Zende koyikaramo

Zende koyikaramo

Nombangi daJehova

Horowora eraka Rukwangali

Esimwititi 3: Mugara Nomukadi Wokuhova

Esimwititi 3: Mugara Nomukadi Wokuhova

YISINKE yina lisigi po pefano eli? Yimo, apa kuna kara po vantu. Awo kuna kara mugara nomukadi wokuhova. Yilye ogu ga va rugene? Karunga. Wa diva edina lyendi ndi? Alyo yilyo Jehova. Ano mugara nomukadi kwa va rukire oAdamu naEva.

Adamu naEva mosikunino saEdeni

Jehova Karunga kwa rugene Adamu ngesi. Age kwa gusire mbundu mevhu makura ta zi rugana rutu rokusikilira mo, rutu romugara. Makura ta heserere momazuru gomugara, ano Adamu yipo ga tamekere kuparuka.

Jehova Karunga kwa pere Adamu sirugana. Age kwa tanterere Adamu a ruke yikorama nayinye yokulisiga-siga. Adamu nampo ga tarwilire yikorama siruwo sosire yipo nye ga vhulire kugava madina aga ga yi wapererere nayinye. Adamu apa ga rukire yikorama ta dimburura po sininke simwe. Ono si diva asi sininke musinke?

Yikorama nayinye kwa kere novaholi vayo. Apo kwa kere po otate-nzovhu nonane-nzovhu, ntani pwa kere hena otate-nyime nonane-nyime. Nye Adamu kapi ga kere namuholi gwendi. Jehova yipo ga rangekere Adamu nompofu dononene, makura ta mu gusa rupatji rumwe. Meruganeso rupatji oru, Jehova kwa ruganenene Adamu mukadi, makura ta kara mukadendi.

Ee, ngapi tupu nye omu Adamu ga hefe ngesi! Gazadara ko tupu hena asi ngapi omu Eva ga hafere mokumutura mosikunino sosiwa ngosina a tunge mo! Ngesi awo ya va vhulikire nye kureta vana nokutunga kumwe moruhafo.

Jehova kwa harerere oAdamu naEva asi va paruke narunye. Age kwa va harerere asi va rugane evhu nalinye li wape ngwendi sikunino saEdeni. Ee, ngapi tupu omu nampo ya va hafesere oAdamu naEva apa va gazarere kuyirugana eyi! Ove ngano wa haferere kulihameka mo mokurugana evhu li kare sikunino sosiwa ndi? Nye ehafo lyoAdamu naEva kapi lya karerere po. Tu tareni asi morwasinke.

Episarome 83:18, NW; Genesis 1:26-31; 2:7-25.



Mapuro

  • Ngapi omu lya lisiga eano mEsimwititi 3 neli lyemEsimwititi 2?
  • Yilye ga rugene mugara gokuhova, ntani ogu mugara edina lyendi yilye?
  • Sirugana musinke ga pere Karunga Adamu?
  • Morwasinke ga rangekere Karunga Adamu monompofu dononene?
  • Siruwo sokuhura kupi ngano va paruka oAdamu naEva, ntani sirugana musinke ga here Jehova va rugane?

Mapuro gokugwederera ko

  • Resa Episarome 83:18, NW.

    Edina lyaKarunga yilyo yilye, ntani mukaro gwendi musinke gokulikarera pevhu nalinye?

  • Resa Genesis 1:26-31.

    Sininke musinke somulyo ga sitire Karunga mezuva lyontazimwe, ntani ngapi esito eli lya lisigire koyikorama?

    Yinke ga pere Jehova vantu ntani noyikoroma?

  • Resa Genesis 2:7-25.

    Yinke ya hamenene mo mosirugana saAdamu sokuruka yikorama?

    Genesis 2:24, ngapi omu azi tu vatere mokukwata egano mutaro gwaJehova kononkwara neligaunuko ntani nelizumbo?