Muudisi 5:1-20
5 Wa hepa kutakamesa nkenye eyi o rugana nsene kuna kuza konzugo zaKarunga gousili; ayo ya wapa o ka purakene mevango lyokuzamba nzambo, ngwendi moomu ava yi rugana vantu wovagova, yeeyi awo kapi va diva asi eyi ava rugana yidona.
2 Wa ha genderera kuuyunga ntani gazadara ko komeho o tantere Karunga gousili eyi yina kara momutjima goge, yeeyi Karunga gousili kwa kara meguru, ano ove kwa kara pevhu. Eyi yiyo wa hepera kuuyunga nonkango dononsesu.
3 Yirugana yoyinzi* kuninkisa muntu a kare nomagazaro, ano kuuyunga unene kuninkisa muntu gomugova a uyunge yininke yoyidona.
4 Nsene to tumbwidire Karunga, wa ha liranga mokusikisa mo etumbwidiro olyo, yeeyi Karunga kapi a hafere vantu wovagova ava ava dili kusikisa mo matumbwidiro gawo. Yipo nye, sikisa mo eyi wa tumbwidira.
5 Ya wapa kudira kutumbwidira, mevango lyokutumbwidira o dire kuyisikisa mo.
6 Wa ha pulisira kana koge ka ku ninkise o zone ntani wa ha uyunga komeho zomuengeli* asi kwa lipukire kutumbwidira. Wa ha handukisa Karunga gousili mweyi o uyunga, nsene o yi rugana eyi, age nga ninka nkenye eyi o rugana yi dire kutompoka.
7 Ngwendi moomu tupu yirugana yoyinzi ayi ninkisa muntu a kare nomagazaro, kuuyunga unene nako kwato mulyo. Nye tjireni Karunga gousili.
8 Ya ha kutetura nsene to mono mupangeli momukunda gweni kuna kuhepeka nohepwe nokuvaninkilira mo ntani nokuvatekura momudona. Yeeyi kweli ogu ana kumunomena, ogu ga mu pitakana ntani koveli hena vamwe ava va va pitakana.
9 Ano navenye kuligavera muzangu ogu ava gwana; nahompa nage kulya eyi ayi tundu mepya.
10 Ogu ga hara yimaliwa* ndi ungawo, kapi ngayi mu gwanena po. Eyi nayo kwato mulyo.
11 Moomu lina kuligwederera emona lyomuntu, yimo hena vana kuligwederera vantu ava a rere. Kwato uwa ou a gwanene mo, age kuyitara tupu nomeho.
12 Mupika kurara nompofu dokugwanena po,* yi kare asi ga kara* nonondya dononzi ndi dononsesu; nye nongawo kapi adi rara nompofu dokugwanena po.
13 Ame kwa mona hena sininke simwe sokuguvisa* esi asi horoka: muntu gongawo kulipongaikira emona eli ali mu retere udigu.
14 Emona olyo kulizumbanesa, morwa yininke kapi yina kumugenda po nawa, ano apa nga ya kara nomuna gomugara, emona lyendi lya pwa.
15 Ngwendi moomu tupu muntu ava mu hampuruka ga hana kukara noyuma, apa nga fa kapi nga za noyininke eyi ga ruganena unene.
16 Sininke hena simwe sokuguvisa* esi na mona kuna kara asi: Ngwendi moomu tupu muntu ava mu hampuruka ga hana yuma, apa nga fa kwato eyi nga pitura. Yipo nye, muntu kapi a gwanene mo uwa, mweyi a rugana unene. Yeeyi ayo kwa fana ngwendi kuna kutjida mpepo.
17 Ntani hena, nkenye ezuva age kuguva* nokuvera ntani kuhandauka.
18 Sininke sosiwa po esi na dimburura sesi asi: muntu ga hepa kulya nokunwa ntani nokuhafera eyi ga ruganena unene, posiruwo sosisupi esi ga mu pa Karunga a paruke, yeeyi azo yizo mfeto zendi.*
19 Ntani hena, apa Karunga gousili a gava komuntu ungawo nemona nokumuninka a yi hafere, ga hepa kutambura mfeto ozo* nokuhafera eyi ga ruganena, yeeyi ayo kuna kara uhwi wokutunda kwaKarunga.
20 Yeeyi age kapi a dimburura omu sina kupita siruwo, morwa Karunga gousili kumuninka a hafere eyi a rugana.
