KoVaefeso 3:1-21
3 Ame Paurusa, kuna kara modorongo morwa kwa hamena kwaJesus Kristusa ntani morwa yeeyi ani mu vatere, one wokonomuhoko dapeke.
2 One mwa zuvha asi ame kwa gwana situmbukira sokumuvatera mu gwanene mo mauwa monkenda zonene zaKarunga ezi va likida nge mwarweni,
3 sihoramo esi kwa si horwera nge kupitira memoneko ngamoomu na yi mu tjangerere.
4 Apa ngomu yi resa eyi, ngomu dimburura asi ame na kwata egano sihoramo sokuhamena Kristusa.
5 Nare Karunga kapi ga horwerere vantu nawa-nawa sihoramo esi ngamoomu ana kusihorwera ngesi vapositoli vendi wokupongoka novaporofete kupitira mompepo zendi.
6 Sihoramo sesi asi: Vantu wokonomuhoko dapeke ava va kara mouumwe naJesus Kristusa ngava kara vapingi kumwe naKristusa ntani ngava kara rutu rumwe kumwe nage. Nawo ngava ka gwana yokulifana ngwendi yeeyi ga tu tumbwidira Karunga morwa mbudi zongwa.
7 Ame kwa ya kere ngwendi mukareli gosihoramo esi konkenda zaKarunga zonene. Age kwa pa nge uhwi ou mononkondo dendi.
8 Ame ogu na dira kuhetakana nampili nagumwe povapongoki navenye, kwa likida nge nkenda zaKarunga zonene yipo ni udisire nomuhoko mbudi zongwa kuhamena maungawo gaKristusa gokudira kuvhura kuheteka
9 nokuvatera vantu va mone Karunga Musiti gwanayinye omu ana kusikisa mo sihoramo esi sa horamene nomvhura dononzi.
10 Eyi kwa horokere yipo va horwere mapangero novapangeli vemeguru unongo waKarunga ou au lihorora mononkedi dokulisiga-siga kupitira mombungakriste.
11 Eyi kwa liza nositambo sanarunye esi ga tulisa po kupitira mwaJesus Kristusa, Hompa gwetu,
12 ano kupitira mwendi ose kuvhura kuuyunga nemanguruko ntani twa kara nemanguruko lyokukanderera kwaKarunga morwa twa mu huguvara.
13 Yipo nye nina kumutanterera asi mwa ha dompa mutjima morwa maudigu aga nina kupita mwarweni, yeeyi ago ngaga mu retera efumano.
14 Eyi yiyo ani tongekere nongoro ni kanderere kwaTate,
15 ogu lya karera po nkenye epata lyemeguru ntani lyepevhu.
16 Tani kanderere kwaKarunga ogu ga kara nouyerere wounene asi a ruganese nonkondo dompepo zendi yipo a nkondopeke nomutjima deni
17 ntani asi kupitira mepuro lyeni, Kristusa a kare monomutjima deni ntani mu hare wopeke. Simbameni nokukora petateko,
18 yipo none novapongoki navenye ngomu vhure kukwata nawa-nawa egano unene noure nomusika ntani nontjima-ntjima zoyininke yokuhamena kousili,
19 ngomu dive eharo lyaKristusa eli lya pitakana ediwo, yipo ngomu kare noyikara nayinye eyi a gava Karunga.
20 Ano kogu a vhuru nayinye, age nga ka tu ruganena yoyinzi kupitakana pweyi atu hundire ndi atu gazara morwa nonkondo dendi edi adi rugana mwetu.
21 Yipo nye asi va mu yererepeke kupitira mombungakriste ntani hena kupitira mwaJesus Kristusa dogoro nokomaruvharo nagenye, narunye nanarunye. Amen.
