Buke zaMateusa 7:1-29
7 “Hagekeni kupangura, none ngava dire kumupangura,
2 monkedi ezi omu pangura vakweneni, none yimo ngava mu pangura. Sihetekeso esi omu hetekesa, none yiso ngava mu hetekesa.
3 Yisinke no zigira kavambi* meho lyamukweni, nye ove wa hana kumona nkambo ezi zina kara meho lyoge?
4 Ndi ngapi no tantera mukweni asi: ‘Ninka ni ku guse kavambi oko kana kara meho lyoge,’ nye ove nyamoge kuna kara nonkambo meho lyoge?
5 Muyilipaki ove! Hova tanko kuligusa nkambo ezi zina kara meho lyoge yipo o mone nawa ntani nye no wapa kugusa kavambi meho lyamukweni.
6 “Walye omu pe nombwa eyi ya pongoka ndi mu zugumine nombamba deni yinguru, neisi ngayi ga lyatanga nomakondo gayo, yi piruke yi mu lipapagwire po.
7 “Omu hundire ngava mu pe, omu papare ngomu gwane, omu ngongore, makura ngava mu zegwilire.
8 Yeeyi nkenye ogu a hundire kumupa, ogu a papara kugwana, ano ogu a ngongora kumuzegwilira.
9 Opo muna kara, yilye ogu a pe munendi emanya, nsene kuna mu hundire mboroto?
10 Ndi nsene ta mu hundire mfi, a mu pe ezoka?
11 Yipo nye, nsene asi one vadona mwa diva kupa vana veni yininke yoyiwa, ngapi nye omu Guhyeni gemeguru na dira kupa yininke yoyiwa ava ava yi mu hundire?
12 “Nayinye eyi mwa harera vantu asi va yi mu ruganene, none omu yi va ruganene, yeeyi eyi yiyo azi tanta Veta nomatjango goVaporofete.
13 “Omu hwililire mevero lyenunu, yeeyi evero eli lya nenepa nonzira ezi za ngwanyunuka kutwara kokudona, ano sinzi sovantu yimo ava gendi,
14 nye evero lyenunu nonzira ezi za likokera, kutwara komwenyo, ano ava ava zi gendi vasesu.
15 “Takameseni kuhamena vaporofete woyimpempa ava ava uyunga nokurugana yininke eyi ayi va ninkisa va moneke ngwendi nonzwi, nye monda mambungu.
16 Koyiyimwa yawo yiko ngomu va divira. Ee, nani mandjembere kuganyanga komega? Ndi ekuzu kulinyanga kowayi?
17 Mokulifana, nkenye sitji sosiwa kuyima enyango lyewa, ano nkenye sitji sosidona kuyima enyango lyedona.
18 Sitji sosiwa kapi asi vhuru kuyima enyango lyedona, ano si kare sitji sosidona, kapi asi vhuru kuyima enyango lyewa.
19 Nkenye sitji esi asi dili kuyima enyango lyewa, kusiteta nokusizugumina momundiro.
20 Yipo nye, koyiyimwa yawo yiko ngomu va dimbwilira.
21 “Kapisi nkenye ogu a tantere nge asi ‘Hompa, Hompa,’ yige nga za moUhompa wemeguru. Nye, googu tupu a sikisa mo mpango zaTate gemeguru yige nga za mo.
22 Mezuva olyo, wovanzi ngava tantera nge asi: ‘Hompa, Hompa, nani kapisi medina lyoge ngatu porofetere, nokutjida mo nompepo donondona oku tatu rugana yitetu yoyinzi?’
23 Makura ame ntani ngani va tantera asi: ‘Kapi na mu diva ame. Ligoreni nge mu ze kwi, one ava omu vatuka Veta!’
24 “Ano nye, nkenye ogu a purakene kononkango dange edi nokudisikisa mo, kwa lifana nomunandunge ogu ga tungilire nzugo zendi pemanya.
25 Apa mvhura zonene za rokere nzugo zi hanzere ano ekundungu li zi nyungange, azo kwa kere za ndjikiti morwa kwa zi tungira pemanya.
26 Nye ogu a purakene tupu kononkango dange edi, ga hana kudisikisa mo, kwa lifana negova eli lya tungilire nzugo zalyo pomuheke.
27 Apa mvhura zonene za rokere nokuhanzera, ekundungu li zi nyungange, makura tazi mbanduka, nye embandauko lyazo enene lya kere.”
28 Apa Jesus ga mene kuuyunga nonkango edi, mbunga kwa tetukire unene monkedi omu ga va rongere.
29 Yeeyi eyi ga va rongere kwa tundire kwaKarunga, kapisi ngwendi valirongi vawo womatjangwa.
Nonkango dokonhi
^ Ndi “katjigona.”
