လူၤကၣ် ၂၃:၁-၅၆
၂၃ ပှၤဂီၢ်မုၢ်ခဲလၢာ် ဂဲၤဆၢထၢၣ် ဒီးလဲၤကိးယ့ၣ်ၡူးလၢ စီၤပံၤလးအအိၣ်လီၤ.+
၂ အဝဲသ့ၣ် ပာ်ဒ့ၣ်ပာ်ကမၣ် ယ့ၣ်ၡူး+ ဒီးတဲဝဲလၢ “ပထံၣ်လၢပှၤတဂၤအံၤ ကွဲန့ၢ်လွဲန့ၢ် ပပှၤကလုာ်တဖၣ်, တြီဝဲလၢ ပှၤကဟ့ၣ်တၢ်ခိတၢ်သွဲလၢ ကဲစၢ်အအိၣ်+ ဒီးအတဲလီၤအသးလၢ အမ့ၢ်ခရံာ် ဒီးစီၤပၤတဂၤလီၤ.”+
၃ ဒီးစီၤပံၤလး သံကွၢ်ယ့ၣ်ၡူးလၢ “မ့ၢ်နကဲပှၤယူဒၤဖိ အစီၤပၤဧါ.” အဝဲတဲဆၢက့ၤအီၤလၢ “ဒ်နတဲအသိးလီၤ.”+
၄ စီၤပံၤလး တဲဘၣ် ပှၤလုၢ်တၢ်ဒိၣ်အခိၣ်တဖၣ် ဒီးပှၤဂီၢ်မုၢ်တဖၣ်လၢ “ယတထံၣ် ပှၤတဂၤအံၤ အတၢ်ကမၣ်နီတမံၤဘၣ်.”+
၅ ဘၣ်ဆၣ် အဝဲသ့ၣ် တဲဝဲဆူၣ်န့ၢ်ဒံးအလီၢ်လၢ “အဝဲ ထိၣ်ဟူးထိၣ်ဂဲၤထီၣ် ပှၤဂီၢ်မုၢ်တဖၣ် ခီဖျိအဝဲသိၣ်လိတၢ်လၢ ယူဒၤအဟီၣ်ကဝီၤ ဒီတဘ့ၣ်အပူၤ စးထီၣ်လၢ ကၤလံၤလါ တုၤလီၤလၢ ဖဲအံၤလီၤ.”
၆ ဖဲစီၤပံၤလး နၢ်ဟူဝဲဒ်န့ၣ်အခါ အသံကွၢ်ဝဲလၢ “ပှၤတဂၤအံၤ ကဲပှၤကၤလံၤလါဖိဧါ.”
၇ ဖဲအဝဲသ့ၣ်ညါဝဲလၢ ယ့ၣ်ၡူးအိၣ်လၢ စီၤဟ့ၤရိာ် အတၢ်ပၢဖီလာ်အခါ+ အဝဲဆှၢအီၤလၢ စီၤဟ့ၤရိာ် အအိၣ်လီၤ. ဖဲန့ၣ်အဆၢကတီၢ် စီၤဟ့ၤရိာ်န့ၣ် အိၣ်ဝဲလၢ ယရူၤၡလ့ၣ်လီၤ.
၈ စီၤဟ့ၤရိာ် နၢ်ဟူဘၣ်ယ့ၣ်ၡူး အဂ့ၢ်အကျိၤအါမးအဃိ အဝဲအဲၣ်ဒိးထံၣ်အီၤယံာ်လံ. အဃိ ဖဲစီၤဟ့ၤရိာ် ထံၣ်ဘၣ်ယ့ၣ်ၡူးအခါ အသးခုဝဲဒိၣ်မး+ ဒီးအဝဲမုၢ်လၢ်ဝဲလၢ ကထံၣ်ဘၣ်ယ့ၣ်ၡူး မၤတၢ်လီၤလးတခါလီၤ.
၉ အဃိ အဝဲသံကွၢ် ယ့ၣ်ၡူး တၢ်သံကွၢ်အါထံၣ် ဘၣ်ဆၣ် ယ့ၣ်ၡူးတတဲဆၢက့ၤအီၤ နီတထံၣ်ဘၣ်.+
၁၀ ဘၣ်ဆၣ် ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ဂဲၤဆၢထၢၣ်ဝဲ တဘျီဝံၤတဘျီ ဒီးလၢတၢ်သးဒိၣ်အပူၤ ပာ်ဒ့ၣ်ပာ်ကမၣ် ယ့ၣ်ၡူးလီၤ.
၁၁ ဒီးစီၤဟ့ၤရိာ် ဒီးအပှၤသုးဖိတဖၣ် ရ့ယ့ၣ်ၡူးလၢ တၢ်တပာ်ကဲဘၣ်အပူၤလီၤ.+ ဒီးစီၤဟ့ၤရိာ် မၤဆဲးအဲးယ့ၣ်ၡူး+ ခီဖျိဒုးသိးထီၣ်အီၤ ဆ့ကၤဃံဃံလၤလၤ ဝံၤဒီးက့ၤဆှၢကဒါက့ၤအီၤလၢ စီၤပံၤလးအအိၣ်လီၤ.
၁၂ လၢညါ စီၤပံၤလး ဒီးစီၤဟ့ၤရိာ်န့ၣ် ကဲဒုၣ်ဒါ ဘၣ်ဆၣ် ဖဲတၢ်တနံၤန့ၣ် အဝဲသ့ၣ်ကဲထီၣ် ဒီသကိးလီၤ.
၁၃ ဒီးစီၤပံၤလး ကိးဖှိၣ် ပှၤလုၢ်တၢ်ဒိၣ်အခိၣ်တဖၣ်, ပှၤခိၣ်ပှၤနၢ်တဖၣ် ဒီးပှၤဂီၢ်မုၢ်တဖၣ်
၁၄ ဒီးတဲအဝဲသ့ၣ်လၢ “သုဟဲကိးပှၤတဂၤအံၤလၢယအိၣ် ဒီးသုတဲလၢ အဝဲထိၣ်ဟူးထိၣ်ဂဲၤထီၣ် ပှၤဂၤလၢ ကထီဒါတၢ်လီၤ. ခဲအံၤ ကွၢ်မီၤ, ယသံကွၢ်သံဒိးအီၤလၢသုမဲာ်ညါ ဘၣ်ဆၣ် တၢ်ကမၣ်လၢ သုပာ်လၢအလိၤန့ၣ် ယတထံၣ်နီတမံၤဘၣ်.+
၁၅ တကးဒံးဘၣ် စီၤဟ့ၤရိာ်စ့ၢ်ကီး တထံၣ်အတၢ်ကမၣ် နီတမံၤဘၣ်အဃိ အဝဲဆှၢကဒါက့ၤအီၤလၢပအိၣ်လီၤ. ကွၢ်မီၤ, အဝဲတမၤတၢ်ကမၣ်လၢ အကြၢးသံနီတမံၤဘၣ်.
၁၆ အဃိ ယကသိၣ်ဃီၣ်အီၤ+ ဝံၤဒီး ပျၢ်ကွံာ်အီၤလီၤ.”
၁၇ *—
၁၈ ဘၣ်ဆၣ် ပှၤဂီၢ်မုၢ်ဒီတဖု ကိးပသူထီၣ်ဝဲလၢ “ကွၢ်ကျဲၤကွံာ်ပှၤတဂၤန့ၣ်, ဒီးပျၢ်ကွံာ်န့ၢ်ပှၤလၢ စီၤဘၤရးဘါဟီ.”+
၁၉ (ပှၤတဂၤအံၤ မ့ၢ်လၢအဝဲထီဒါပဒိၣ်လၢ ဝ့ၢ်ပူၤဒီးမၤသံတၢ်အဃိ ပှၤထၢနုာ်အီၤလၢ ဃိာ်ပူၤလီၤ.)
၂၀ ဒီးမ့ၢ်လၢစီၤပံၤလး အဲၣ်ဒိးပျၢ်ကွံာ် ယ့ၣ်ၡူးအဃိ+ အဝဲတဲကဒီးတၢ်ဒီး အဝဲသ့ၣ်လီၤ.
၂၁ ဒီးအဝဲသ့ၣ် ကိးပသူထီၣ်ဝဲလၢ “ပျၤထီအီၤ လၢသ့ၣ်တၢၣ် အလိၤန့ၣ်, ပျၤထီအီၤ လၢသ့ၣ်တၢၣ် အလိၤန့ၣ်.”*+
၂၂ ဒီးစီၤပံၤလး တဲတၢ်ဒီးအဝဲသ့ၣ် သၢဘျီတဘျီလၢ “ဘၣ်မနုၤအဃိလဲၣ်. ပှၤတဂၤအံၤ မၤဘၣ်တၢ်အၢမနုၤလဲၣ်. ယတထံၣ်လၢ အမၤတၢ်ကမၣ်လၢ အကြၢးသံနီတမံၤမၢၤ. အဃိ ယကသိၣ်ဃီၣ်အီၤဝံၤဒီး ပျၢ်ကွံာ်အီၤလီၤ.”
၂၃ ဘၣ်ဆၣ် အဝဲသ့ၣ်ဃ့ဝဲလၢ ပှၤကမၤသံယ့ၣ်ၡူး ဒီးဆဲးကိးပသူထီၣ် လၢအကလုၢ်ဖးဒိၣ်အဃိ စီၤပံၤလးဟ့ၣ်ၡူ အဝဲသ့ၣ်လီၤ.+
၂၄ အဃိ စီၤပံၤလး ဆၢတဲာ်ဝဲလၢ အကမၤဒ် အဝဲသ့ၣ် ဃ့ဝဲအသိးလီၤ.
၂၅ အဝဲပျၢ်ကွံာ် ပှၤတဂၤလၢ အဝဲသ့ၣ်ဃ့ဝဲလီၤ. ပှၤတဂၤအံၤ မ့ၢ်လၢ အဝဲထီဒါပဒိၣ် ဒီးမၤသံတၢ်အဃိ ပှၤထၢနုာ်အီၤလၢဃိာ်ပူၤလီၤ. ဘၣ်ဆၣ် မ့မ့ၢ် ယ့ၣ်ၡူးန့ၣ် စီၤပံၤလးဟ့ၣ်လီၤကွံာ်အီၤ ဒ်သိးအဝဲသ့ၣ် ကမၤအီၤ ဖဲဒၣ်အသးလီၤ.
၂၆ ဖဲအဝဲသ့ၣ် လဲၤဆှၢယ့ၣ်ၡူးအခါ အဝဲသ့ၣ်ကိးပတုာ်ဝဲ ပှၤကူၤရ့ၤန့ဖိ စီၤၡံမိၣ် လၢအအိၣ်ဟဲလၢခိခိၣ် ဒီးအဝဲသ့ၣ် တီၣ်ထီၣ်ဝဲ တၢ်မၤအၢမၤနး အသ့ၣ်တၢၣ်* လၢအလိၤဒ်သိး အကလဲၤယိးဝဲ ဒီးပိာ်ထီၣ် ယ့ၣ်ၡူးအခံလီၤ.+
၂၇ ဒီးပှၤအါဂၤ ဃုာ်ဒီးပှၤပိာ်မုၣ်တဖၣ် ပိာ်ထီၣ်ဝဲ ယ့ၣ်ၡူးအခံလီၤ. ဒီးပိာ်မုၣ်တဖၣ်န့ၣ် ဒဲလီၤအသးနါပှၢ်လၢ တၢ်သးအုးအပူၤ ဒီးဟီၣ်ဝဲလၢ အဃိလီၤ.
၂၈ ယ့ၣ်ၡူး ဃၣ်ဃီၤအသးလၢ ပိာ်မုၣ်တဖၣ်အအိၣ် ဒီးတဲဝဲလၢ “ယရူၤၡလ့ၣ် အဖိမုၣ်သ့ၣ်ဧၢ, ဟီၣ်လၢယဃိလၢၤတဂ့ၤ. ဟီၣ်လၢသုနီၢ်ကစၢ် ဒီးသုဖိတဖၣ် အဃိတက့ၢ်.+
၂၉ ကနၣ်လၢအံၤ, မုၢ်နံၤတဖၣ် ကဟဲဝဲဖဲ ပှၤကတဲလၢ ‘ပိာ်မုၣ်လၢ အဖိတအိၣ်ဘၣ်, ပိာ်မုၣ်လၢအတအိၣ်ဖျဲၣ်ထီၣ်ဖိဘၣ် ဒီးပိာ်မုၣ်လၢ အတဒုးအီဘၣ် အဖိနုၢ်ဘၣ်န့ၣ် ကသးခုဝဲလီၤ.’+
၃၀ ဖဲန့ၣ်အခါ ပှၤကတဲ ကစၢၢ်တဖၣ်လၢ ‘လီၤတဲာ်လၢ ပလိၤမီၤ.’ ဒီးကတဲဘၣ် တၢ်လူၢ်တဖၣ်လၢ ‘ကျၢၢ်ဘၢကွံာ်ပှၤမီၤ.’+
၃၁ ဖဲသ့ၣ်သံသိအခါ တၢ်မ့ၢ်မၤအသးဒ်အံၤဒု ဖဲသ့ၣ်ဃ့ထီအခါ တၢ်ကမၤအသးဒ်လဲၣ်.”
၃၂ ဒီးပှၤလဲၤကိးစ့ၢ်ကီး ပှၤအဂၤခံဂၤလၢအမ့ၢ် ပှၤမၤကမၣ်တၢ်တဖၣ် ဒ်သိး ကမၤသံအဝဲသ့ၣ် ဃုာ်ဒီးယ့ၣ်ၡူးလီၤ.+
၃၃ ဖဲအဝဲသ့ၣ်လဲၤတုၤလၢ တၢ်လီၢ်လၢ ပှၤကိးအီၤလၢ ခိၣ်သၣ်ဃံကုအခါ+ အဝဲသ့ၣ် ပျၤထီယ့ၣ်ၡူးလၢ သ့ၣ်တၢၣ်အလိၤဒီး ပှၤမၤကမၣ်တၢ်ခံဂၤ အိၣ်လၢအစုထွဲ တကပၤတဂၤ ဒီးလၢအစုစ့ၣ် တကပၤတဂၤလီၤ.+
၃၄ ဘၣ်ဆၣ် ယ့ၣ်ၡူးတဲဝဲလၢ “ပါဧၢ, အဝဲသ့ၣ် မၤမနုၤလဲၣ်န့ၣ် တသ့ၣ်ညါဝဲဘၣ်အဃိ ပျၢ်အဝဲသ့ၣ် အတၢ်ကမၣ်တက့ၢ်.” ဒီးအဝဲသ့ၣ်ဖးတၢ် ဒ်သိးကနီၤလီၤ အကူအသိးအဂီၢ်လီၤ.+
၃၅ ဒီးပှၤဂီၢ်မုၢ်တဖၣ်န့ၣ် ဆၢထၢၣ်ကွၢ်တၢ်လီၤ. ဘၣ်ဆၣ် ပှၤခိၣ်ပှၤနၢ်တဖၣ်န့ၣ် ဝံာ်ထီၣ်အထးခိၣ် ဒီးတဲဝဲလၢ “ပှၤဂၤန့ၣ် အမၤပူၤဖျဲးဝဲ အဃိ အဝဲမ့မ့ၢ် ကစၢ်ယွၤအခရံာ် လၢအဘၣ် တၢ်ဃုထၢအီၤတဂၤန့ၣ် အမၤပူၤဖျဲးလီၤအနီၢ်ကစၢ်အသး ကဘၣ်သ့ဝဲသၢၤ.”+
၃၆ ပှၤသုးဖိတဖၣ်ဒၣ်လဲာ် မၤဆဲးအဲးအီၤခီဖျိ ဟဲဟ့ၣ်အီၤ စပံးထံအဆံၣ်+
၃၇ ဒီးတဲဝဲလၢ “နမ့မ့ၢ် ပှၤယူဒၤဖိအစီၤပၤန့ၣ် မၤပူၤဖျဲးလီၤနသးသၢၤ.”
၃၈ ဒီးလၢအခိၣ်ဒီန့ၣ် တၢ်ကွဲးအသးအိၣ်ဝဲလၢ “ပှၤတဂၤအံၤ မ့ၢ်ပှၤယူဒၤဖိ အစီၤပၤလီၤ.”+
၃၉ ပှၤမၤကမၣ်တၢ်လၢ အဘၣ်တၢ်ပျၤထီအီၤ ခံဂၤအကျါတဂၤန့ၣ် တဲအၢတဲသီယ့ၣ်ၡူးလၢ+ “နကဲခရံာ် တမ့ၢ်ဧီၤ. မၤပူၤဖျဲးလီၤ နနီၢ်ကစၢ်အသး ဒီးပဝဲစ့ၢ်ကီးသၢၤ.”
၄၀ ဒီးအဝဲတဂၤန့ၣ် ဒူအီၤဒီးတဲအီၤလၢ “နတပျံၤ ကစၢ်ယွၤ နီတစဲးဧီၤ. နၤစ့ၢ်ကီး ခဲအံၤနတူၢ်ဘၣ် တၢ်စံၣ်ညီၣ် ဒ်သိးဒီးအီၤလီၤ.
၄၁ မ့မ့ၢ် ပဝဲဒၣ်န့ၣ် ခီဖျိတၢ်လၢ ပမၤတ့ၢ်တဖၣ်အဃိ ပတူၢ်ဘၣ် တၢ်စံၣ်ညီၣ်ဒ်အံၤန့ၣ် ကြၢးဝဲလီၤ. မ့မ့ၢ် ပှၤတဂၤအံၤန့ၣ် တမၤကမၣ် တၢ်နီတမံၤဘၣ်.”
၄၂ ဝံၤဒီး အဝဲတဲဝဲလၢ “ယ့ၣ်ၡူးဧၢ, ဖဲနနုာ်လီၤလၢ နဘီမုၢ်အပူၤအခါ သ့ၣ်နီၣ်ထီၣ်က့ၤယၤနီၤ.”+
၄၃ ယ့ၣ်ၡူးတဲအီၤလၢ “တနံၤညါအံၤ ယကတဲနၤ တီတီလၢ နကအိၣ်ဒီးယၤလၢ ပၤရဒံစူးအပူၤလီၤ.”+
၄၄ ဖဲမုၢ်ဆါခီ ၁၂ နၣ်ရံၣ်န့ၣ်* တၢ်ခံးလီၤဝဲလၢ ကီၢ်ဒီဘ့ၣ် တုၤလီၤလၢ ဟါလီၤခီ ၃ နၣ်ရံၣ်*+
၄၅ မ့ၢ်လၢ မုၢ်တဟ့ၣ်ထီၣ် တၢ်ကပီၤဘၣ်အဃိလီၤ. ဒီးယၣ်ဘျးသဒၢလၢ တၢ်လုၢ်ဟံၣ်အပူၤန့ၣ်+ ညာ်ကွံာ်ဝဲခံက့ လၢအခၢၣ်သးတီတီလီၤ.+
၄၆ ဒီးယ့ၣ်ၡူး ကိးထီၣ်လၢ အကလုၢ်ဖးဒိၣ်လၢ “ပါဧၢ, ယအးလီၤယသးလၢ နစုပူၤလီၤ.”+ အတဲဝဲဒ်န့ၣ်ဝံၤဒီး အသံဝဲလီၤ.*+
၄၇ မ့ၢ်လၢသုးခိၣ်တဂၤ ထံၣ်ဘၣ်ဝဲ တၢ်မၤအသးအံၤအဃိ အဝဲမၤလၤကပီၤ ကစၢ်ယွၤ ဒီးတဲဝဲလၢ “ပှၤတဂၤအံၤ ကဲပှၤတီပှၤလိၤ နီၢ်ကီၢ်လီၤ.”+
၄၈ ဒီးဖဲပှၤဂီၢ်မုၢ်လၢ အအိၣ်ဖှိၣ်ဖဲန့ၣ် ဒီးကွၢ်စိတၢ်တဖၣ် ထံၣ်တၢ်မၤအသးတဖၣ်န့ၣ်အခါ အဝဲသ့ၣ် ဒဲလီၤအသးနါပှၢ် ဒီးက့ၤလၢဟံၣ်လီၤ.
၄၉ ဒီးပှၤခဲလၢာ်လၢ အသ့ၣ်ညါအီၤန့ၣ် ဆၢထၢၣ်လၢအယံၤလီၤ. တကးဒံးဘၣ် ပိာ်မုၣ်တဖၣ်လၢ အပိာ်အခံ စးထီၣ်လၢ ကၤလံၤလါန့ၣ် အိၣ်ဝဲဖဲန့ၣ် ဒီးထံၣ်ဝဲ တၢ်မၤအသးတဖၣ်အံၤလီၤ.+
၅၀ ဒီးပှၤအိၣ်ဝဲတဂၤလၢ အမံၤမ့ၢ် စီၤယိၤသးလီၤ. အဝဲပၣ်ဃုာ်လၢ ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ်တဖု အကျါ ဒီးအဝဲမ့ၢ်ပှၤလၢအဂ့ၤ ဒီးအတီအလိၤလီၤ.+
၅၁ (ပှၤတဂၤအံၤ တတူၢ်လိာ်လၢ ကဆီၣ်ထွဲအဝဲသ့ၣ် အတၢ်ကူၣ်အၢကူၣ်သီ ဒီးအတၢ်ဖံးတၢ်မၤဘၣ်.) အဝဲအိၣ်ဟဲလၢ ဝ့ၢ်အရံၤမၤသဲ လၢအအိၣ်လၢ ယူဒၤ အဟီၣ်ကဝီၤပူၤလီၤ. ဒီးအဝဲမ့ၢ်ပှၤတဂၤလၢ အခိးကွၢ်လၢ် ကစၢ်ယွၤ အဘီအမုၢ်စ့ၢ်ကီးလီၤ.
၅၂ ပှၤတဂၤအံၤလဲၤဝဲလၢ စီၤပံၤလးအအိၣ် ဒီးဃ့န့ၢ်ဝဲ ယ့ၣ်ၡူးအစိၣ်လီၤ.
၅၃ ဒီးအဝဲစိာ်လီၤဝဲအစိၣ်+ ဒီးဘိၣ်ဘံထီၣ်ဝဲဒီး တၢ်ကံးညာ်လၢ အညၣ်ဂ့ၤတဘ့ၣ်လီၤ. ဒီးအဝဲ လဲၤပာ်လီၤအီၤလၢ တၢ်သွၣ်ခိၣ်လၢ အဘၣ်တၢ်ခူၣ်အီၤလၢလၢၢ်အပူၤ+ လၢပှၤတပာ်လီၤ ပှၤသံနီတဂၤဒံးဘၣ်.
၅၄ ဖဲန့ၣ်အခါ ဘၣ်ဖဲ တၢ်ကတဲာ်ကတီၤတၢ်အမုၢ်နံၤ+ ဒီးမုၢ်အိၣ်ဘှံးနံၤ+ ဘူးကဘၣ်လံ.
၅၅ ဒီးပိာ်မုၣ်တဖၣ်လၢ အဟဲဒီးအီၤလၢ ကၤလံၤလါန့ၣ် လဲၤကွၢ်ဝဲတၢ်သွၣ်ခိၣ်ဒီး ထံၣ်ဝဲပှၤပာ်လီၤ ယ့ၣ်ၡူးအစိၣ်ဒ်လဲၣ်န့ၣ်လီၤ.+
၅၆ ဒီးအဝဲသ့ၣ်က့ၤဒ်သိး ကကတဲာ်ကတီၤဝဲ တၢ်နၢမူနၢဆှီ ဒီးသိနၢမူတဖၣ်အဂီၢ်လီၤ. ဘၣ်ဆၣ် အဝဲသ့ၣ်အိၣ်ဘှံးဝဲဖဲ မုၢ်အိၣ်ဘှံးနံၤ+ ဒ်တၢ်မၤလိာ် အိၣ်ဝဲအသိးလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ မ့ၢ်စ့ၢ်ကီး “မၤသံအီၤလၢ သ့ၣ်တၢၣ်အလိၤ, မၤသံအီၤလၢ သ့ၣ်တၢၣ်အလိၤ.”
^ ကွၢ် တၢ်ကတိၤအခီပညီ.
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၆ နၣ်ရံၣ်ဃၣ်ဃၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်ဃၣ်ဃၣ်.”
^ မ့ၢ်စ့ၢ်ကီး “အဝဲကသါထီၣ်လၢ အလီၢ်ခံကတၢၢ်တထံၣ်.”
