Vakolinte vauvali 1:1-24

  • Makundo (1, 2)

  • Karunga kutuhengagwida momaudigu getu nagenye (3-11)

  • Paurusa ta rundurura rugendo rwendi (12-24)

1  Mbilive ezi kuna kutunda kwaPaurusa, ogu ga kara mupositoli gwaJesus Kristusa keharo lyaKarunga ntani kwaTimoteusa mukwetu zi ze kombungakriste zaKarunga zomoKolinte ntani kovapongoki navenye womoAkaya:  Karunga Guhyetu naHompa Jesus Kristusa ngano va mu fire nkenda unene nokumupa mbili.  Va mu hamberere Karunga, Guhya Hompa gwetu, Jesus Kristusa, Guhya ogu ga kara nonkenda zonene ntani Karunga ogu a hengagwida vantu momaudigu nagenye.  Karunga kutuhengagwida* momaudigu* getu nagenye yipo nose tu vhure kuhengagwida wopeke mwankenye udigu* nehengagwido eli atu gwana kwendi.  Ose kuligwanekera nomahepeko gomanzi morwa yeeyi twa kara varongwa vaKristusa ntani ose kugwana ehengagwido lyenzi morwa Kristusa.  Ose nsene tu ligwanekera nomaudigu,* one tomu gwana ehengagwido neparuro, ano nsene va tu hengagwida, none tomu gwana ehangagwido eli ngali mu vatera mu lididimikire maudigu ngwendi gaaga atu ligwanekere nago nose.  Ehuguvaro lyetu mweni kwa pama ntani twa yi diva asi moomu muna kuhepa ngwendi nyose yimo ngava mu hengagwida none ngwendi nyose.  Vakwetu, tuna hara mu dive kuhamena maudigu aga twa ligwanekerere nago momukunda gwaAsiya. Yininke eyi kwa tu digoperere unene, kapi twa vhulire kuyilididimikira pwanyamwetu ntani kapi twa divire nsene asi natu paruka ndi hawe.  Ose kwa gazarere asi tatu fu. Eyi ya horokere kwa tu ronga tu dire kulihuguvara nyamwetu nye tu huguvare mwaKarunga ogu a gava mwenyo kovafe. 10  Age kwa tu parura mosimpagwa sonomfa ntani nga tu parura hena, ose twa mu huguvara asi nga twikira kutuparura. 11  One kuvhura kutuvatera pokutukanderera po kwaKarunga. Morwa nsene va tu kanderera po wovanzi, Karunga nga va zuvha ntani nga tu vatera, ano eyi ngayi ninkisa wovanzi va pandure Karunga. 12  Ose kulikanganga kweyi twa kara nezwi lyewa lyokomutjima, morwa twa kuhuka pamukaro twa hana uyilipaki mouzuni ou nye unene po mokatji keni, ose kwa kara nonkenda ngwendi Karunga ntani kapi twa huguvara mounongo wovantu. 13  Yeeyi ose kuna kumutjangera kuhamena yininke eyi nomu vhura kuresa* nokukwata egano ntani nina huguvara asi ngomu twikira kukwata nawa egano yininke eyi,* 14  ngwendi moomu mwa yi kwata egano asi ose elikangangero lyeni, nose ngatu ka mu likangangera mezuva lyaHompa gwetu, Jesus. 15  Morwa na kere nehuguvaro eli, ame kwa here kuwiza kweni sikando sauvali yipo mu ya hafe hena,* 16  yeeyi ame kwa here kuyamudingura monzira zange zokuza koMakedoniya ntani pokukatengura koMakedoniya makura ngomu ya sindikire nge ko koJudeya. 17  Apa na tulire po etokoro eli, ame kapi nayi tere asi yininke yomawoko-woko ndi asi ni kare nomagano gopasintu ni uyunge asi “nhi, nhi” ano konyima ni ya uyunge asi “hawe, hawe.” 18  Huguvareni nonkango detu ngwendi moomu omu huguvara Karunga. Ose nokuvhura si tu uyunge asi “nhi” ano konyima asi “hawe.” 19  Ntani hena, MunwaKarunga, Jesus Kristusa ogu twa mu udisira name naSilivanusa* ntani naTimoteusa, kapi a uyunga asi “nhi” makura a uyunge hena asi “hawe” nye “nhi” zendi nkenye apa ngazi kara “nhi.” 20  Yeeyi matumbwidiro gaKarunga nagenye, kwa ya sika mo* kupitira mwaJesus. Eyi yiyo nye atu uyungire kupitira mwendi asi “Amen” kwaKarunga yipo tu yererepekere po Karunga. 21  Nye Karunga yige ga tu pa ehuguvaro asi none ntani nose kwa hamena kwaKristusa ntani yige ga tu horowora. 22  Age kwa tu tura hena sinongweneso. Sinongweneso oso kuna kara mpepo zokupongoka ezi za kara monomutjima detu. Pokurugana ngesi age kwa tu pa ehuguvaro lyeyi yokomeho.* 23  Karunga yige mbangi zange asi eyi nina dilire kuwiza simpe koKolinte yipo ni dire kuyamuguvisa. 24  Kapisi asi ose kuna hara kumupangera kuhamena epuro lyeni nye ose varugani kumwe none yipo mu hafe, morwa one simpe ha mwa korera morwa epuro lyeni.

Nonkango dokonhi

Ndi “kutukorangeda.”
Ndi “momahepeko.”
Ndi “ehepeko.”
Ndi “nomahepeko.”
Ndi nampo asi “eyi mwa diva nawa nare.”
MoRugereka asi “dogoro kouhura.”
Ndi nampo asi “yipo mu ya gwanene mo uwa sikando sauvali.”
Ogu ava tumbura hena asi Sirasa.
MoRugereka asi kwa ya kara “nhi.”
Ndi “umbangi womfeto zokomeho.”