Buke zaJohanesa 5:1-47

  • MoBetesita tava verura mo mugara ogu ga verere (1-18)

  • Jesus kwa gwana nonkondo koGuhwe (19-24)

  • Vafe ngava zuvha ezwi lyaJesus (25-30)

  • Maumbangi kuhamena Jesus (31-47)

5  Konyima zoyo, tapa kara sipito soVajuda, Jesus makura ta kanduka a ze koJerusarema.  Pepi nEvero lyoNonzwi eli lya kara moJerusarema, kwa kere po sidiva ava tumbura moRuhebeli asi Betesita esi da kundurukidire nomukara ntano.  Monomukara odo yimo ngava rara vaveli novatwiku noyirema.  *——  Amo kwa kere mo mugara ogu ga verere nomvhura 38.  Apa Jesus ga mwene mugara ogo kuna rara pevhu nokudimburura asi age kwa vera nomvhura dononzi, ta mu pura asi: “Ono hara kuveruka?”  Mugara gokuvera ta limburura asi: “Tate, kwato ogu a vatere nge ni ze mosidiva apa mema ava ga gumagura, apa nani ninka asi ni ze mo, gumwe nare ana howo kuza mo.”  Jesus ta mu tantere asi: “Katuka! Damuna uro* woge o ze.”  Poopo ngoso, mugara ogo ta veruka, ta damuna uro* wendi nokutameka kugenda. Ezuva olyo kwa kere Esabata. 10  Vajuda tava tantere mugara ogu va verwire asi: “Naina Esabata, kapi va yi pulisira o simbe uro.”* 11  Nye age ta va limburura asi: “Ogu ana verura nge yige ana tantere nge asi: ‘Damuna uro* woge o ze.’” 12  Tava mu pura asi: “Yilye ogo mugara ana ku tantere asi: ‘U damuna o ze’?” 13  Nye mugara ogu va verwire kapi ga mu divire asi yige yilye, morwa Jesus kwa tundire po usimbu nokuza mombunga. 14  Kutunda opo, Jesus ta ka gwana mugara ogo montembeli, ta mu tantere asi: “Mokumona asi ono veruka, wa ha ka zona hena, neyisi ngayi ka kuhorokera yoyidona unene kupitakana eyi.” 15  Mugara ogo ta tundu po noku ka tantera Vajuda asi Jesus yige ana mu verura. 16  Eyi yiyo nye Vajuda va rwaneserere Jesus morwa kwa rugene yininke eyi mEsabata. 17  Nye age ta va limburura asi: “Otate kurugana nkenye apa, name yimo ani rugana.” 18  Eyi yiyo nye Vajuda va harerere kumudipaga, morwa awo kwa gazarere asi age kuna kuteza po veta zEsabata ntani asi age kuna kulihetakanesa naKarunga morwa yeeyi ga tumbwire Karunga asi oGuhwe. 19  Jesus ta va limburura asi: “Yosili nina kumutantera asi Muna kapi a rugana tupu yininke mwanyamwendi, nye age kurugana eyi a mono Guhwe kuna kuyirugana. Yeeyi nkenye eyi a rugana Guhya, Muna nage yiyo a rugana. 20  Guhya kwa hara Muna ntani kumulikida nayinye eyi a rugana, ntani nga mu likida yirugana yoyinene kupitakana eyi yipo ngomu tetuke. 21  Ngwendi moomu tupu Guhya a pindura vantu koufe noku va pa eparu, Muna nage kugava eparu kwankenye ogu ana hara. 22  Guhya kwato ogu a pangura nye kwa gava nonkondo nadinye dokupangura koMuna, 23  yipo navenye ngava fumadeke Muna ngwendi moomu ava fumadeke Guhya. Nkenye ogu ga dira kufumadeka Muna, kapi ga fumadeka Guhya ogu ga mu tuma. 24  Yosili nina kumutantera asi, nkenye ogu a purakene nonkango dange noku di limburukwa nga gwana mwenyo gwanarunye, Karunga kapi nga mu pangura nye nga fana ngwendi muntu ogu ga fa yiyo ana vhumbuka. 25  “Yosili nina kumutantera asi siruwo tasi wiza, nasene sina siki, apa vafe ngava zuvha ezwi lyaMunwaKarunga ano ava va mu purakenene nokumulimburukwa ngava paruka. 26  Ngwendi moomu tupu Guhya ga kara nononkondo dokugava eparu, naMuna nage ga mu pa nonkondo dokugava eparu. 27  Ntani kwa mu pa nonkondo dokupangura yeeyi age MunwaMuntu. 28  Ya ha mu tetura eyi, yeeyi siruwo tasi wiza apa navenye ava va kara monontoko ngava zuvha ezwi lyendi 29  makura tava pwaga mo, ava va rugana yoyiwa ngava vhumbukira mwenyo gwanarunye ano ava va rugana yoyidona ngava vhumbukira mpanguro. 30  Kapi ani rugana yininke mwanyamwange. Ame kupangura kuliza neyi ani zuvhu, ntani ame kupangura pauhunga yeeyi kapi ani rugana yanyamwange nye kurugana mpango zogu ga tuma nge. 31  “Nsene ni ligavera nyamwange umbangi, umbangi wange kapisi wousili. 32  Kweli ogu a gava umbangi kuhamena nge, ntani na yi diva asi umbangi ou a gava kuhamena nge wousili. 33  One kwa tumine vagara kwaJohanesa, ntani age kwa gava umbangi wousili kuhamena nge. 34  Nye ame kapi na hepa muntu a gavere nge umbangi, nye yininke eyi kuna kuyimutantera yipo ngava mu parure. 35  Johanesa kwa kere ngwendi ramba zokutwera zi minikire, one kwa here kuhafera karuwogona mouzera wendi. 36  Nye ame nina kara noumbangi wounene kupitakana wendi, yeeyi yirugana eyi nina kurugana kwa yi pa nge Otate asi ni yi sikise mo, ano yirugana eyi kugava umbangi asi Otate yiwo va tuma nge. 37  Otate ava va tuma nge kwa gava umbangi kuhamena nge. One kapi mwa va mona ndi mu zuvhe rumwe ezwi lyawo, 38  ntani kapi mwa tambura nonkango dawo, morwa kapi mwa pura ogu va tuma. 39  “One kukonakona Matjangwa morwa muna hara kukagwana mwenyo gwanarunye, ano ago* kugava umbangi kuhamena nge. 40  Nye one kapi muna hara kuwiza kwange yipo ngomu gwane mwenyo. 41  Ame kapi na hara vantu va fumadeke nge, 42  nye ame na yi diva asi one kapi mwa hara Karunga. 43  Ame kwa wizira medina lyoTate, nye one kapi mwa tambura nge. Nye nsene gumwe a wiza medina lyamwene, one tomu mu tambura. 44  Ngapi omu nomu pura mwange, nsene asi one kwa hara kulifumadeka-fumadeka nyamweni mevango lyokufumadeka Karunga? 45  Mwa ha gazara asi nyame ngani ninka Otate va mu pangure nye matjangwa gaMosesa ogu mwa pura yigo aga mu pangura. 46  Nsene asi one sili kwa pura mwaMosesa, ngano mwa pura hena mwange, morwa age kwa tjenge kuhamena nge. 47  Nye nsene asi kapi mwa pura mweyi ga tjenge, ngapi nye omu nomu pura eyi nina kumutantera?”

Nonkango dokonhi

Ndi “mbete.”
Ndi “mbete.”
Ndi “mbete.”
Ndi “mbete.”
Kwa tamba Matjangwa.