Zende koyikaramo

Zende koyikaramo

Nombangi daJehova

Horowora eraka Rukwangali

 KUPARUKA NGOMUKRISTE

Kwatesa ko nompango daJehova dokuzeruka

Kwatesa ko nompango daJehova dokuzeruka

Jehova kwa tulira po vantu nompango dokuzeruka. Pasihonena, age kwa tura asi nonkwara sininke sokukarerera pokatji komugara nomukadi. (Mat 19:4-6, 9) Age kwa nyenga yirugana nayinye yoruhonda. (1Kol 6:9, 10) Age ga gava nompango kuhamena ndwareso nomaliwapaiko kovantu vendi.—Deut 22:5; 1Tim 2:9, 10.

Naina sinzi sovantu kunyokera po nompango daJehova. (Rom 1:18-32) Awo kupulisira magano govantu kuhamena ndwareso nomaliwapaiko nonkareso yi va kundame. Sinzi sava ava rugana yoyidona kupopera nkareso zawo pokuuyunga momudona ava va kara nonkareso zokulisiga nezi zawo.—1Pet 4:3, 4.

NgoNombangi daJehova twa hepa kukwatesa ko nompango daKarunga dokuzeruka. (Rom 12:9) Ngapi natu yi rugana? Twa hepa kudiva eyi a tambura Jehova. Nye hena twa hepa kuparuka kuliza nonompango dendi. Pasihonena, kuhamena ndwareso nomaliwapaiko getu twa hepa kulipura asi: ‘Ndwareso zange kukwatesa ko nompango daJehova ndi douzuni? Ndwareso nomaliwapaiko gange kudimbwilisa nge asi ame Mukriste ogu ga tjira Karunga ndi?’ Ndi nsene kuna kuhorowora elikwamo ndi muvi, kuvhura tu lipure asi: ‘Jehova kuvhura a kwatese ko eyi na kutarera ndi? Nompango dalye ayi kwatesa ko eyi na kutarera? Yilihafeso yange kusesupika eharo lyange lyokukwatesa ko nompango daJehova ndi? (Epis 101:3) Kuvhura yi pundukise vekoro navamwe ndi?’—1Kol 10:31-33.

Morwasinke ya karera nomulyo tu kwatese ko nompango daJehova dokuzeruka? Kristusa ntaantani nga zonagure po vantu wovadona. (Hes 9:4-7) Vaava tupu ava sikisa mo mpango zaJehova yiwo ngava paruka. (1Joh 2:15-17) Tu kwateseni ko nompango daJehova yipo vantu ava vana kutumona va mu yererepeke.—1Pet 2:11, 12.

Yisinke azi likida ndwareso nomaliwapaiko gange kuhamena omu ani kwatesa ko nompango daKarunga?

TARERA VIDIYO KARA KAUME KAJEHOVA—MUGARA NOMUKADI NTANI ZOGERENI MAPURO AGA:

  • Morwasinke ya karera nomulyo kuparuka kuliza nonompango daJehova?

  • Morwasinke vakurona nava rongera vana vawo nompango doBibeli awo simpe vanona?

  • Ngapi vanona novakondi nava vatera vantu va gwanene mo uwa mouwa waKarunga?