Buke zaRukasa 22:1-71

  • Vapristeli tava liyongo va dipage Jesus (1-6)

  • Tava liwapaikire Paska zokuhulilira (7-13)

  • Murarero gwaHompa tava gu tulisa po (14-20)

  • “Ogu na ka horora nge pweli apa” (21-23)

  • Tava lipatana asi yilye gomunene po (24-27)

  • Jesus ta tumbwidire varongwa vendi Uhompa (28-30)

  • Peturusa tava mu tantere asi ta ka patana (31-34)

  • Mulyo gokuliwapaikira; nomfuro mbali (35-38)

  • Jesus ta kanderere poNdundu zoMauzwe (39-46)

  • Jesus tava mu kwata (47-53)

  • Peturusa ta patana Jesus (54-62)

  • Jesus tava mu swaura (63-65)

  • Jesus tava mu pangura mosigongi somasimbi (66-71)

22  Sipito soNomboroto da hana yihaheso esi ngava tumbura asi Paska, kwa kere pepi nokusika.  Ano vapristeli wovanene novalirongi womatjangwa kwa tjilire vantu yiyo va paparere mpito va mu dipage.  Makura Satana ta pukisa Judasa ogu ngava tumbura asi Isikalyoto, gumwe gwava ronambali,  ta zi a ka liyonge novapristeli wovanene ntani vakurona wovanomeni wontembeli omu na mu va horwera.  Awo kwa yi haferere, tava lizuvhu nage asi ngava mu pa yimaliwa yosisiliveli.  Age ga yi tambwire makura yipo ga paparere mpito zongwa zokumuhorora va mu kwate mokahore-hore.  Apa lya sikire ezuva lyosipito soNomboroto da hana yihaheso, posiruwo esi ngava dipaga simuna soPaska,  Jesus ta tumu Peturusa naJohanesa, ta va tantere asi: “Zendeni mu ka wapaike Paska yipo tu ka lye.”  Makura tava mu pura asi: “Kupi ono hara natu ka zi wapaikira?” 10  Ta va tantere asi: “Apa nomu ka hwilira mositata, nomu ka gwanekera nomugara ana simbi kavaza komema. Ka mu kwameni dogoro membo eli na ka hwilira. 11  Ka tantereni mwenya embo asi ‘Murongi kuna kupura asi: “Nzugo zipi zo nani ya lira Paska novarongwa vange?”’ 12  Age na ka mu likida nzugo zekeguru zonene ezi vana wapaike. Omo yimo nye nomu ka zi wapaikira.” 13  Tava zi, tava ka yi gwana moomu ga va tanterere, makura tava liwapaikire Paska. 14  Apa sa sikire mo siruwo, ta ka hingira kositafura kumwe novapositoli. 15  Makura ta va tantere asi: “Ame kwa ndindira ni lye none Paska ezi komeho va ka hepeke nge, 16  tani mu tantere asi kapi ngani zi lya hena dogoro nayinye ngayi ka sike mo moUhompa waKarunga.” 17  Ta gusa nkinda, ta pandura oGuhwe, ta tanta asi: “Guseni mu zi litambaike mokatji keni, 18  tani mu tantere asi, kutunda apa kapi hena ngani nwa vhinyu ezi zoyindjembere dogoro ngau wize Uhompa waKarunga.” 19  Ta gusa mboroto, ta pandura oGuhwe makura ta zi bamagura ta zi va pe noku va tantera asi: “Azo kwa fanekesa rutu rwange oru ngava mu pa. Omu yi rugane eyi mokudiworokera nge po.” 20  Mokulifana, konyima zokulya ta gusa hena nkinda, ta tanta asi: “Nkinda ezi kufanekesa egwanekero lyepe kupitira mohonde zange ezi ngazi tjikanga zi mu parure.” 21  “Tareni! Ogu na ka horora nge pweli apa. 22  Yosili, MunwaMuntu ngayi mu horokera moomu va yi tjanga, nye ehudi lyogu nga mu horora mutupu omu!” 23  Makura tava lipuragere vene navene asi yilye ogu nga yi rugana eyi. 24  Tava lipatana hena asi yilye munene po mokatji kawo. 25  Nye age ta va tantere asi: “Vahompa wonomuhoko kupangera nomuhoko dawo moomu vana harere, ano ava va kara mepangero kuvatumbura asi vakwafi wovantu. 26  Nye one, mwa ha kara ngoso. Gomunene po mokatji keni, a kare ngwendi munonagona, ano ogu a pitisire, a kare ngwendi mukareli. 27  Yilye nani gomunene po, ogu ana hingire a lye ndi mukareli?* Nani kapisi gogu ana hingire a lye? Nye ame kuna kara ngwendi mukareli gweni. 28  One nyone mwa kara name momaudigu gange, 29  ame tani mu tumbwidire uhompa moomu va u tumbwidira nge Otate, 30  yipo ngomu ka lye nokunwa kositafura sange moUhompa wange, ntani ngomu ka hingira mu ka pangure mazimo 12 gaIsraeli. 31  “Simoni, Simoni, Tara! Satana kuna hara a mu zere ngwendi moomu ava zere mahangu.* 32  Nina ku kanderere po asi epuro lyoge ngano lya ha sesupa, nye ove apa no tengura, ka nkondopeke vakweni.” 33  Ta mu tantere asi: “Hompa, ame kuvhura kuza nove nampili modorongo ndi kufa nove.” 34  Age ta mu tantere asi: “Peturusa, tani ku tantere asi komeho sikondomboro si ka zige, ove no ka patana yikando yitatu asi kapi wa diva nge.” 35  Age ta va tantere hena asi: “Apa na mu tumine mwa hana nondjato doyimaliwa ndi donondya ndi yicamakaku, mwa hepere yuma ndi?” Awo tava limburura asi: “Hawe.” 36  Makura ta va tantere hena asi: “Nye ngesi ogu ga kara nondjato zoyimaliwa nogu ga kara nondjato zonondya, a zi simbe ano ogu ga dira kukara norufuro a randese sikoverero sendi sokontunda yipo a rande rufuro. 37  Tani mu tantere asi etjangwa lya hepa kusika mo mwange eli lya tanta asi: ‘Age kwa mu varwira kwava ava teza po veta.’ Eyi kuna kusika mo mwange.” 38  Awo tava mu tantere asi: “Hompa, tuna kara po nonomfuro mbali.” Age ta va tantere asi: “Dina gwanene po.” 39  Apa ga tundire po a ze koNdundu zoMauzwe moomu ga yi yika, varongwa nawo tava mu kwama. 40  Apa va ka sikire, ta va tantere asi: “Twikireni kukanderera yipo ga dire kumufunda maheteko.” 41  Ta linapuka nawo kanano kokusika apa ali ka gwira emanya eli a zuguma muntu, ta tu nongoro makura ta kanderere 42  asi: “Tate, nsene ono hara, gusa nge nkinda* ezi. Nye kapisi moomu nina panga ame, nye ngano mpango zoge zi sike mo.” 43  Makura muengeli ta mu monekere noku mu nkondopeka. 44  Nye age kwa guvire unene yipo ga kanderere nomutjima gwendi nagunye, ano ezazu lyendi kwa kere ngwendi honde zina kundokera pevhu. 45  Apa ga mene kukanderera, ta zi kovarongwa, ta ka va gwana awo kuna kukumauka morwa kwa guvire unene. 46  Age ta va pura asi: “Morwasinke muna rarere? Pindukeni, mu twikire kukanderera yipo ga dire kumufunda maheteko.” 47  Haga za mokuuyunga, tava mono mbunga, ano mugara gumwe gedina Judasa gumwe gowo murongo navavali yige ga zi pitisilire, ta hedere Jesus a mu ncumite. 48  Nye Jesus ta mu pura asi: “Judasa, ove kuna kuhorora MunwaMuntu nencumito?” 49  Ava va kere nendi apa va mwene eyi yina kuhara kuhoroka, tava mu pura asi: “Hompa, tu va rwanese norufuro ndi?” 50  Gumwe gwawo ta tete* ko kutwi kokorulyo komukareli gomupristeli gomunene, taku ndembuka ko. 51  Nye Jesus ta mu tantere asi: “Makura!” Ta kwata etwi, tali veruka. 52  Jesus ta tantere vapristeli novakurona wovanomeni wontembeli ntani nomasimbi ava va mu wizilire asi: “One kuna wizire nge nonomfuro nonomuramu ngwendi moomu ava wizire munamahaka ndi? 53  Apa ngani kara none nkenye ezuva montembeli, oku tani mu rongo, kapi mwa kwete nge. Nye esi siruwo seni nononkondo domundema.” 54  Makura tava mu kwata, tava mu twara kembo lyomupristeli gomunene, nye Peturusa kwa mu kwamenene koure. 55  Apa va hwamekere mundiro pokatji keharango nokuhingira kumwe, Peturusa nage kumwe nawo ga hingilire. 56  Nye mukareli gomukadona apa ga mu mwene ana hingire komundiro, ta mu tarurura makura ta tanta asi: “Mugara ogu nage kumwe nendi ga kere.” 57  Nye age ta patana asi: “Ove mukadi, ame ogo muntu kapi na mu diva.” 58  Konyima zokaruwogona, muntu gwapeke ta mu mono nokutanta asi: “Nove gumwe gwawo.” Nye Peturusa ta tanta asi: “Ove mugara, ame kapisi gumwe gwawo.” 59  Eyi pwa pita siruwo sokuhura ngwendi povili ngoso, mugara gumwe ta yi pameke asi: “Yosili, mugara ogu nage kumwe nendi ga kere, yeeyi age Mugalireya!” 60  Nye Peturusa ta tanta asi: “Ove mugara, kapi nina diva asi yisinke ono kuuyunga.” Poopo ngoso, age simpe kuna kuuyunga, sikondomboro ta si zigi. 61  Hompa ta piruka nokutara Peturusa, makura Peturusa ta diworoka nonkango edi ga mu tanterere Hompa asi: “Naina, sikondomboro aso sa hana kuziga, ove no ka patana nge rutatu.” 62  Ta pwaga ponze, ta ka lira unene. 63  Vagara ava va kwete Jesus ta va tameke kumuswaura nokumutoona, 64  konyima zokumukudumika kosipara, tava mu toona noku mu pura asi: “Nsene asi ove muporofete, tu tantera asi yilye ogu ana kutoona?” 65  Ntani awo kwa mu rundilire yininke yoyinzi. 66  Apa lya sire ezuva, masimbi novapristeli wovanene novalirongi womatjangwa kwa pongere makura tava mu twara mosigongi sawo nokutanta asi: 67  “Tu tantera nsene asi nyove Kristusa.” Nye age ta va tantere asi: “Nampili ni mu tantere kapi nomu yi pura. 68  Ntani hena, nsene nani mu pura, kapi nomu limburura nge. 69  Kutunda apa, MunwaMuntu nga ka hingira korulyo rwaKarunga Munankondo nadinye.” 70  Apa va yi zuvhire eyi, tava mu pura asi: “Ove ngoso MunwaKarunga ndi?” Age ta va limburura asi: “Moomu muna yi tanta, yimo nyame.” 71  Awo tava tanta asi: “Umbangi musinke hena tuna hepa? Tuna yi lizuvhire nyamwetu mokana kendi.”

Nonkango dokonhi

Ndi “murugani.”
MoRugereka asi “rukokotwa.”
“‘Nkinda’ kwa fanekesa mpango zaKarunga mokupulisira Jesus a fe morwa kumurundira asi kwa swawire Karunga.”
Ndi “kamuna.”