Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 12: Vantu Tava Tungu Ruhungu Rorunene

Esimwititi 12: Vantu Tava Tungu Ruhungu Rorunene

NOMVHURA dononzi kwa pitire po. Vana vaNowa kwa retere vana wovanzi. Ano vana vawo tava kuru nokureta ko vana wovanzi hena. Makura pevhu tapa kara vantu wovanzi hena.

Gumwe govantu ava kwa kere mutekurwaNowa gokononkokona gedina Nimuroto. Age kwa kere mugara gomudona ogu nga sana ta dipaga yikorama ntani novantu. Nimuroto kwa litumbire hena mwene hompa a pangere vantu wopeke. Karunga kapi ga here Nimuroto.

Vantu navenye woposiruwo sina ngava uyunga eraka limwe tupu. Nimuroto kwa here kuvatura navenye pamwe tupu yipo a va pangere. Ono diva asi yinke nye ga rugene? Age kwa tanterere vantu va tunge sitata noruhungu rorunene mwaso. Va tara mefano omu vana kurugana nodopi.

Jehova Karunga kapi ga haferere etungo eli. Karunga kwa here asi vantu va lihane nokukatunga pevhu nalinye. Nye vantu kwa tente asi: ‘Ninkeni oku! Tu tungeni po sitata soruhungu rorure rokukatwa meguru. Makura ose ngatu fumane!’ Vantu kwa here efumano lyavene, kapisi lyaKarunga.

Karunga yipo ga hagekesere vantu kutunga ruhungu rwina. Ono diva asi ngapi omu ga yi rugene? Hararasi tupu ta ninki vantu va uyunge maraka gokulisiga-siga, mevega lyokuuyunga eraka limwe tupu. Vatungi kapi va lizuvha-zuvhire hena. Eyi yiyo nye va si tumbwilire sitata sawo asi Babeli ndi Babironi, kutanta asi “Epiagano.”

Vantu yipo nye va tamekere kudiruka va tunde moBabeli. Nombunga dovantu owo va uyungire eraka lyokulifana kwa dirukire nokukatunga kumwe komaruha gepevhu gopeke.

Genesis 10:1, 8-10; 11:1-9.

Varugani kuna kutunga ruhungu


Mapuro

  • Yilye ga kere Nimuroto, ntani ngapi omu ga lizuvhire Karunga kumuhamena?
  • Mefano, morwasinke vantu vana kuruganena nodopi?
  • Sirugana setungo esi, mrowasinke sa dililire kuhafesa Jehova?
  • Ngapi omu ga hagekesere Karunga etungo lyoruhungu?
  • Ngapi omu va si tumbwire sitata, ntani yinke lya tente edina olyo?
  • YInke ya horokerere vantu konyima apa ga piyaganesere Karunga maraca gawo?

Mapuro gokugwederera ko

  • Resa Genesis 10:1, 8-10.

    Yikara musinke ga likidire Nimuroto, ntani erondoro musinke ayi gava kwetu?

  • Resa Genesis 11:1-9.

    Nositambo musinke va dikilire ruhungu, ntani morwasinke sirugana sa ka yipilire?