KoVagarata 6:1-18

  • Livatera-vatereni momaudigu (1-10)

    • Eyi ava kunu yiyo ava zangura yooyo (7, 8)

  • Vamba nayimwe si (11-16)

    • Muntu gomupe (15)

  • Ehageso (17, 18)

6  Vakwetu, nsene asi gumwe kuna kugenda monzira zepuko ga hana kuyidivira, one ava azi gendesa mpepo, mu pukurureni mombili. Nye none litakameseni asi mwa ha gwira meheteko.  Twikireni kulivatera-vatera momaudigu yipo mu sikise mo veta zaKristusa.  Yeeyi nkenye ogu a gazara asi age yige po, nye age nayimwe si, age kulikumbagera mwene.  Nye nkenye gumwe a konakone yirugana yendi yipo nga hafere yirugana yendi, nye kapisi mokulihetakanesa nava wopeke.  Yeeyi nkenye ogu ga hepa kusimba mudigo gwendi.*  Ntani hena, ogu vana kuronga nonkango daKarunga a ligavere yininke nayinye yoyiwa nogu ana kumuronga.  Mwa ha puka, Karunga kapi ava mu kumbagere. Yeeyi nkenye eyi a kunu muntu yiyo nga zangura yooyo,  yeeyi ogu a kunu yipo a hafese madowo gendi, nga zangura ezonauko morwa madowo gendi nye ogu a kwama mpepo zaKarunga, nga zangura mwenyo gwanarunye morwa kukwama mpepo zaKarunga.  Yipo nye asi twa ha hagekeni kurugana uwa, yeeyi nsene tu dira kuroroka* ngatu zangura apa ngasi sika mo siruwo. 10  Yipo nye, nsene asi tuna gwana mpito,* tu ruganeneni navenye uwa nye unene po vapuli vakwetu. 11  Tareni nondanda dononene edi na mu tjangera nokuwoko kwange. 12  Navenye ava va hara kuhafesa vantu* yiwo ava mu sininike asi va mu rugane yovamba, awo kuyiruganena yipo va dire kuvahepekera Kristusa.* 13  Yeeyi nampili ava va rugana yovamba kapi ava sikisa mo Veta nye vana hara asi va mu rugane yovamba yipo va likangangere po kweyi va rugana komarutu geni. 14  Nye ame ngano kapisi ni likangange, ntudi mwaHompa gwetu Jesus Kristusa ogu ga fililire kositji.* Kwange ko, uzuni kwa fa* kupitira mwendi nye kouzuni, ame kwa fa kupitira mwendi. 15  Yeeyi kukurugana yovamba ndi kudira kukurugana yovamba nayimwe si, nye yomulyo po yokukuninka Karunga o kare muntu gomupe. 16  Ngano navenye ava ava kwama nawa-nawa evyukiso eli, kutanta asi Vaisraeli vaKarunga, va gwane mbili ntani Karunga ngano a va likide nkenda. 17  Kutunda apa, pwa ha kara ogu ana kuretera nge maudigu, yeeyi ame kwa kara noyito eyi ayi likida asi ame mupika gwaJesus. 18  Vakwetu, nkenda zonene zaHompa gwetu Jesus Kristusa, ngano zi kare none ngomu muna kulikida nkareso zongwa. Amen.

Nonkango dokonhi

Ndi “kusikisa mo yitumbukira yendi.”
Ndi “kuhageka.”
MoRugereka asi “siruwo sokuwapera.”
Ndi “kulimonekesa.”
MoRugereka asi “sitji saKristusa.”
Ndi “kwa u pampara kositji.”