Buke zaRukasa 20:1-47

  • Jesus tava mu pura ntundiliro zononkondo dendi (1-8)

  • Sifanekeso sovanasikunino wovadipagi (9-19)

  • Karunga ntani hompa gwaRoma (20-26)

  • Epuro lyokuhamena evhumbuko (27-40)

  • Kristusa munwaNdafita ndi? (41-44)

  • Takameseni kuhamena valirongi womatjangwa (45-47)

20  Ezuva limwe, apa ga rongere vantu montembeli nokudivisa mbudi zongwa, vapristeli wovanene novalirongi womatjangwa nomasimbi kwa mu wizilire,  tava ya mu pura asi: “Tu tantera, nononkondo musinke o rugana yininke eyi? Yilye ogu ga ku pa nonkondo edi?”  Age ta va limburura asi: “Name tani mu pura ko epuro makura mu limburure nge.  Ekuho lyaJohanesa kwa tunda meguru ndi kovantu?”  Makura tava tameke kuliyonga vene navene asi: “Nsene natu tanta asi ‘kwa tunda meguru,’ ta tu pura asi ‘morwasinke nye mwa dilire kumupura?’  Ano nsene natu tanta asi ‘kovantu,’ vantu tava tu toona nomamanya, yeeyi awo kwa pura asi Johanesa muporofete.”  Makura tava limburura asi kapi va diva oku lya tundilira.  Jesus ta va tantere asi: “Name kapi nani mu tantera asi nononkondo musinke ani rugana yininke eyi.”  Makura ta tameke kuvatantera sifanekeso esi asi: “Mugara gumwe kwa wapaikire sikunino soyindjembere makura ta si gava kovarugani womosikunino va si takamese, mwene makura ta zi kosirongo sokoure, ta ka kara ko siruwo sosire. 10  Posiruwo sokuzangura, ta tumu mukareli gwendi kovarugani womosikunino va ka mu pe ko enyango. Nye varugani owo tava mu toona, tava mu sigi a tengure mawoko-woko. 11  Ta tumu ko hena mukareli gwapeke. Nage tava ka mu toona noku mu swaura makura tava mu sigi a tengure mawoko-woko. 12  Ta tumu ko hena gwautatu, awo tava ka mu remeka noku mu tjida mo. 13  Makura mwenyasikunino ta lipura asi: ‘Yisinke nani rugana? Tani tumu ko munange ogu na hara unene. Age nampo nava ka mu fumadeka.’ 14  Apa varugani womosikunino va mu mwene, tava liyongo asi: ‘Yige mupingi googu. Tu mu dipageni makura upingwa ngau kare wetu.’ 15  Tava mu zugumine ponze zosikunino makura tava mu dipaga. Yisinke nga ya va rugana mwenyasikunino? 16  Age nga wiza ta ya dipaga varugani owo nokusigava kwava wopeke.” Apa va yi zuvhire eyi tava tanta asi: “Oyo nokuvhura si kuhoroka!” 17  Nye age ta va tara makura ta tanta asi: “Yisinke ayi tanta eyi va tjanga asi: ‘Emanya eli va zumbire vatungi, yilyo lya ya kara emanya lyemekovhu’?* 18  Nkenye ogu nga gwira pemanya eli, nga tekauka. Ano ogu nga li gwira, nga myoka.” 19  Poopo ngoso, valirongi womatjangwa novapristeli wovanene tava papara mpito va mu kwate, morwa va divire asi sifanekeso oso yiwo sa tembe nye kwa tjilire vantu. 20  Awo kwa paparere mpito makura tava tumu vagara vamwe ava va futire va ka lininkise asi awo vahungami, yipo va kwate Jesus mononkango,* va ka mu gave komupangeli. 21  Makura tava mu pura asi: “Murongi, ose twa diva asi ove kuuyunga nokuronga nawa ntani kapi wa paka mpongo, nye ove kuronga nzira zaKarunga mouhunga: 22  Va yi pulisira* kufutira hompa gwaRoma* mutero ndi hawe?” 23  Nye age ta dimburura uyilipaki wawo, ta va tantere asi: 24  “Likideni nge edenali.* Efano eli nedina eli va tjanga po lyalye?” Awo tava limburura asi: “Lyahompa gwaRoma.” 25  Age ta va tantere asi: “Omu futire hompa gwaRoma eyi ya mu hamena, ano Karunga nage yeeyi ya mu hamena.” 26  Kapi va vhulire kumukwata mononkango komeho zovantu, nye tava tetuka kelimbururo lyendi makura tava mwena. 27  Nye Vasadukayi ava va dilire kupura mevhumbuko, tava wiza, tava ya mu pura asi: 28  “Murongi, Mosesa kwa tjenge asi: ‘Mugara nsene a fa a sige po mukadi age ga hana vana, mumbyendi gomugara* ga hepa kukwara swara zendi, a retere po mukurwendi vana.’ 29  Pwa kere vagara ntambali. Mbeli kwa kwere, nye ta fu, age ga hana vana. 30  Ano gwauvali 31  nogu gwautatu tava kwara mukadi ogo, dogoro noku kogu gwauntambali, nye navenye kwa fire va hana kusiga po vana. 32  Moruhura, mukadi nage ta ya fu. 33  Makura pevhumbuko, mukada yilye nga ka kara? Yeeyi navenye ntambali kwa mu kwere.” 34  Jesus ta va tantere asi: “Vantu womouzuni* ou kukwara ntani kuvapangera mononkwara, 35  nye ava va wapera uzuni wokomeho nava ngava ka vhumbura koufe kapi ngava likwara. 36  Awo kapi ngava ka fa hena, yeeyi ngava kara ngwendi vaengeli ntani ngava kara vana vaKarunga morwa ngava ka va vhumbura. 37  Nye kuhamena evhumbuko lyovafe, Mosesa ga yi zeresa mosihorokwa sosihwa somega, apa ga tumbwire asi Jehova, ‘Karunga gwaAbirahamu naKarunga gwaIsaka naKarunga gwaJakopo.’ 38  Age Karunga govanamwenyo, nye kapisi govafe, yeeyi navenye kwendi vanamwenyo.”* 39  Vafalisayi vamwe makura tava tanta asi: “Murongi, ono uyunga nawa.” 40  Yeeyi kapi va vhulire kumupura hena nampili epuro limwe. 41  Age ta va pura asi: “Morwasinke nye ava uyungire asi Kristusa munwaNdafita? 42  Yeeyi Ndafita mwene kwa uyungire mobuke zoMapisarome asi: ‘Jehova kwa tanterere Hompa gwange asi: “Hingira korulyo rwange 43  dogoro ngani ture nonkore doge ngosilyatero sonompadi doge.”’ 44  Nsene asi Ndafita kwa tumbwire Kristusa asi Hompa, ngapi hena na kara munendi?” 45  Awo vantu navenye kuna kupurakena, ta tantere varongwa vendi asi: 46  “Takameseni kuhamena valirongi womatjangwa ava ava gendagura moyikoverero yoyire ntani ava va hara va va morore nefumadeko pomarandesero noyipundi yokomeho* monosinagoge nomavango gomawa poyipito 47  ntani awo kugusa mambo* govafisavaya vawo nokukanderera makanderero gomare va limonekese kovantu. Awo ngava va pangura momunene.”

Nonkango dokonhi

Ndi “emanya lyomulyo po.”
Ndi “va ninke Jesus a uyunge yininke yepuko.”
Ndi “ya wapa.”
MoRugereka asi “Kayisa.”
Simaliwa sosisiliveli soVaroma.
Bibeli kapi za yi zeresa nsene asi muntu ogo mumbyamuntu ndi mukurwamuntu.
Ndi “kuliza nomutaro gwendi.”
Ndi “yoyiwa po.”
Ndi “yiweka.”