Mbilive koVakorosi 4:1-18

  • Mapukururo kovahekuru (1)

  • “Twikireni kukanderera” (2-4)

  • Kareni nonondunge mokatji kava va dira kupura (5, 6)

  • Makundo gokuhulilira (7-18)

4  One vahekuru, tekureni vakareli veni monkedi zongwa zouhunga, yeeyi none mwa kara naHekurweni meguru.  Twikireni kukanderera, ano ngomu muna kuyirugana, vangarareni oku tomu pandura.  Ntani hena omu tu kanderere po nose kwaKarunga yipo a tu pe mpito zokudivisa nonkango nosihoramo sokuhamena Kristusa esi va tulira nge monomango.  Kanderereni nge po hena yipo ni vhure kusidivisa monkedi zokuzera moomu ya fira kuyirugana.  Kareni nonondunge monkedi ezi omu paruka mokatji kava va dira kupura, ruganeseni nawa siruwo seni.*  Nonkango deni adi kare nkenye apa donongwa donontovara, ngwendi moomu tupu mungwa agu tovareke nondya, yipo mu dive kulimburura nkenye ogu.  Tikikusi, mukwetu gokuhara ntani mukareli mukwetu gokulimburukwa mwaHompa, nga ya mu tantera nayinye yokuhamena kwange.  Tani mu tumu kweni yipo aya mu divise omu tuna karere ntani a ya mu hengagwide.  Age kuna kuwiza naOnesimusa, mukwetu gokuhara gomulimburukwi ogu ga tunda kweni, awo ngava ya mu tantera nayinye eyi yina kuhoroka oku. 10  Aresitarekusi, munadorongo mukwetu naMarukusa sipwa saBaranabasa (ogu twa mu tanterere asi ngomu mu tambure apa nga wiza) vana mu kundisire po 11  ntani naJesus ogu ava tumbura asi Jusitusa gumwe gowo va rugana yovamba. Ava yiwo varugani vakwetu woUhompa waKarunga ntani awo kwa hengagwida* nge unene. 12  Epafurasa, mukareli gwaJesus Kristusa ogu ga tunda kweni, ana mu kundisire po. Age nkenye apa kumukanderera po unene yipo mu twikire kukura ntani epuro lyeni li pame mwanayinye eyi ga hara Karunga. 13  Ame kuvhura ni yi gavere umbangi asi age kurugana unene morwa nyone, nava womoRawodikeya ntani womoHirapolisi. 14  Rukasa, ndokotora gokuhara naDemasa, vana mu kundisire po. 15  Kundisireni po vapuli vakwetu womoRawodikeya ntani kundisireni po Nimufa nombungakriste ezi azi pongere pembo lyendi. 16  Apa ngava mana kumuresera mbilive ezi, ngomu zi tume kombungakriste zomoRawodikeya yipo nawo ngava ka zi va resere, ntani ka va hundireni mbilive ezi na va tumina yipo ngomu ya zi rese. 17  Tantereni hena Arekipusa a twikire kurugana unene yipo a sikise mo sirugana esi ga mu pa Hompa. 18  Makundo aga nyamwange Paurusa nina ga tjanga nokuwoko kwange. Diworokeni asi monomango nina kara. Nkenda zaKarunga zonene zi kare none.

Nonkango dokonhi

MoRugereka asi “lirandereni siruwo.”
Ndi “nkondopeka.”