Hulda kwa sikisire mo sitambo sendi
NSENE asi wa dingura rumwe sirudi sosinunu ava tumbura asi Sangir Besar moIndonesia, nampo wa mwene vanavazinyetu wovakadi vatatu konontere defuta. Vantu woposirudi oso kwa va divira kosirugana sawo sokuzuvhisa morwa kuvatera vantu vakwate egano Bibeli. Nye posiruwo oso, awo kwa rugene sirugana sapeke.
Sirudi ava tumbura asi Sangir Besar sakara korwamukuro gwaIndonesia
Pomuhowo, awo kwa gendere momema makura tava gwana mamanya goudigu noku ga twara konontere defuta. Mamanya gamwe kwa kere manene ngwendi mbara zokusanga. Kutunda opo, vakadi owo kwa hingilire poyipundi yoyinunu yokuhonga ntani kwa ruganesere nohamara yipo va bamagure mamanya ga kare gomanunu kupitakana euta lyonhunhwa. Konyima zoyo, yipo va tulire mamanya gomanunu poyindeyindeyi noku ga simba dogoro apa va ka rondere poyitrapa va ka sike oku va kere. Makura yipo va tulire mamanya ogo mononsako dononene edi ngava rondeke momaroli, yipo va ka ga ruganese mokuwapeka sitaura.
Hulda kuna kupongaika mamanya konontere defuta
Hulda kwa kere gumwe govanavazinyetu owo wovakadi. Ukaro wendi kwa mu pulisilire a ruganese siruwo sosinzi kosirugana oso kupitakana vakwawo. Rorunzi age nga ruganesa yimaliwa nayinye eyi nga gwana yipo a futire yihepwa yemepata lyendi. Nye nampili ngoso, age kwa here hena kupungura ko yimaliwa yongandi yipo a yi ruganese koyininke yapeke. Age kwa here tablet yipo nga vhure kuruganesa ko JW Library® app. Hulda ga yi divire asi novidiyo ntani nayimwe ya kara koapp ozo ngayi mu vatera yipo a zuvhisire ko wopeke ntani yipo a kwate egano Bibeli.
Hulda nga rugana novili mbali nkenye ngurangura ure wokwedi noharufa pokubamagura mamanya gomanzi yipo a zwide eroli lyenunu. Ano konyima ga kere noyimaliwa yokugwanena po eyi ga rende tablet.
Hulda notablet zendi
Hulda kwa tanta asi: “Nampili ngomu ngani roroka unene nokuzuvha kukora morwa kubamagura mamanya, ame kwa divarere usimbu kukora apa na ruganesere tablet ezi zompe ezi za vatererenge yitompoke nge nawa mokuzuvhisa ntani yi rerupire nge kuliwapaikira mapongo.” Ntani mokumona asi mapongo kwa pitilire koyikwakonentu, age kwa uyunga asi tablet kwa mu vaterere apa wa tamekere uvera woKorona. Tatu hafesa ko Hulda kweyi ga sikisire mo sitambo sendi.
