Yirugana yovapositoli 24:1-27

  • Paurusa tava mu rundire (1-9)

  • Paurusa ta uyunga komeho zaFelikisi (10-21)

  • Mpanguro zaPaurusa tava zi ndindilisa nomvhura mbali (22-27)

24  Konyima zomazuva gatano, mupristeli gomunene Ananiyasa ta gurumuka kumwe nomasimbi gamwe goVajuda ntani munaveta* gedina Teruturusi va ya gave masivano gawo komupangeli kuhamena Paurusa.  Apa Teruturusi va mu pere mpito zokuuyunga, ta pe Paurusa usima komeho zomupangeli Felikisi pokutanta asi: “Mpandu kweyi twa kara mombili morwa ove kupangera nonondunge, yininke kuna kugenda po nawa,  ose nkenye apa kukupandwira yininke eyi, ove munekuto Felikisi.  Kapi nina hara kumana siruwo soge, tani kulikwambere o lididimikire o purakene nge.  Mugara ogu tuna mu mono asi muhanesi goudona morwa kuna kuninkisa Vajuda navenye va rwanese epangero ntani age mupitisili gokambunga ava tumbura asi Vanasareta.  Age hena kwa hetekerere ko kunyateka ntembeli pampo makura yipo twa mu kwete.  *——  Nsene no mu puragera no dimburura asi eyi tuna kuuyunga usili.”  Vajuda apa va yi zuvhire eyi, nawo tava mu kwatesa ko pokutanta asi usili ana kuuyunga. 10  Apa mupangeli ga ninkire Paurusa a uyunge, age ta tanta asi: “Ame na yi diva asi ove kwa kara mupanguli gomuhoko ogu nomvhura dononzi, morwa eyi, ame nina hafa mokuuyunga ni lipopere komeho zoge. 11  Kapi pana piti mazuva 12 kutunda apa na kandukire koJerusarema ni ka karere Karunga, pura o divilise nsene asi eyi nina kuuyunga usili. 12  Kapi va gwana nge rumwe asi kuna kutangwisa muntu montembeli ndi ni retese po ndjorongani, yi kare asi monosinagoge ndi mositata. 13  Ntani kapi tava vhuru kugava umbangi asi eyi vana kuuyunga usili. 14  Nye ame tani kutantere asi ame kwa hamena kweyi ava tumbura asi ukareli woupe, monkedi zangesi yimo ani karere Karunga gozinyakurwetu, morwa na pura nayinye eyi va tjanga moVeta ntani momatjango goVaporofete. 15  Ame kwa kara nehuguvaro lyokulifana ngwendi lyeeli va kara nalyo vagara ava asi Karunga nga ka vhumbura vahungami nava va dira kuhungama. 16  Eyi yiyo ani kondjerere ni kare nezwi lyewa lyokomutjima* kosipara saKarunga ntani kovantu. 17  Nomvhura dononzi da ka pita, ame kwa zire koJerusarema ni tware yimaliwa yokukavateresa vakwetu ntani noku ka gava nonzambo kwaKarunga. 18  Apa va ka gwene nge ame kuna kurugana yininke eyi, ame nina kuhuka pampo, kapi va ka gwene nge mombunga ndi asi kuna kuretesa po ndjorongani. Nye Vajuda vamwe ava va tundire komukunda gwaAsiya 19  nawo ngano va hepa kukara po yipo va pe nge usima nsene asi koyili eyi na zona. 20  Ndi pura vagara ava vana kara apa va tante asi unzoni musinke va gwene nge apa na kere mosigongi somasimbi, 21  awo kuvhura va pere nge usima sininke simwe tupu. Apa na kere mosigongi sina ame kwa tente asi: ‘Ame kuna kupangura nge yeeyi na pura mevhumbuko lyovafe!’” 22  Nye Felikisi ogu ga divire mauzera kuhamena nzira zaHompa, ta va rekere asi: “Apa nga ya sika Lisiyasa, mupitisili govakwayita eyovi, ntani ngani ya pangura udigu weni.” 23  Makura ta gava nompangera komupitisili govakwayita asi mugara ogu va mu ture monomango noku mu pa umanguruki woununu ntani asi va ha silika vakwawo mokupakera mbili yihepwa yendi. 24  Konyima zomazuva gongandi, Felikisi ta wiza kumwe namukadendi Durusira ogu ga kere Mujuda makura ta tumine Paurusa yipo a ya mu fatwilire eyi ayi tanta kupura mwaJesus Kristusa. 25  Nye age Paurusa kuna kuuyunga kuhamena uhungami nelipangero ntani nompanguro zokomeho, Felikisi tau mu kwata woma, ta tanta asi: “Ngesi zende nye apa ngani kara nosiruwo ngani kutumina hena.” 26  Age hena kwa here asi ngano Paurusa a mu pe yimaliwa. Eyi yiyo nye nga mu tumine yikando yoyinzi a ya uyunge nendi. 27  Nye apa da pitire po nomvhura mbali, Felikisi ta mu pinganene mo Porokiusi Fesitusa, ano morwa Felikisi kwa here kuhafesa Vajuda, ta sigi Paurusa monomango.

Nonkango dokonhi

Ndi “hahende.”
Ndi “ni dire usima.”