ပ​မ့ၢ်​ဖး​လံာ်ပရၢ​ပ​စၢၤ မ့ၢ်ဂ့ၤ, မ့ၢ်​ကွၢ်​ကွဲၤထံၣ်ဟူ, မ့တမ့ၢ် ဒိ​က​နၢ် ကွဲၤလ့လိၤ​မ့ၢ်ဂ့ၤ​န့ၣ် ကွီၢ်မ့ၣ် (တၢ်​လုၢ်သ့ၣ်ခါပတာ် တၢ်သိၣ်​တၢ်သီ), တၢ်ဒုး​တၢ်ယၤ, တၢ်မၤ​ဆူၣ်​မၤစိး​အဂ့ၢ် အိၣ်​အါမး​လီၤ! ဆိကမိၣ်​ကွၢ်​စ့ၢ်ကီး န​နီၢ်ကစၢ် အ​တၢ်ကီ​တၢ်ခဲ​တက့ၢ်. တၢ်​ဆူ​တၢ်ဆါ, မ့တမ့ၢ် ပှၤလၢ​န​အဲၣ်ဘၣ် တဂၤ​သံ​အဃိ တၢ်ကိၢ်​တၢ်ဂီၤ က​ဘၣ်​နၤ​ဒိၣ်မး​လီၤ. န​က​တူၢ်ဘၣ်​ဒ်သိး ပှၤ​အဂ့ၤ​ယိၤဘး, လၢ​အ​စံး​ဝဲ​လၢ “ယ​ဘၣ်​တၢ်​လုၣ်ဘၢ​ယၤ​လၢ ယ​တၢ်နး​တၢ်ဖှီၣ်​လီၤ.”—ယိၤဘး ၁၀:၁၅, ခစ.

သံကွၢ်လီၤ​န​သး ဒ်အံၤ​တက့ၢ်–

• ယၤ​ဒီး​ပှၤ​ခဲလၢာ်​အဂီၢ် တၢ်အံၤ​မ့ၢ် ယွၤ​အ​တၢ်တိာ်ပာ်​ဧါ.

• ယ​က​မၤနၢၤ ယ​တၢ်ကီ​တၢ်ခဲ​တဖၣ်​အဂီၢ် ယ​က​ဒိးန့ၢ်​ဘၣ် တၢ်မၤစၢၤ​ဖဲလဲၣ်.

• တၢ်​မုၢ်လၢ်​အလီၢ်​အိၣ်​လၢ ပ​က​ထံၣ်ဘၣ် တၢ်ဃူ​တၢ်ဖိး​လၢ ဟီၣ်ခိၣ်​ချၢ​ဒံး​ဧါ.

တၢ်​သံကွၢ်​တဖၣ်​အံၤ​အဂီၢ် တၢ်​စံးဆၢ​လၢ​အ​မံသူၣ်မံသး အိၣ်​လၢ​လံာ်စီဆှံ​ပူၤ​လီၤ.

“ဒီး​ယွၤ​က​ထွါကွံာ်​အ​မဲာ်ထံ​ခဲလၢာ်​လၢ​အမဲာ်, ဒီး​တၢ်သံ​တအိၣ်​လၢၤဘၣ်, ဒီး​တၢ်သူၣ်အုး​သးအုး တအိၣ်​လၢၤဘၣ်, ဒီး​တၢ်ဟီၣ်​တၢ်ယၢၤ​တအိၣ်​လၢၤဘၣ်, ဒီး​တၢ်​ဘှံးသူၣ်​ဘှံးသး တအိၣ်​လၢၤဘၣ်. အဂ့ၢ်ဒ်အံၤ,တၢ်အိၣ်​လၢ​အ​ခီၣ်ထံး​တဖၣ်​ပူၤကွံာ်​လံ.”—လီၣ်ဖျါ ၂၁:၄

“တုၤနုၤတစု ပှၤ​အ​ခီၣ်​ဟးဂီၤ က​စံၣ်ထီၣ်​ဒ်​တၢ်​ဟိ​အသိး” လီၤ.—ယၡါယၤ ၃၅:၆

“တုၤနုၤတစု ပှၤမဲာ်ဘျီၣ် အမဲာ်​က​အိးထီၣ်” လီၤ.—ယၡါယၤ ၃၅:၅

 “ကယဲၢ် ပှၤ​အိၣ်​လၢ တၢ်သွၣ်ခိၣ်​အ​ပူၤ​ခဲလၢာ် . . . က​ဟဲ​က့ၤထီၣ်ဝဲ” လီၤ.—ယိၤဟၣ် ၅:၂၈, ၂၉

“ဒီး​ပှၤ​အိၣ်ဝဲ​ဆိးဝဲ​တဖၣ်​န့ၣ်​တ​စံး, ယ​မၤ​တကဲ​ဘၣ်​န့ၣ်​ဘၣ်.”—ယၡါယၤ ၃၃:၂၄

“ဘုဧိၤဟုဧိၤ ကအိၣ်​လၢပှဲၤဝဲ လၢ​ထံကီၢ်​အ​ပူၤ” လီၤ.—စံးထီၣ်​ပတြၢၤ ၇၂:၁၆, ခစ

တဘၣ်​ဂ့ၢ်လိာ် ချ့သဒံး​လၢ တၢ်​ပာ်ဖျါ​လၢ လံာ်​ကဘျံးပၤ လၢညါ​တဖၣ်​န့ၣ် မ့ၢ်ဒၣ်​တၢ်​ဆိကမိၣ်​လၢ ပှၤ​အဲၣ်ဒိး​ဒုး​ကဲထီၣ်​န့ၣ်​တဂ့ၤ. ကစၢ်​ယွၤ​အၢၣ်လီၤ​ပာ်ဝဲ​လၢ တၢ်​တဖၣ်​အံၤ က​ကဲထီၣ်​ဒီး လံာ်စီဆှံ​တဲ​နၢ်ပၢၢ်​ဝဲ​လၢ ကစၢ်​က​မၤဝဲ​ဒ်လဲၣ်​န့ၣ်​လီၤ.

ဘၣ်ဆၣ် လံာ်စီဆှံ​ပာ်ဖျါ​ဝဲ အါန့ၢ်​တၢ်အံၤ​တက့ၢ်​လီၤ. ပာ်ဖျါ​န့ၢ်​ပှၤ တၢ်ဂ့ၢ်မိၢ်ပှၢ်​လၢ ပ​က​မုာ်လၤ​ဘၣ် တၢ်အိၣ်မူ​လၢ မၤ​မံသူၣ်မံသး​ပှၤ​နီၢ်နီၢ်​လၢ ဆၢကတီၢ်​ခဲအံၤ​ဒၣ်လဲာ် န့ၣ်​လီၤ. ဆိကမိၣ်​ကွၢ် န​နီၢ်ကစၢ်​ဒၣ်နဲ န​တၢ်ကိၢ်​တၢ်ဂီၤ, တၢ်ကီ​တၢ်ခဲ​တဖၣ်, မီ​ကိၣ်​ဖိ​တက့ၢ်. ဖဲ​န့ၣ်​အကျါ က​ပာ်​ဃုာ်ဒီး ကျိၣ်​ဧိၤ​စ့​ဧိၤ, ဟံၣ်ဖိ​ဃီဖိ တၢ်ကီ​တၢ်ခဲ, တၢ်​အိၣ်ဆူၣ်​အိၣ်ချ့​တဂ့ၤ, မ့တမ့ၢ် ပှၤလၢ​ပ​အဲၣ်အီၤ​တဂၤ သံဝဲ​န့ၣ်​လီၤ. လံာ်စီဆှံ မၤစၢၤ​နၤ​သ့​လၢ န​က​မၤနၢၤ ခ့​ခါ​တၢ်ကီ​တၢ်ခဲ​တဖၣ်​ဒီး ဟ့ၣ်ထီၣ်ဝဲ တၢ်​သံကွၢ်​လၢ လာ်​တဖၣ်​အံၤ အ​စၢ​သ့​လီၤ.

• ဘၣ်​မနုၤ​အဃိ ပ​တူၢ်ဘၣ် တၢ်နး​တၢ်ဖှီၣ်​လဲၣ်.

• ပ​တြီ​မၤနၢၤ တၢ်အိၣ်မူ တၢ်​ဘၣ်ယိၣ်​ဘၣ်​ဘီ​တဖၣ် က​သ့​ဒ်လဲၣ်.

• ပ​မၤမုာ်​အါထီၣ် ဟံၣ်ဖိ​ဃီဖိ​တၢ်အိၣ်မူ က​သ့​ဒ်လဲၣ်.

• ဖဲ​ပ​သံ​အခါ ပ​ကဲထီၣ်​တၢ်မနုၤ​လဲၣ်.

• ပှၤသံတ့ၢ်​လၢ ပ​အဲၣ်ဘၣ်​အီၤ​တဖၣ်​န့ၣ် ပ​က,က့ၤ​ထံၣ်ဘၣ်​ဒီး အဝဲသ့ၣ်​ဒံး​ဧါ.

• ကစၢ်​ယွၤ က​မၤ​လၢပှဲၤ အ​တၢ်စံးပာ်​လၢ ဘၣ်ဃး​ဒီး​ခါဆူညါ အဂ့ၢ်​န့ၣ် ပ​နာ်​သပှၢ်တၢၢ် က​သ့​ဒ်လဲၣ်.

 ခီဖျိ​န​ဖးလံာ်​အံၤ​ဒီး မ့ၢ်​န​ပာ်ဖျါ​လၢ န​အဲၣ်ဒိး​သ့ၣ်ညါ လံာ်စီဆှံ​သိၣ်လိ​တၢ်​တဖၣ်​န့ၣ်​လီၤ. လံာ်​အံၤ​က​မၤစၢၤ​နၤ​လီၤ. ပာ်သူၣ်​ပာ်သး​လၢ တၢ်​သံကွၢ်​လၢ ဘၣ်ဃး​ဒီး​လံာ်​အဆၢ​န့ၣ် အိၣ်​လၢ​လံာ်​ကဘျံးပၤ အ​ဖီလာ်​လီၤ. ပှၤ​အ​ကကွဲၢ်​လၢ အ​ကတိၤ​သကိး လံာ်စီဆှံ​အဂ့ၢ်​ဒီး ​ယဟိဝၤ​အ​ပှၤ အုၣ်အသး​တဖၣ်​န့ၣ် ဘၣ်​အသး​လၢ တၢ်မၤ​တၢ်​သံကွၢ် ဒီး​တၢ်​စံးဆၢ​န့ၣ်​လီၤ. ပ​မုၢ်လၢ်​လၢ နၤ​စ့ၢ်ကီး န​က​ဘၣ်သူၣ်​ဘၣ်သး​လီၤ. ခဲအံၤ​န​ဒိးန့ၢ်​ဘၣ် တၢ်​လဲၤခီဖျိ တၢ်​သူၣ်ပိၢ်​သးဝး ဒီး​တၢ်​သူၣ်မံ​သးမုာ်​ဖဲ န​မၤလိ လံာ်စီဆှံ​သိၣ်လိ​တၢ် အမ့ၢ်​အတီ​အသိး မ်​န​က​ဒိးန့ၢ်​ဘၣ် ယွၤ​အ​တၢ်​ဆိၣ်ဂ့ၤ​တက့ၢ်.