KoVaefeso 6:1-24

  • Mapukururo kovanona novakurona (1-4)

  • Mapukururo kovapika novahekuru (5-9)

  • Yirwiso nayinye eyi a gava Karunga (10-20)

  • Makundo gokuhulilira (21-24)

6  Vanona, omu limburukwe kovakurona veni mwaHompa, yeeyi eyi yiyo ya hungama.  “O fumadeke oguho nonyoko,” esi yiso sipango sokuhova esi sa kara netumbwidiro eli asi:  “Yipo ngayi kugende po nawa* ntani ngo paruke siruwo sosire pevhu.”  Vaguhya, walye omu nyegenyesa vana veni nye omu va pukurure oku tomu va rongo* moomu ga yi harera Jehova.  Vapika, limburukweni vahekuru veni vepevhu nomutjima nagunye oku tomu va fumadeke noku va tjira ngwendi moomu omu limburukwa Kristusa.  Kapisi paapa tupu ava mu nomene yipo asi mu hafese vantu,* nye ngovapika vaKristusa ava ava sikisa mo mpango zaKarunga nomutjima nagunye.  Ruganeneni vahekuru veni nomutjima nagunye ngwendi kuna kuruganena Jehova, nye kapisi vantu,  yeeyi mwa yi diva asi nkenye eyi yoyiwa a rugana muntu, Jehova nga ka yi mu pera mfeto, a kare asi mupika ndi mumanguruki.  None vahekuru, tekureni vapika veni monkedi zokulifana, kapisi pokuvatjilisa, yeeyi mwa diva asi namuvenye Hekurweni gumwe tupu ogu ga kara meguru ntani age kapi ga paka mpongo. 10  Mokuhulisa, twikireni kugwana nonkondo kwaHompa morwa nonkondo dendi nonene. 11  Dwareni yirwiso nayinye eyi a mu pe Karunga yipo mu kore nokunyokera po yineya yoMuzonaguli, 12  morwa ose kapi atu rwanesa* vantu, nye ose kurwanesa mapangero novapitisili novapangeli wouzuni ou womundema, kutanta asi nompepo dondona edi da kara meguru. 13  Eyi yiyo nye nomu dwarera yirwiso nayinye eyi a mu pe Karunga, yipo ngayi mu tompoke kufunda mezuva lyedona makura ngomu sikame ndjikiti konyima zokusikisa mo nayinye. 14  Yipo nye, sikameni ndjikiti oku muna limanga usili monombunda deni ngwendi liva noku dwara uhungami ngwendi sikoverero sosivera. 15  Ntani dwareni yicamakaku konompadi deni mokuliwapaikira kuudisa mbudi zongwa zombili. 16  Unene po, damuneni silikandwiso sosinene sepuro esi ngomu ruganesa mokudimisisa ko yikutji yomundiro nayinye yomudona. 17  Ntani hena, dwareni ekoli lyeparu nokukwaterera mokuwoko kweni rufuro ropampepo,* kutanta asi nonkango daKarunga. 18  Nsene tomu kanderere ndi tomu likwambere, nkenye apa kanderereni mompepo. Eyi yiyo mwa hepera kuvangarara noku likwamberera po vapongoki navenye. 19  Name kanderereni nge po, yipo asi apa ani zahura kana kange, ngano ni uyunge nouradi ni divise sihoramo saKarunga sombudi zongwa. 20  Karunga yige ga tuma nge ni zuvhise mbudi zongwa. Eyi yiyo vana mangere nge nomauketanga. Kanderereni nge po kwaKarunga yipo ni uyunge mbudi zongwa na hana woma moomu ya fira. 21  Tikikusi, mukwetu gokuhara ntani mukareli gokulimburukwa mwaHompa, nga ya mu tantera kuhamena nge nomu nina karere ntani nga ya mu divisa nayinye. 22  Eyi yiyo nina kumutumina kweni yipo mu ya dive omu tuna karere ntani a ya hengagwide nomutjima deni. 23  Ngano vapuli vakwetu navenye va kare nombili neharo ntani nepuro eyi ayi tundu kwaKarunga Guhyetu naHompa Jesus Kristusa. 24  Ngano nkenda zaKarunga zonene zi kare nanavenye ava va kara neharo lyanarunye kwaHompa gwetu, Jesus Kristusa.

Nonkango dokonhi

Ndi “yi ku wapere.”
Ndi “vyukisa.”
MoRugereka asi “kapisi mokulimonekesa ngwendi ava va hara kuhafesa vantu.”
MoRugereka asi “kulindundanesa.”
MoRugereka asi “rufuro rompepo.”