koVaroma 2:1-29
2 Yi kare asi nyove yilye, kapi to vhuru kulipopera nyamoge nsene asi ove kupangura wopeke koyininke eyi o rugana nove, nsene o va pangura, nyamoge ono kulipangura.
2 Nye ose twa yi diva asi Karunga kupangura ava ava rugana yininke eyi, mpanguro zendi kuliza nousili.
3 Ngapi omu no pangura wopeke koyininke eyi o rugana nove, ove kugazara asi ngo henduka mpanguro zaKarunga ndi?
4 Kapi ono yi diva asi age kuna kukulikida nkenda zonene nelididimiko ndi? Kapi ono diva asi Karunga nkenda ana kukufira ntani ana hara kukuvatera o litezurure ndi?
5 Nye morwa ove kwa runda mutwe ntani kapi ono hara kulitezurura, Karunga nga ku tengeka mezuva lyendi lyehandu apa nga pangura pauhunga.
6 Ntani nga futa nkenye ogu kuliza noyirugana yendi.
7 Nga gava mwenyo gwanarunye kwava ava rugana yoyiwa. Vantu vangoso kukondjera uyerere nefumano neparu eli ngali karerera,
8 nye Karunga nga likida ehandu lyendi kwava va hara nomutangu ntani nava ava dili kulimburukwa kousili.
9 Nkenye ogu a rugana yoyidona yi kare asi Mujuda ndi Mugereka, nga ligwanekera noudigu.
10 Nye nkenye ogu a rugana yoyiwa nga gwana uyerere nefumano ntani mbili, pomuhowo Mujuda ntani Mugereka.
11 Yeeyi Karunga kapi ga kara nompongo.
12 Navenye ava ava zono va hana kudiva veta, nga va fa nampili ngomu va dira kudiva veta. Nye navenye ava ava zono awo va diva veta, ngava va pangura kuliza noveta.
13 Karunga kapi a hungameke vantu ava ava purakene tupu veta nye age kuhungameka ava ava sikisa mo veta.
14 Ava va hana asi Vajuda apa ava sikisa mo veta zaKarunga nampili ngomu va dira kudiva veta, eyi kulikida asi veta kwa kara monomutjima dawo.
15 Yirugana yawo kulikida asi veta kwa zi tjanga monomutjima dawo. Ntani ezwi lyawo lyokomutjima kuvapukurura nsene asi yirugana yawo yiwa ndi yidona, monkedi zangesi magazaro gawo kuvaninkisa va dimburure nsene asi awo vanzoni ndi kapisi vanzoni.
16 Eyi ngayi horoka, ezuva eli nga pangura Karunga yininke eyi ava rugana vantu mokahore-hore, kupitira mwaJesus Kristusa. Ezi yizo mbudi zongwa ezi ani zuvhisa.
17 Ove kulitumbura asi Mujuda ntani wa huguvara moveta nokulikangangera mwaKarunga.
18 Wa diva mpango zaKarunga noku tambura eyi ya hungama morwa kwa kuronga Veta.
19 Ntani wa yi pura asi ove kupitisira vatwiku ntani kugava uzera kwava va kara momundema.
20 Ove kupukurura vagova nokuronga vanona morwa wa diva madi gousili nediwo lyomoVeta.
21 Ngapi nye omu o rongo vantu wa hana kulironga nyamoge? Ngapi nye omu o zuvhisire vantu asi: “Walye omu vaka,” nye ove nyamoge kuvaka?
22 Ngapi nye omu o tanta asi: “Walye omu hondere,” nye ove nyamoge kuhondera? Ngapi nye omu o tanta asi ove kwa nyenga vakarunga woyimpempa nye ove kuvaka tuntembeli?
23 Ove kulikanganga morwa wa diva veta zaKarunga, yisinke nye o swaukisire Karunga pokuteza Veta?
24 “Vantu wokonomuhoko kuswaura edina lyaKarunga morwa nkareso zoge,” ngamoomu va yi tjanga.
25 Nsene va kurugana yovamba ngo gwanena mo tupu uwa nsene o kwama veta, nye nsene kuvatuka veta, tayi kara ngwendi kapi va ku rugana yovamba.
26 Nye nsene muntu ogu va dira kurugana yovamba a sikisa mo Veta, ngoso Karunga kapi na mu tara ngwendi muntu ogu va rugana yovamba ndi?
27 Ove kwa kuronga kuhamena vamba ntani Veta, nye kapi o zi kwama. Yipo nye nsene muntu ogu va dira kurugana yovamba a kwama Veta, eyi ana kurugana tayi likida asi ove munanzo.
28 Kukara Mujuda mwene-mwene kapi ya korera kemoneko ntani vamba zene-zene kapisi korutu ava zi rugana.
29 Nye kukara Mujuda mwene-mwene kwa kwatera mo muntu gomonda, vamba zene-zene zokomutjima kupitira mompepo zokupongoka nye kapisi mokukwama Veta. Muntu gwangoso kugwana epandadeko kwaKarunga nye kapisi kovantu.
