Josuwa 5:1-15
5 Vahompa woVaamoli ava va kere koUtokero* womukuro gwaJorodana novahompa Vakanani ava va kere pepi nefuta, tupu va zuvhire asi Jehova kwa pwilika mema gomomukuro gwaJorodana komeho zoVaisraeli dogoro tava mana kuruta, awo kwa tukukire ntani kapi va kere nouradi wokurwisa Vaisraeli.
2 Posiruwo oso, Jehova kwa tanterere Josuwa asi: “Rugana nombere doutwe o rugane vamba vagara woVaisraeli sikando sauvali.”
3 Makura Josuwa ta rugana nombere doutwe, ta rugana vamba vagara woVaisraeli moGibeya-hararoti.*
4 Josuwa kwa va rugene vamba, morwa vagara navenye ava va tundire moEgipite ndi vagara navenye ava ngava ru yita kwa fililire momburundu konyima zapa va tundire moEgipite.
5 Vantu navenye ava va tundire moEgipite kwa va rugene vamba, nye navenye ava va hampurukilire momburundu konyima zapa va tundire moEgipite kapi va va rugene yovamba.
6 Vaisraeli kwa gendere momburundu nomvhura 40 dogoro vantu navenye ndi vagara ava ngava ru yita ava va tundire moEgipite tava fu, morwa kapi va limburukwire Jehova. Jehova kwa va tanterere asi awo kapi ngava mona sirongo esi ga tumbwidilire Jehova ozinyakurwawo asi nga si tu pa, aso sirongo esi sa zura masini nousi.
7 Makura vana vawo yiwo va va pinganenene po. Josuwa kwa va rugene yovamba, morwa awo kapi va va rugene vamba apa va kere morugendo.
8 Apa va mene kurugana vantu navenye vamba, tava kara poopo pokamba zawo dogoro tava veruka.
9 Makura Jehova ta tantere Josuwa asi: “Naina nina mu gusa eswau eli mwa kere nalyo moEgipite.” Yipo nye, evango olyo kulitumbura asi Giligali* dogoro nanaina.
10 Vaisraeli kapi va dirwire kamba zawo poGiligali, makura tava dana sipito soPaska kongurova mezuva 14 lyokwedi oko, momazana gaJeliko.
11 Makura ezuva eli lya kweme ko konyima zoPaska, yipo va tamekere kulya nondya domosirongo oso. Awo kwa lire mboroto zokudira yihaheso nombuto zokukanga mezuva olyo.
12 Ano ezuva eli lya kweme ko, apa va tamekere kulya nondya domosirongo, mana tazi hageke kugwa. Vaisraeli kapi va gwene hena mana nye awo kwa tamekere kulya nondya domosirongo saKanani momvhura ozo.
13 Apa ga kere Josuwa pepi naJeliko, ta kankuka, ta mono mugara ana sikama komeho zendi age ana kwaterere rufuro mokuwoko kwendi. Josuwa ta mu zire, ta mu pura asi: “Ove kuna hama kwetu ndi kononkore detu?”
14 Makura age ta limburura asi: “Hawe, ame kuna wiza ngomupitisili* govakwayita vaJehova.” Makura Josuwa ta ligandere pevhu makura ta linyongamene, ta tanta asi: “Yisinke ana hara hompa gwange kutantera mukareli gwendi?”
15 Makura mupitisili govakwayita vaJehova, ta limburura Josuwa asi: “Hutura yicamakaku konompadi doge, morwa ove kuna sikama pevega lyokupongoka.” Makura Josuwa ta yi rugana.
Nonkango dokonhi
^ MoRuhebeli asi “koyiha yefuta.”
^ Kutanta asi “Ndundu zoyipapa yokougara.”
^ Kutanta asi “Kugusa ko.”
^ Ndi “ngomukurona.”
