Mbilive zokuhova kwaTimoteusa 1:1-20
1 Ame Paurusa ogu ga kara mupositoli gwaJesus Kristusa keharo lyaKarunga Muzowoli gwetu naJesus Kristusa ehuguvaro lyetu, kuna kukutumina mbilive
2 ove Timoteusa* mupuli mukwetu ogu ga kara ngwendi munange:
Karunga Guhya ntani naHompa gwetu Jesus Kristusa va ku fire nkenda unene nokukupa mbili.
3 Moomu tupu na kukorangedere asi o kare moEfeso apa na here kuza koMakedoniya, ngesi tani kukorangeda hena asi o rondore ava ava rongo erongo lyapeke
4 ndi ava ava purakene komasanseko goyimpempa ndi gokuhamena malikwamo gezimo, ayo kwato mulyo morwa ayo kureta nompata ntani kapi ya tunda kwaKarunga morwa ayo kapi ayi nkondopeke epuro lyetu.
5 Sitambo seyi nina kugavera mapukururo* aga yipo asi tu lihare nomutjima nagunye, tu kare nezwi lyewa lyokomutjima ntani nepuro lya hana uyilipaki.
6 Vamwe kwa zumba yininke eyi yiyo va lihameka mononzogera da hana sikwafo.
7 Awo kwa hara kukara varongi woveta zaKarunga* nye awo vene kapi ava kwata egano yininke eyi ava uyunga ndi eyi ava rongo noupampi.
8 Ngomu tupu twa yi diva, Veta ngwa kogu a zi kwama nawa-nawa,
9 age kudimburura asi veta kapi va zi tulira po vantu wokuhungama, nye kwa zi tulira po ava ava dili kukwama veta nava ava rwanesa, vadinikarunga novananzo nava ava sigi vakwawo* nava ava sense yokupongoka nava ava dipaga vaguhya novazinya ndi vantu wopeke,
10 ava ava hondere* ntani vagara ava ava rara vagara vakwawo nava ava vaka vantu nava ava tanta yimpempa nava ava dili kusikisa mo matumbwidiro gawo* ntani nanayinye eyi ya dira kuliza nerongo lyousili.
11 Erongo eli kwa liza nouyerere wombudi zongwa ezi ga pa nge Karunga goruhafo.
12 Tani pandura Jesus Kristusa Hompa gwetu ogu ga pa nge nonkondo, yeeyi age kwa tere nge asi ame mulimburukwi yiyo ga pa nge sirugana sokupongoka,
13 nampili ngomu ngani swaura Karunga nokuhepeka vantu vendi ntani noku linenepeka nye Karunga kwa fililire nge nkenda morwa kapi na kere nediwo ntani nepuro mwendi.
14 Nye Hompa gwetu kwa likida nge nkenda zonene noku vatera nge ni huguvare noku hara Jesus Kristusa.
15 Nonkango edi da fira kudihuguvara noku di tambura asi Jesus Kristusa kwa wizire mouzuni a ya zowore vananzo. Ame nyame nye munanzo gomunene po.
16 Nampili ngoso, age kwa likida nge nkenda yipo asi kupitira mwange ame munanzo gomunene po, Jesus Kristusa a likide elididimiko lyendi noku ninka nge ni kare sihonena kwava ngava pura mwendi va ka gwane mwenyo gwanarunye.
17 Hompa gwanarunye ogu a dili kufa ntani ogu a dili kumoneka, Karunga gelike a huru, va mu fumadeke noku mu yererepeka narunye nanarunye. Amen.
18 Timoteusa munange, tani ku pe mpangera* ezi kuliza nomauporofete gokukuhamena, yipo o twikire kurwa yita yoyiwa,
19 kwaterera kepuro lyoge nezwi lyewa lyokomutjima eli va siga vamwe, eyi kwa va ninkisa va zonagwise epuro lyawo ngamoomu asi zonauka sikepa.
20 Vamwe vawo kuna kara Himeneusa naArekisandeli, ame kwa va gava kwaSatana yipo va lirongere ko kudira kuswaura Karunga.
Nonkango dokonhi
^ Kutanta asi “ogu a fumadeke Karunga.”
^ Ndi “nompangera.”
^ MoRugereka asi “varongi woveta.”
^ Kwa kwatera mo ava ava sigi Karunga noukareli wendi.
^ Ndi “ava ava gana moyimpempa-mpempa.”
^ Ndi “epukururo.”
