Bakepesaka konso kilumbu mpe konso ntangu bansangu ya kubangisa mpe bifikula ya yimbi na batelevizion, na batelefone, na batableti, mpe na baordinatere.

 Mpe bana kelandaka yau.

 Yinki mutindu nge lenda tanina bana na nge samu bakukitungisa ve kuluta ndilu samu na bansangu ya kubangisa?

•  Bansangu kesalaka yinki na bana?

•  Yinki mutindu nge lenda sadisa bana na nge samu bakukitungisa ve kuluta ndilu samu na bansangu yina bakena kuwa?

•  Yinki nge kesala kana muana na nge monaka kusalama ya diambu mosi ya yimbi?

•   Bana mingi kekukitungisaka samu na mambu ya yimbi yina bakemonaka na bansangu. Yalenda vuanda mpasi samu na bana yankaka na kutuba mutindu bakena kukimona, nsangu mosi ya kubangisa lenda tungisa bau ngolo. a Balenda kukitungisa mingi kuluta kana bibuti na bau diaka kena kukitungisa.

•   Bana lenda bakusa na mutindu ya yimbi mambu yina bamemona na bansangu. Na kifuani, bana yankaka ketubaka ti mambu yina bamonaka na bansangu yakesalama na dibuta na bau. Mpe bantuenia yina kena kutala video mosi yina kena kuvutukila kumonisa diambu mosi ya yimbi lenda kanisa ti diambu yango kesalamaka mbala na mbala.

•   Yalenda vuanda mpasi samu bana bakusa kana diambu bakena kutala vuandaka mpenza diambu mosi ya mpasi mutindu bansangu kena kumonisina yau. Balenda zaba ve ti bakompani yina kepanza bansangu kebakaka mbongo mingi kana bantu mingi kena kutala yau. Na yau, nsangu mosi lenda pesama na mutindu mosi yina kebenda mpenza dikebi ya bantu yina ketala yau.

•   Tula bandilu samu bana bika tala to kuwa mbala na mbala bansangu ya yimbi. Yazola monisa ve ti bana fueti zaba ve mamabu yina kena kusalama na yinza. Kasi yakele mbote ve samu na bau kutala to kuwa nsangu mosi ya yimbi yina bakena kuvutukila mbala na mbala.

   “Na bantangu yankaka munu mpe bakala na munu beto ketubilaka mua mambu yina metadila bansangu ya yimbi yina beto talaka, kondua kuzaba ti yaketungisaka mpenza bana na beto ntangu bakekuwaka yau.”—Maria.

   Nsikudukusu ya Biblia: “Mitungisi na ntima ya muntu keniokolaka yandi.”—Masese 12:25.

•   Vuanda na ntima yinda samu na kuwa bau mpe vuanda na kimpombo ntangu nge kena kutuba. Kana muana na nge kena kumona mpasi samu na kutubila diambu yina mesalama, tubila yandi yandi sala desen ya diambu yango. Solola na muana na nge mambu yina kena kutungisa yandi na kusadilaka bampova yina yandi kebakusa, kasi manga kutubila mambu ya fiotifioti yina salamaka na diambu yango.

   “Muana na beto ya nketo kemonaka mbote kana beto mevuanda mpe beto kena kuwa yandi na dikebi. Kasi yandi kekukimonaka mbote ve kana beto metubila yandi kaka, ‘Mutindu yina nde mambu kena kusalamina bubu yayi, mpe beto fueti mesana na yau.’”—Sarahi.

   Nsikudukusu ya Biblia: “Kuwa na nsualu, kuwelaka ve kutuba.”—Yakobo 1:19.

•   Sadisa muana na nge samu yandi bakusa mbote bansangu. Na kifuani, nsangu yina metadila kuyiba bana lenda tinda muana yandi kanisa ti diambu yango kesalamaka mbala na mbala, nzokande yakele mutindu yina ve. Sasila muana na nge mambu yina nge kesalaka samu na kutanina yandi. Diaka, zaba ti, kana diambu mosi ya yimbi mesalama bakevutukilaka yau mingi samu yakele nsangu ya yimpa—kasi ve samu yakesalamaka mbala na mbala.

   “Sadisa muana na nge yandi zaba kuyala banguilu na yandi. Mbala mingi, mambu yina muntu kena kukanisa nde kemonisaka banguilu na yandi, na yau kana beto mesadisa bana na beto batula makanisi na bau na mambu ya mbote, bakevuanda na dikoki ya kukimona mbote.”—Lourdes.

   Nsikudukusu ya Biblia: “Muntu ya nduenga keponaka mbotembote bampova na yandi, mpe yandi kebuelaka kundimisa na bampova na yandi.”—Masese 16:23.