu ga divire asi Betuwere kwa kere munwaNahoro ekoro lyaAbirahamu. Mukareli makura ta tongamene nokupandura Jehova kweyi ga mu gendesere nokumutwara kekoro lyaAbirahamu.

Masiku ogo mukareli gwaAbirahamu ta tantere Betuwere namukurwaRepeka Rabani asi yinke ana wizire. Navenye kwa yi pulisilire asi Repeka kuvhura a ze nage a ka kware Isaka. Yinke ga tente Repeka apa va mu pulire? Age kwa tente asi: ‘Nawa tupu,’ age kwa here kuza. Ezuva lyoolyo lyokukwama ko tava rondo ponongameru nokupagwira morugendo rorure rokutengura koKanani.

Apa va ya sikire, azo ngurova. Repeka ta mono mugara ana kugenda mosanzara. Age kwa kere Isaka. Age kwa hefe mokumona Repeka. Ozina Sara kwa fire nomvhura ntatu da pitire po, ano age simpe kwa guvire kweyi. Nye ngesi Isaka kwa ya here Repeka unene sili, makura ta hafa hena.

Genesis 24:1-67.



Mapuro

  • Yilye ogu mugara nogu mukadi mefano?
  • Yinke ga rugene Abirahamu mokugwanena munwendi mukadi, ntani morwasinke?
  • Ekanderero lyomukareli gwaAbirahamu, ngapi omu va li limbwilire?
  • Elimbururo musinke ga geve Repeka apa va mu pulire nsene ga here kukwara Isaka?
  • Yinke ya hafesere Isaka hena?

Mapuro gokugwederera ko

  • Resa Genesis 24:1-67.

    Yikara musinke yoyiwa ga likidire Repeka apa ga gwene mukareli gwaAbirahamu petope?

    Ewapaikiro lyaAbirahamu kwaIsaka, sihonena musinke sosiwa ali gava koVakriste naina?

    Morwasinke natu tulira po siruwo sokuteda ngamoomu ga yi rugene Isaka?