Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 7: Mugara Gependa

Esimwititi 7: Mugara Gependa
Henoka

NGOMU gwa vhukire muvaru govantu pevhu, sinzi sawo kwa rugene yininke yoyidona ngaKaini. Nye mugara gumwe kwa likarerere. Age kuna kara mugara ogu gedina Henoka. Henoka kwa kere mugara gependa. Vantu navenye ava va mu kundurukidire ngava rugana yininke yoyidona unene, nye Henoka kwa twikilire kukarera Karunga.

Ono diva asi morwasinke vantu womosiruwo sina va ruganene yininke yoyidona yoyinzi ngosina ndi? Gazadara ko: Yilye ogu ga ninkisire oAdamu naEva va nyoke Karunga nokulya kosiyimwa esi ga silikire Karunga? Yimo, age kwa kere muengeli gomudona. Bibeli kwa mu tumbura asi Satana. Ano age kuna kuhetekera ko asi a ninke navenye va kare vadona.

Widi nedipago

Ezuva limwe Jehova Karunga kwa ninkire Henoka a tantere vantu sininke simwe esi va pilire kuhara kuzuvha. Aso kwa kere esi: ‘Ezuva limwe Karunga ta ka zonagura po vantu wovadona navenye.’ Vantu nampo ya va handukisire mokuyizuvha eyi. Awo nampo va hetekerere ko kudipaga Henoka. Yipo nye asi Henoka ga hepere kukara ependa mokutantera vantu kuhamena eyi nga ka rugana Karunga.

Karunga kapi ga ninkire Henoka a paruke siruwo sosire mokatji kovantu wovadona vena. Henoka kwa parukire a sike tupu ponomvhura 365. Morwasinke tuna kuuyungira asi ‘nomvhura 365 tupu’? Morwa vantu womosiruwo sina kwa kere wononkondo unene kupitakana ngesi ntani ngava paruka siruwo sosire. MunwaHenoka Metusera kwa parukire nomvhura 969!

Vantu kuna kurugana yininke yoyidona

Konyima zapa ga fire Henoka, vantu kwa twikilire kuyipa. Bibeli kwa tanta asi ‘nayinye eyi ngava gazara kwa kere yoyidona siruwo nasinye,’ ntani ‘nyanya kwa vhukire napenye.’

Ono diva konda zimwe asi morwasinke maudigu gomanzi ga karerere pevhu mosiruwo sina ndi? Ayo kwa kere asi morwa Satana ga kere nonkedi zompe zokuninkisa vantu va rugane udona. Eyi yiyo natu ka lironga mokukwama ko.

Genesis 5:21-24, 27; 6:5; Vahebeli 11:5; Juda 14, 15.



Mapuro

  • Ngapi omu ga likarerere Henoka?
  • Morwasinke ngava ruganene vantu womomazuva gaHenoka yininke yoyinzi yoyidona?
  • Yininke musinke yoyidona ngava rugana vantu? (Tara efano.)
  • Morwasinke ga heperere Henoka kukara ependa?
  • Siruwo sokuhura kupi ngava paruka vantu nare, nye nomvhura dingapi ga parukire Henoka?
  • Yinke ya horokere konyima zapa ga fire Henoka?

Mapuro gokugwederera ko

  • Resa Genesis 5:21-24, 27.

    Elikwatakano musinke ga kere nalyo Henoka kumwe naJehova?

    Kuliza noBibeli, yilye mugara oug ga parukire nomvhura doonzi kupitakana navenye wopeke, ntani dingapi da kere apa ga fire?

  • Resa Genesis 6:5.

    Ngapi omu day a donapere nomukaro pevhu konyima zonomfa daHenoka, ntani ngapi omu ayi hetakana eyi kumwe nomazuva getu?

  • Resa Vahebeli 11:5.

    Sikara musinke saHenoka sa ‘zire Karunga komutjima,’ ntani nositundwamo musinke?

  • Resa Juda 14, 15.

    Ngapi omu nava vhura Vakriste naina kuhonena upampi waHenoka pokurondora vantu kuhamena ewizo lyoyita yaHarumagedoni?