Ame kwa hampurukira nge mosirongo saLondon moIngiranda, momukunda gwaPaddington. Ame kwa tungire nonane novakuru vange vatatu wovakadona. Otate kapi ngava kara nose nkenye apa morwa unkorwe wawo.

Apa na kere munona, onane kwa rongere nge kukanderera nkenye masiku. Ame kwa kere noBibeli ezi za kere tupu nobuke zoMapisarome, ntani kwa zi ninkire zi kare nonsumo yipo ni vhure kudidimba. Tani diworoka apa na resere nonkango mobuke zimwe edi da kakaterere momagano gange asi: “Ezuva limwe uzuni ngau haga.” Nonkango odo ngadi ninkisa nge ni dire kuponyoka. Tani yi pura asi: ‘Yinzi ya hamena mo meparu. Morwasinke na karera po?’ Ame kapi na here kufa!

Yipo na litulire mo unene moumpure. Ngani hetekere ko kuuyunga novafe nokukadingura pomayendo kumwe novanasure vakwetu ntani nokutarera nomuvi dokutjilisa. Ose twa yi divire asi ayo kuhafesa nye hena kutjilisa.

Apa na kere nonomvhura 10, yipo na kere nonkareso zourwanesi. Tani tameke kukoka makanya, makura tani kara mupika gwago. Konyima, tani ya tameke kukoka epangwe. Apa na kere nonomvhura 11, ngani nu yikorwesa. Nampili ngomu na nyengere omu aga zuvhika, nye na here kukorwa. Ame kwa here hena nomusika nokudana. Ngani zi konopati nokonombaha. Ntani ngani hene masiku nokukatengura monongura. Apa ngali si ezuva, kapi ngani zi kosure morwa eroroko. Apa ngani zi kosure, ngani nu yikorwesa komeho tu ze monkondwarongero zapeke.

Mvhura zange zokuhulilira kosure, ame kwa dopere. Morwa kudira kuzuvha kwange, eyi kwa handukisire onane nokuvaguvisa. Ose ngatu litangwisa, yipo na tundire mo membo. Tani ka tunga namumati gwange Tony. Age kwa kere mukorokotji nonyanya ntani nga randesa epangwe. Apa na kere nonomvhura 16 yipo na kere nezimo nokuhampuruka mukeke gomumati.

Sikando sange sokuhova na ligwene noNombangi paapa na kere mohositera zovanziya wovadike. Name kwa pere nge nzugo epangero. Vakadi vavali woNombangi ngava wiza nkenye apa va ya dingure vazinya owo wovadike. Ezuva limwe name tani lipakerere nawo. Ame kwa here kulikida Nombangi asi mepuko va kara. Nye awo kwa limbwilire mapuro gange nagenye kutundilira moBibeli monkedi zombili zokuzera. Awo vantu wombili, ano eyi kwa kokere nge. Yipo na tokwere kulironga nawo Bibeli.

Ame kwa lirongere yimwe moBibeli eyi ya rundwilire eparu lyange. Kutunda unona, ame kwa tjilire kufa. Nye ngesi na diva eyi ga rongere Jesus kuhamena evhumbuko. (Johanesa 5:28, 29) Ntani na ya lirongere asi Karunga kupakera nge mbili. (1 Peturusa 5:7) Nonkango domwaJeremiya 29:11 kwa ya kundamene nge unene, edi adi tanta asi: “Nyamelike na diva magazaro aga na kara nago gokumuhamena, magazaro gokumuretera erago kapisi simpagwa, magazaro gokuhamena yokomeho eyi muna ndindire.” Makura tani tameke kukara nehuguvaro lyokukaparuka narunye moParadisa apa pevhu.—Episarome 37:29.

Nombangi daJehova kwa likidire nge eharo lyosili. Sikando sange sokuhova kuza kepongo, awo kwa ka tekwire nge monkedi zeharo. (Johanesa 13:34, 35) Eyi ya lisigire nomu ngava tekura nge kongereka ezi ngani zi nare. Nombangi kwa tambwire nge kuliza noukaro wange. Awo kwa pere nge siruwo nokupakera nge mbili, ngomu na hepere evatero. Ngesi kulizuvha asi ame kwa hamena kepata lyenene lyeharo.

Melirongo lyange lyoBibeli, kwa dimbwilire asi na hepere kutura po marunduruko meparu lyange yipo ni paruke kuliza nonompango daKarunga. Kwa digoperere nge kuhageka kukoka makanya. Ntani na ya dimbwilire asi nomusika edi ngani purakene ngadi pindura eharo lyange lyokukoka epangwe, yipo na hagekere kudipurakena. Mokusikisa mo oyo, na hepere kuhageka kuza konopati nokonombaha, oku nga ku ninkisa nge ni hare kunwa yikorwesa. Yipo na ya tulisire po vakaume wovape ava ngava vatere nge ni kare nonkareso zongwa.—Yisewe 13:20.

Tony nage ga tamekere kulironga Bibeli noNombangi daJehova. Ngomu Nombangi da limbwilire mapuro gendi kutundilira moBibeli, nage ga ya tambwire usili. Age kwa tulire po marunduruko meparu lyendi: ta ya hageke kukara novakaume vendi wonyanya woukorokotji ntani wokukoka epangwe. Mokuhafesa Jehova, natuvenye twa dimbwilire mulyo gokurundurura nkareso zetu zokunyata ntani kwa here kurerera munwetu moukaro wouwa. Ano momvhura 1982, yipo twa likwere.

Tani diworoka apa na rugene mapaparo moyirongwa yomoRuhungu nomoAwake! * eyi ya zogera marunduruko aga va tulire po vantu ava va kere nonkareso ngwendi zange. Yihonena yawo kwa korangedere nge. Ayo kwa nkondopekere nge ni twikire kutura po marunduruko. Ame ngani kanderere kwaJehova a twikire kuvatera nge. MwaPembankuru 1982, name naTony yipo twa gwene ekuho.

Kukara nelikwatakano naJehova Karunga, kwa popera nge. Name naTony kwa limonena evatero lyaJehova moyiruwo yomaudigu. Ose twa lironga kuhuguvara mwaKarunga moyiruwo yangoso, ntani kulizuvha asi age kupopera epata lyetu.—Episarome 55:22.

Ame ngani hafere kuvatera vana vetu va dive nawo Jehova. Ngesi kulizuvha ruhafo apa ani mono vatekuru vange nawo va diva Karunga.

Ame ngesi kapi nina kara hena nosinka kuhamena meho ndi kufa. Name naTony ngesi kuna kuhafera kukadingura nombungakriste dokulisiga-siga nkenye sivike yipo tu ka di korangede. Ose kulipakerera nawo mokuronga vantu asi nsene va pura mwaJesus, nawo ngava ka hafera mwenyo gwanarunye.